12 قىركۇيەك, 11:40 362 0 جاڭالىقتار Túrkistan Gazeti

قازاقستاندىق سۋرەتشى كارىپبەك كۇيىكوۆ ۇلىبريتانيادا جەكە كورمەسىن وتكىزدى

سەمەي يادرولىق پوليگونىنىڭ قۇربانى، سۋرەتشى كارىپبەك كۇيىكوۆ لوندوندا جەكە سۋرەت كورمەسىن وتكىزدى. بۇل تۋرالى قازاقپارات ءتىلشىسى حابارلادى.

كارىپبەك كۇيىكوۆ يادرولىق سىناقتاردىڭ ۇرەي تۋدىرار اۋىر زارداپتارى بەينەلەنگەن سۋرەتتەرىن بريتانيا جۇرتشىلىعىنا ۇسىنىپ قانا قويماي، حالىقتى يادرولىق سىناقتارعا تىيىم سالۋعا باعىتتالعان اتوم جوباسىنىڭ ونلاين-پەتيتسياسىنا قول قويۋعا شاقىردى.

«لوندون - بۇكىل حالىق قۇلاق اساتىن الەم استانالارىنىڭ ءبىرى. وسىندا ايتىلعان پىكىرلەر الەم جۇرتشىلىعىنىڭ نازارىنا ىلىگەدى»، - دەدى ءوز سوزىندە سۋرەتشى.

 

بىرىككەن كورولدىكتىڭ قاۋىمدار پالاتاسى عيماراتىندا جانە  كورولدىك اۆتوموبيلدەر كلۋبىندا وتكەن كورمەلەرگە بريتانيالىق دەپۋتاتتار، قازاقستان مەن ۇلىبريتانيا ديپلوماتيالىق كورپۋسىنىڭ، بۇقارالىق اقپارات قۇرالدارىنىڭ وكىلدەرى قاتىستى. وندا «يادرولىق قارۋسىزدانۋ ءۇشىن كامپانيا» ۇيىمىنىڭ باس حاتشىسى كەيت حادسون قازاقستاننىڭ يادرولىق قارۋعا تىيىم سالۋ تۋرالى شارتتى راتيفيكاتسيالاۋىن ۇلى جەتىستىك دەپ باعالادى.

«بۇل باستاما قارۋسىزدانۋ قوزعالىسىنا ۇلكەن سەرپىلىس اكەلدى»، دەدى ول سوزىندە.

ال ۇلىبريتانيا پارلامەنتى لوردتار پالاتاسىنىڭ مۇشەسى جانە «پارلامەنتاريلەر يادرولىق قارۋدى تاراتپاۋ جانە جويۋ ءۇشىن»  ۇيىمىنىڭ تەڭ توراعاسى بارونەسسا سيۋزان ميللەر يادرولىق قارۋدى سىناۋدىڭ قاۋىپ-قاتەرى مەن سالدارىن الەم جۇرتشىلىعىنا جەتكىزۋدەگى قازاقستاننىڭ ءرولىن ايرىقشا اتاپ ءوتتى. ول اسىرەسە، كارىپبەك كۇيىكوۆتىڭ جەكە باسىنىڭ تاعدىرى مەن ولشەۋسىز ەڭبەگىن ەرەكشە اتاپ ءوتتى.  ۇلىبريتانيا پارلامەنتى قاۋىمدار پالاتاسىنىڭ دەپۋتاتى بوب ستيۋارت بولسا، كارىپبەك كۇيىكوۆتىڭ اۋىرتپاشىلىققا توتەپ بەرىپ، يادرولىق قارۋعا تولىق تىيىم سالۋ يدەياسىن ناسيحاتتاپ جۇرگەندىگىن ۇلكەن ەرلىك، دەپ باعالادى.

سوڭعى جاڭالىقتار