13 قىركۇيەك, 10:10 523 0 زاڭ دينارا مىڭجاسارقىزى

بيۋدجەت ءبولىنىسى: قاي سالاعا قانشا قارجى؟

ماجىلىستە الداعى ءۇش جىلعا ارنالعان بيۋدجەت جوباسى قارالدى. جيىنعا قاتىسۋشىلاردىڭ سىنىنا ۇشىراعانى – قازىنا قارجىسىنىڭ كۆازيمەملەكەتتىك سەكتور مەن كۇشتىك قۇرىلىمدارعا ەسەلەپ ءبولىنۋى. قاي سالاعا قانشا قارجى ءبولىندى؟ بيۋدجەتتەگى ميللياردتاردىڭ ەسەپ-قيسابى قانداي؟  

ءماجىلىس ەكى مينيسترلىكتىڭ بايانداماسىن تىڭدادى. ولار زالداعىلاردى الداعى ءۇش جىل ىشىندە قاي سالاعا قانشا اقشا جۇمسالايىن دەپ وتىرعانىنان حاباردار ەتتى. ميلليارد، تريلليونداردى تىزبەكتەگەن قارجى ۆيتسە-ءمينيسترىنىڭ ايتۋىنشا، ءىرى حولدينگتەرگە الداعى جىلدارى تاعى ءبىراز اقشا قاراستىرىلعان.

قارجى ءمينيسترىنىڭ ورىنباسارى بەرىك شولپانقۇلوۆ: «بايتەرەك» ۇلتتىق باسقارۋشى حولدينگىنە جەڭىلدىكتى قارجىلاندىرۋعا جالپى سوماسى – 194,8 ملرد تەڭگە، ونىڭ ىشىندە 2020 جىلى – 134,8 ملرد تەڭگە شىعىستار كوزدەلگەن. ال «بيزنەستىڭ جول كارتاسى» باعدارلاماسىنا كەلەر جىلعا 146 ملرد تەڭگە بولىنەدى»، – دەدى.

ال ەكونوميكا مامانى ءارى ۇلتتىق سەنىم كەڭەسىنىڭ مۇشەسى مۇحتار تايجان بۇل ترانسفەرتتەرمەن كەلىسپەيدى. ونىڭ ايتۋىنشا، كۆازيمەملەكەتتىك كومپانيالاردى جاپپاي قىسقارتۋ كەرەك. وسى سەكتورداعى 500-دەي كومپانيا «تۇك ءبىتىرىپ وتىرعان جوق» دەيدى ول.

سونداي-اق، م.تايجان: «كازاگرو، بايتەرەك، سامۇرىق، دامۋ، تاعى قانداي، اگرارلىنەسيەلىك كورپوراتسيا دەگەن بار. ەڭ ۇلكەن حولدينگتەر عانا. ءار حولدينگتىڭ ىشىندە جۇزدەگەن شاعىن-شاعىن كومپانيالار بار. ولاردىڭ 90 پايىزى – بانكروت. ولار تەك مەملەكەتتىڭ اقشاسىن جەپ جاتىر»، – دەيدى.

قارجى مينيسترلىگى ۇسىنعان مىنا دەرەكتە 2020 جىلى ىشكى ىستەر مينيسترلىگى، قورعانىس مينيسترلىگىنەن 60 ميللياردتاي ارتىق الادى. ول ءۇش جىل قاتارىنان ۇلعايىپ وتىرادى. ونىڭ قاسىندا ارنايى جاساق تۇرلەرىنە قاراجات جەكە بولىنەدى. لوگيكاعا سالساق، كەرىسىنشە، قورعانىس مينيسترلىگى بارىنەن كوپ الۋى كەرەك ەدى دەيدى ماماندار. بيۋدجەت ءبولىنىسىنىڭ وسى ءبىر تۇسى دا وتىرىسقا قاتىسۋشىلاردىڭ سىنىنا ۇشىرادى. دەگەنمەن ەسەپ كوميتەتىنىڭ بۇعان جاۋابى بار. كۇشتىك قۇرىلىمدار نەمەسە اسكەري سالادا ۇزاق مەرزىمدى كەلىسىم-شارتتار كوپ بولادى. «قاراجاتتىڭ قۇبىلمالىلىعى سودان»، - دەيدى. ال كۆازيمەملەكەتتىك سەكتورعا قاتىستى قازىر تۇبەگەيلى تەكسەرۋگە كىرىسكەن. ەسەپ كوميتەتىنىڭ ءتورايىمى ناتاليا گودۋنوۆا: «پرەزيدەنت جولداۋىندا ەسەپ كوميتەتىنە ۇكىمەتپەن بىرگە كۆازيمەملەكەتتىك سەكتور سۋبەكتىلەرىنىڭ تيىمدىلىگىنە ساراپتاما جۇرگىزۋ جونىندە تاپسىرما بەردى. بىزدە ءۇش اي ۋاقىت بار. ۇكىمەتپەن بىرگە جۇمىس ىستەپ جاتىرمىز. جىلدىڭ سوڭىنا قاراي ەسەپقيسابىن شىعارامىز دەپ وتىرمىز» دەدى.

الداعى ءۇش جىلدا بيۋدجەتتىڭ 5 تريلليونعا جۋىق تەڭگەسىن وسى كۆازيمەملەكەتتىك سەكتور جۇتايىن دەپ وتىر.

سوڭعى جاڭالىقتار