13 قىركۇيەك, 14:46 515 0 ەكونوميكا انار لەپەسوۆا

Air Astana: بىزدەگى باعا وزگەلەرمەن سالىستىرعاندا ايتارلىقتاي تومەن

Air Astana اۋە كومپانياسى بيلەت باعاسىن ارزانداتپايدى. كومپانيا پرەزيدەنتى پيتەر فوستەر ۇشاق بيلەتىنىڭ باعاسى ەڭ قىمبات ەمەس، ءتىپتى، وزگەلەرمەن سالىستىرعاندا ايتارلىقتاي تومەن ەكەنىن ايتتى، دەپ حابارلايدى كتك ارناسى.

«الىس-جاقىن شەتەلدىڭ اۋە تاسىمالداۋشىلارىنا قاراعاندا، بىزدەگى باعا بىرنەشە ەسە تومەن. ۇزاقتىعى 2-2,5 ساعات بولاتىن رەيستەردە ورتاشا تاريف قۇنى – شامامەن 45 دوللار. وزگە تاسىمالداۋشىلاردىڭ تاريفتەرىمەن سالىستىرعاندا، بۇل وتە تومەن باعا بولىپ تابىلادى»، –  دەيدى Air Astana اۋە كومپانياسىنىڭ پرەزيدەنتى پيتەر فوستەر.

سونىمەن قاتار، تاسىمالداۋشى اۋە كەروسينىنىڭ باعاسىنا دا رازى. سوندىقتان «ەير استانا» كەمىندە جىل سوڭىنا دەيىن ءوزىنىڭ باعا ساياساتىن ۇستانۋدى جوسپارلاپ وتىر. ال مەملەكەت باسشىسىنىڭ تاپسىرماسىن ەنشىلەس لوۋكوستەردىڭ ەسەبىنەن ورىنداۋدى كوزدەپ وتىرعان سىڭايلى. بۇگىنگى تاڭدا Fly Arystan اۋەپاركىندە نەبارى ەكى اۋە كەمەسى بار. كەلەسى جىلى ولاردىڭ سانىن 10-عا جەتكىزۋگە ۋادە ەتۋدە. دەمەك، بيۋدجەتتىك رەيستەر سانى ارتادى.

ەسكە سالا كەتسەك، پرەزيدەنت قاسىم-جومارت توقاەۆ ۇلتتىق تاسىمالداۋشى كومپانياداعى اۋە بيلەتتەرىنىڭ باعاسىنىڭ قىمباتتىعىن سىنعا العان ەدى. مەملەكەت باسشىسى ءوز جولداۋىندا باعانىڭ شامامەن ءۇش ەسەگە قىمبات ەكەنىن ايتىپ، ۇكىمەتكە جاعدايعا ارالاسۋدى تاپسىردى.

سوڭعى جاڭالىقتار