12 قىركۇيەك, 12:27 279 0 زاڭ انار لەپەسوۆا

ادام زورلاعاندار ءومىر بويى تۇرمەدە وتىرۋى مۇمكىن

بالا زورلاعان قىلمىسكەر ءومىر بويى باس بوستاندىعىنان ايىرىلۋى مۇمكىن. ءتيىستى زاڭ جوباسىن ازىرلەگەن باس پروكۋراتۋرا وسىنداي ۇسىنىس جاساپ وتىر، دەپ حابارلايدى «استانا» تەلەارناسى.

قۇزىرلى ورگان ادام ۇرلاۋدان بروكونەرلىككە دەيىنگى 7 ءتۇرلى قىلمىسقا جازانى كۇشەيتپەك. بۇل تۋرالى ۆەدومستۆو باسشىسىنىڭ ورىنباسارى مارات احمەتجانوۆ ارنايى بريفينگتە ايتتى. ماسەلەن زورلىق-زومبىلىق اۋىر قىلمىستاردىڭ قاتارىنا جاتقىزىلماق. ەندى ولار 5 جىلدان 8 جىلعا دەيىن تۇرمەگە قامالۋى مۇمكىن. ال 14 جاسقا دەيىنگى بالاعا سەكسۋالدىق قىسىم كورسەتكەندەردى 20 جىلعا دەيىن نەمەسە ءومىر بويى باس بوستاندىعىنان ايىرۋدى ۇسىندى.

مارات احمەتجانوۆ، قر باس پروكۋرورىنىڭ ورىنباسارى :

– سونداي-اق، زورلىق جاساعاندار مەن پەدوفيلدەردىڭ قىلمىسىن جاسىرىپ قالعان ادامدارعا دا شارا قولدانىلادى. ونى ەندى اۋىر قىلمىس ساناتىنا كىرگىزۋدى ۇسىندىق. ونداي زاڭسىزدىققا بارعاندار 6 جىلعا دەيىن باس بوستاندىعىنان ايىرىلۋى مۇمكىن. ياعني بالالارعا ارنالعان مەكەمە باسشىلارى مەن قىزمەتكەرلەرى بالانى زورلاۋ فاكتىسىن جاسىرسا، جاۋاپقا تارتىلادى. تۋرا سونداي جازا بالانىڭ اتا-اناسىنا جانە اسىراۋشىسىنا دا قولدانىلادى. ال سەناتور مۇرات باقتيارۇلى زورلىق جاساعانداردى ءولىم جازاسىنا كەسۋدى ۇسىنىپ وتىر. دەپۋتات بالالار مەن ايەلدەرگە زومبىلىق كورسەتكەندەردىڭ ارەكەتىن اسا اۋىر قىلمىس دەپ سانايدى. ءتىپتى بۇل ماسەلەنى بىلتىر ءبىر توپ دەپۋتاتپەن كوتەرىپ، ۇسىنىس تا جاساعان. بىراق قولداۋ تاپپاعان بولاتىن.

مۇرات باقتيارۇلى، قر پارلامەنتى سەناتىنىڭ دەپۋتاتى:

– بىزدەگى قىلمىستىق كودەكس بويىنشا، وكىنىشكە قاراي، بۇلارعا بەرىلەتىن جازا ءالى دە بولسا جەڭىلدەۋ. سوندىقتان دا مەنىڭ پارلامەنت مۇشەسى رەتىندە ايتارىم، بالاعا جاسالاتىن اۋىر قىلمىستارعا، ايەل، قىز بالالارعا جاسالاتىن اۋىر قىلمىستارعا ءبىز ءولىم جازاسىن بەرۋىمىز كەرەك.

 

 

سوڭعى جاڭالىقتار