13 قىركۇيەك, 10:24 443 0 رۋحانيات انار لەپەسوۆا

"التىن ادام" 20 مەملەكەتتىڭ مۇراجايىنا قويىلادى

انكارانىڭ انادولى وركەنيەتتەر مۋزەيىندە «ۇلى دالا: تاريح جانە مادەنيەت» كورمەسى اشىلدى. بۇل تۋرالى قر ۇلتتىق مۋزەيىنءىڭ ءباسپاسوز قىزمەتى حابارلادى.

كورمە «التىن ادامنىڭ الەم مۋزەيلەرىنە شەرۋى» حالىقارالىق كورمە جوباسى اياسىندا 12 قىركۇيەكتەن 12 قازانعا دەيىن جالعاسادى. كورمەگە قر ۇلتتىق مۋزەيىنىڭ قورلارىنان بارلىعى 207 جادىگەر ۇسىنىلدى. «انكارا قالاسىندا ۇيىمداستىرىلعان بۇگىنگى كورمەنىڭ ماقساتى - ەۋرازيانىڭ ۇلى دالا بەلدەۋىندە كونە تەمىر داۋىرىنەن قازىرگى زامانعا دەيىنگى قالىپتاسقان تاريحي-مادەني باۋىرلاس تۇركيا ەلىنە تانىستىرۋ بولىپ تابىلادى»، – دەدى قر ۇلتتىق مۋزەيىنىڭ ديرەكتورى ارىستانبەك مۇحامەديۇلى شارانىڭ اشىلۋ راسىمىندە.

ونىڭ ايتۋىنشا، تۇركيا جۇرتشىلىعىنىڭ نازارىنا ۇسىنىلعان «التىن ادام» جيىرماعا جۋىق مەملەكەتتەگى مۇراجايلارعا قويىلادى. «قازاقستان الەمدىك قاۋىمداستىقتى وزىندىك كوشپەلى وركەنيەتىمەن جانە تاريحىمەن ەرەكشە قىزىقتىرادى.

قازىرگى ۋاقىتتا ەلىمىزدە قر تۇڭعىش پرەزيدەنتى ەلباسى ن.ءا. نازارباەۆتىڭ «رۋحاني جاڭعىرۋ»، «ۇلى دالانىڭ جەتى قىرى» باعدارلامالارىنىڭ اياسىندا مادەنيەت پەن ونەر سالاسىندا كوپتەگەن جۇمىستار اتقارىلۋدا. سونىڭ ءبىرى جانە بىرەگەيى وزدەرىڭىز كۋا بولىپ وتىرعان «التىن ادامنىڭ الەم مۋزەيلەرىنە شەرۋى» حالىقارالىق جوباسى. قر مادەنيەت جانە سپورت مينيسترلىگىنىڭ قولداۋىمەن قر ۇلتتىق مۋزەيى جۇزەگە اسىرىپ وتىرعان بۇل جوبا اياسىندا قازاقستان تاۋەلسىزدىگىنىڭ سيمۆولىنا اينالعان التىن ادام ەۋروپا، ازيا جانە وزگە دە جيىرماعا جۋىق مەملەكەتتىڭ نازارىنا ۇسىنىلماق»، –  دەدى ارىستانبەك مۇحامەديۇلى.

سونىمەن قاتار، ا.مۇحامەديۇلى كورمەنى ۇيىمداستىرۋعا كومەك كورسەتكەن تۇركيانىڭ مادەنيەت جانە سپورت مينيسترلىگىنە، تۇركيا رەسپۋبليكاسىنداعى قازاقستاننىڭ ەلشىلىگىنە، حالىقارالىق تۇركى مادەنيەتى ۇيىمىنىڭ ۇجىمىنا العىس ءبىلدىردى. شارانىڭ اشىلۋ سالتاناتىنا قازاقستان رەسپۋبليكاسىنىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى ابزال ساپاربەكۇلى، مۋزەيلەر مەن مادەني ەسكەرتكىشتەردىڭ باس ديرەكتورى گوكحان يازگى، تۇركسوي باس حاتشىسى دۇيسەن قاسەيىنوۆ قاتىستى.

 

سوڭعى جاڭالىقتار