12 قىركۇيەك, 12:53 338 0 ەكونوميكا انار لەپەسوۆا

كوپبالالى وتباسىلار شاعىن نەسيەنى قالاي الادى؟

 ەڭبەك جانە حالىقتى الەۋمەتتىك قورعاۋ ءمينيسترى جەكە بيزنەستى باستاۋ ءۇشىن كوپ بالالى وتباسىلارعا ميكروكرەديتتەردىڭ قانداي شارتتارمەن بەرىلەتىنىن ءتۇسىندىردى.

مينيستر مەملەكەت باسشىسىنىڭ كوپ بالالى انالاردى ميكرو جانە شاعىن بيزنەسكە تارتۋ جونىندەگى تاپسىرماسىن ورىنداۋ ماقساتىندا «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ مەملەكەتتىك باعدارلاماسىنا تۇزەتۋلەر ەنگىزىلەتىنىن ايتتى، وندا جەڭىلدىكتى شارتتارمەن ءارتۇرلى بيزنەس تۇرلەرىنە كەپىل جانە ميكروكرەديتتەر بەرىلمەستەن قايتارىمسىز مەملەكەتتىك گرانتتار بەرۋ مەحانيزمدەرى كوزدەلگەن.

«ءبىز ميكروكرەديتتەر بەرۋ شارتتارىن قايتا قارايمىز. جاڭا بيزنەستىڭ تۇراقتىلىعىن قامتاماسىز ەتۋ ماقساتىندا كوپبالالى وتباسىلاردىڭ جوبالارى ءۇشىن ميكروكرەديت بەرۋ مەرزىمىنىڭ ۇلعايتىلۋى ۇسىنىلادى. كرەديتتى وتەۋ بويىنشا قارجىلىق جۇكتەمەنى تومەندەتۋ ءۇشىن ءبىز نومينالدى سىياقى ستاۆكاسىن (قولدانىستاعى سحەما بويىنشا 6%) تومەندەتۋدى ۇسىنامىز»، – دەدى ءبىرجان نۇرىمبەتوۆ.

سونداي-اق ول جەتكىلىكتى كەپىل مۇلكى جوق وتباسىلار ءۇشىن ميكروكرەديتتەردى كەپىلدەندىرۋ مەحانيزمدەرىن اۋىل مەن قالاعا بولمەي، بىرىڭعاي وپەراتور ارقىلى تاراتۋ جوسپارلانىپ وتىرعانىن اتاپ ءوتتى (مىسالى، «دامۋ» كدق اق). «اتامەكەن» ۇكپ فيليالدارىنىڭ كوپ بالالى وتباسىلاردىڭ بيزنەس-جوبالارىن سۇيەمەلدەۋ مەرزىمىن ۇلعايتۋ ۇسىنىلادى (قازىر 1 جىل). بۇل تۇراقتى ءوسۋ تراەكتورياسىنا شىعۋ ءۇشىن ستارتاپ جوبالارىن بەيىمدەۋگە مۇمكىندىك بەرەدى. «كەپىل مۇلكى جانە جوعارى تابىسى جوق كوپ بالالى وتباسىلاردى قولداۋ مەملەكەتتىك گرانتتاردى ۇسىنۋ ارقىلى، وتەۋسىز جانە قايتارىمسىز نەگىزدە 200 ايلىق ەسەپتىك كورسەتكىش (505 مىڭ تەڭگە) مولشەرىندە كورسەتىلەتىن بولادى. بۇل ولارعا باستاپقى كەزەڭدە «قاراپايىم بيزنەسپەن» اينالىسۋعا مۇمكىندىك بەرەدى»، – دەپ اتاپ ءوتتى مينيستر.

سونداي-اق، باعدارلامانىڭ بيۋدجەتتىڭ ءتيىمدى شىعىندالۋىن ارتتىرۋعا باعىتتالعان مەحانيزمدەرى قايتا قارالادى. ءبىرىنشى كەزەكتە، وقىتۋ تەك جۇمىس بەرۋشىلەردىڭ ءوتىنىمى بويىنشا عانا جۇرگىزىلەتىن بولادى، باعدارلامانىڭ نىسانالى باعىتى ازاماتتاردى تۇراقتى جۇمىسپەن قامتاماسىز ەتۋگە نەگىزدەلەدى.

«8 ايدىڭ قورىتىندىسى بويىنشا باعدارلامانىڭ ىسكە اسىرىلۋ بارىسىندا مىناداي ناتيجەلەرگە قول جەتكىزىلدى. 402 مىڭنان استام ادام باعدارلاما قاتىسۋشىسى بولدى.  280 مىڭ ادام، ونىڭ ىشىندە 185 مىڭى نەمەسە 66%-ى تۇراقتى جۇمىس ورىندارىنا تۇرعىزىلدى. قىسقا مەرزىمدى كۋرستارعا 32 مىڭنان استام ادام جىبەرىلىپ، ونىڭ ىشىندە 16 مىڭى وقۋدى اياقتادى، وقۋدى اياقتاعان 6 مىڭنان (42%) استام ادام جۇمىسقا تۇرعىزىلدى. كاسىپكەرلىك نەگىزدەرىنە وقىتۋمەن 75 مىڭ ادامدى قامتۋ جوسپارلانعان بولسا، ونىڭ 33 مىڭى قامتىلدى (44%). باعدارلاماعا قاتىسۋشى 8,5 مىڭعا جۋىق ادام ميكروكرەديتتەر، ال 7 مىڭنان استام ادام گرانتتار الدى. سۋبسيديالاناتىن جۇمىس ورىندارىنا 114 مىڭنان استام ادام ورنالاستىرىلدى. شامامەن 6 مىڭ ادام نەمەسە بەلگىلەنگەن جوسپاردىڭ 62%-ى (9,6 مىڭ ادام) قونىس اۋداردى»، – دەپ حابارلادى مينيستر.

بۇل رەتتە، جەكەلەگەن باعىتتار بويىنشا كەيبىر وڭىرلەردە باعدارلامانىڭ ىسكە اسىرىلۋ قارقىنى تومەن ەكەندىگىن، سوندىقتان وڭىرلەردىڭ اكىمدەرىنەن وسى باعىتتاعى جۇمىستى كۇشەيتۋىن اتاپ ءوتتى.

سوڭعى جاڭالىقتار