13 قىركۇيەك, 11:37 459 0 جاھان انار لەپەسوۆا

سەرگەي لاۆروۆ سيرياداعى سوعىستىڭ اياقتالعانىن مالىمدەدى

رەسەي سىرتقى ىستەر ءمينيسترى سەرگەي لاۆروۆ «ترۋد» گازەتىنە «سيرياداعى سوعىس شىن مانىندە اياقتالعانىن» مالىمدەدى.

«مەملەكەت اقىرىنداپ قالىپتى، بەيبىت ومىرگە ورالىپ كەلەدى. كەيبىر قاقتىعىس وشاقتارى سيريا ۇكىمەتىنىڭ باقىلاۋىنان تىس ايماقتاردا عانا ساقتالىپ وتىر، ماسەلەن يدليب پەن ەۆفرات وزەنىنىڭ شىعىس جاعالاۋى»، – دەيدى مينيستر.

لاۆروۆتىڭ ايتۋىنشا، قازىرگى تاڭدا سيرياعا گۋمانيتارلىق كومەك كورسەتۋ جانە وسى ەلدەگى ۇزاقمەرزىمدى تۇراقتىلىققا قول جەتكىزۋ، داعدارىستى رەتتەۋ ماسەلەلەرى كۇن ءتارتىبىنىڭ العاشقى ورنىنا شىعىپ وتىر.

مينيستر رەسەيدىڭ سيريالىق تاراپپەن جانە وپپوزيتسيالىق كۇشتەرمەن تۇراقتى بايلانىستى ۇزبەۋگە ۇلكەن ءمان بەرىپ وتىرعانىن جەتكىزدى.

ەسكە سالا كەتەيىك، سيرياداعى قارۋلى قاقتىعىستار 2011 جىلدان بەرى جالعاسىپ كەلەدى. 2015 جىلى باشار اساد رەسەيگە اسكەري كومەك كورسەتۋ تۋرالى ءوتىنىش جاساعان. سول جىلدىڭ 30 قىركۇيەگىنەن باستاپ رەسەيلىك اسكەري-اۋە كۇشتەرى لاڭكەستەردىڭ ينفراقۇرىلىمدارىن شابۋىلداۋدى باستادى.

2017 جىلدىڭ سوڭىندا «يسلام مەملەكەتى» لاڭكەستىك ۇيىمىنىڭ تىزە بۇككەنى جاريالاندى. قازىرگى تاڭدا سيريانى قايتا قالپىنا كەلتىرۋ جانە بوسقىنداردى قايتارۋ ماسەلەسى قولعا الىنۋدا.

سوڭعى جاڭالىقتار