12 قىركۇيەك, 12:10 818 0 نۇر وتان Túrkistan Gazeti

"قوعام" اپتالىعى (12.09.2019)

پارتيا ءوتىنىشى بويىنشا جوعارعى سوت وكىلدەرى سوتقا جۇگىنگەندەردى قابىلدادى

«Nur Otan» پارتياسىنىڭ ءوتىنىشى بويىنشا جوعارعى سوتتىڭ توراعاسى ا. جاقىپوۆتىڭ تاپسىرماسى مەن جوعارعى سوتتىڭ وكىلدەرى نۇر-سۇلتان قالاسى مەن وڭىرلەردەن كەلگەن سوتقا جۇگىنگەندەردى قابىلدادى.

پارتيادان كومەك سۇراي كەلگەن ازاماتتاردىڭ ءبىرى – اتىراۋلىق شىنىبەك قۇشاليەۆ. اتىراۋ وبلىستىق ەكونوميكالىق سوتىنىڭ شەشىمىنە شاعىمدانىپ كەلگەن ازامات 5 ملن تەڭگە شىعىنعا باتقانىن ايتادى. ونىڭ سوزىنشە، اتقامىنەرلەر جالعان قۇجات ارقىلى ازاماتتان قوماقتى قاراجات ءوندىرىپ الىپتى. سوت شەشىمىنە نارازى كاسىپكەر 5 جىلدان بەرى ءىستىڭ اق-قاراسىن انىقتاپ بەرۋدى سۇراپ ءجۇر. ال شىنىبەك قۇشاليەۆتىڭ ارىزىن تىڭداعان جوعارعى سوت وكىلدەرى ءىستى ءادىل قاراۋعا ۋادە بەردى.

رەسپۋبليكالىق قوعامدىق قابىلداۋ بولىمىنە كەلگەندەردىڭ جارتىسىنان استامى الاياقتىق ارەكەتتىڭ قۇربانى بولعاندار. سوت وكىلدەرى دە ەلىمىزدە قىلمىستىڭ وسى ءتۇرى ازايماي وتىرعانىن راستاپ وتىر.

ايتا كەتەيىك، ماماندار ءبىر اي ىشىندە قىلمىستىق ىسكە قاتىستى 40-قا تارتا ادامنىڭ ءوتىنىشىن قابىلدايدى. سونىڭ ناتيجەسىندە ايىنا 5 ادامنىڭ ماسەلەسى وڭ شەشىمىن تابۋدا. سۋديالار قوعامدىق قابىلداۋ الاڭىندا ازاماتتارمەن جۇرگىزىلەتىن جۇمىستى ءارى قاراي جالعاستىراتىن بولادى.

ال بۇل جولى جوعارعى سوت وكىلدەرى پارتيانىڭ قوعامدىق قابىلداۋ الاڭىنا ءبىرىنشى رەت كەلدى. «سوتتىڭ شەشىمىمەن كەلىسپەۋشىلىك تانىتىپ، 27 ادام «Nur Otan» پارتياسىنا ءوزىنىڭ تالاپتارىن ايتىپ كەلگەن بولاتىن. وسىعان بايلانىستى جوعارعى سوت وكىلدەرىن ءبىزدىڭ الاڭعا شاقىرىپ، قابىلداۋ  وتكىزىپ، ۇيىمداستىرىپ جاتىرمىز»، – دەدى «Nur Otan» پارتياسى رەسپۋبليكالىق قوعامدىق قابىلداۋ بولمەسى مەڭگەرۋشىسىنىڭ ورىنباسارى ارىستانعالي سانسىزباەۆ.

پارتيا بۇعان دەيىن دە ازاماتتاردىڭ ارىزىن ەسكەرىپ، ۆەدومستۆو وكىلدەرىن قوعامدىق قابىلداۋ الاڭىنا ءجيى شاقىرادى. ماسەلەن، ەڭبەك جانە الەۋمەتتىك قورعاۋ، دەنساۋلىق ساقتاۋ جانە ىشكى ىستەر مينيسترلىگى ەكى ايدا ءبىر رەت «Nur Otan» پارتياسىنىڭ الاڭىندا حالىقپەن كەزدەسىپ، ولاردىڭ بازىناسىن تىڭدايدى.

 

نازاردان تىس قالمايدى

شىمكەنت قالاسىندا مۇمكىندىگى شەكتەۋلى ازاماتتاردىڭ وزەكتى ماسەلەلەرى تالقىلانعان جيىن ءوتتى. شارا «Nur Otan» پارتياسىنىڭ «كەدەرگىسىز كەلەشەك» جوباسى شەڭبەرىندە ۇيىمداستىرىلدى.

القالى جيىنعا «Nur Otan» پارتياسىنىڭ شىمكەنت قالالىق فيليالى توراعاسىنىڭ ءبىرىنشى ورىنباسارى باحادىر نارىمبەتوۆ، قالالىق دەنساۋلىق ساقتاۋ باسقارماسى مەن جۇمىسپەن قامتۋ جانە حالىقتى الەۋمەتتىك قورعاۋ باسقارماسىنىڭ وكىلدەرى، ءتۇرلى قوعامدىق بىرلەستىكتەردىڭ جەتەكشىلەرى مەن مۇمكىندىگى شەكتەۋلى ازاماتتار جانە ولاردىڭ اتا-انالارى قاتىستى.

جيىن بارىسىندا باحادىر نارىمبەتوۆ مۇمكىندىگى شەكتەۋلى جاندارعا ەرەكشە كوڭىل ءبولۋدىڭ ماڭىزدىلىعىن اتاپ ءوتىپ، پارتيا تاراپىنان وسى باعىتتا بارلىق قولداۋ شارالارىنىڭ جۇرگىزىلەتىنىنە توقتالدى. «پرەزيدەنت قاسىم-جومارت توقاەۆتىڭ حالىققا جولداۋىندا وتباسىندا مۇگەدەك جانداردى اسىراپ وتىرعان اتا-انالاردىڭ جاعدايىن جاقسارتۋ بويىنشا ماسەلەلەر ايتىلعان. ۇكىمەتكە وڭالتۋ ورتالىعىن كوبەيتۋگە 58 ملرد تەڭگە  قارجى بەرىلدى. ءبىزدىڭ قوعام شىن مانىندە الەۋمەتتىك جاعدايعا، اشىقتىق  قوعامعا بەت بۇرعانىن كورسەتىپ وتىر. قازىرگى تاڭدا ستاتيستيكالىق مالىمەت  بويىنشا، ەلىمىزدە 80 مىڭنان استام بالا مۇمكىندىگى شەكتەۋلى ازامات رەتىندە   تىركەلىپ تۇر. شىمكەنت قالاسىندا مۇگەدەكتىك قاتارىندا 5920 بالا بار. سول  جاندارعا ارنالعان جاڭا وڭالتۋ ورتالىقتارىن سالدىرۋ قاجەتتىلىگى تۋىنداپ  وتىر. ول جۇمىستاردى ءبىز «Nur Otan» پارتياسى تاراپىنان باقىلاۋعا الامىز. «كەدەرگىسىز كەلەشەك» پارتيالىق جوباسىنىڭ ماقساتى دا سول مۇمكىندىگى  شەكتەۋلى جاندار مەن ارنايى كوڭىل ءبولۋدى تالاپ ەتەتىن ازاماتتاردى  تولىققاندى ومىرگە بەيىمدەۋ»، – دەدى ول.

ال «سىناق» مۇمكىندىگى شەكتەۋلى جانداردى وڭالتۋ جانە ولاردى الەۋمەتتىك قۇقىقتارىن ىسكە اسىرۋىن قورعاۋ قوعامدىق بىرلەستىگىنىڭ توراعاسى مۇرات جەتپىسباەۆ مۇمكىندىگى شەكتەۋلى جاندار ءۇشىن قوعامدىق ورىندارعا كەدەرگىسىز كىرىپ-شىعۋ ماسەلەسى بويىنشا ءسوز قوزعادى. ول شىمكەنت قالاسىنداعى Shymkent Plaza ويىن-ساۋىق كەشەنىنىڭ تۇراعىنىڭ اقىلى ەكەنىن، اۋەجايدا، اۆتوۆوكزالدا، كوشەدە، الاڭداردا مۇمكىندىگى شەكتەۋلى ازاماتتاردى تاسيتىن كولىكتەرگە تۇراقتىڭ تەگىن بولۋى كەرەك ەكەنىن تىلگە تيەك ەتتى. اتالعان ماسەلەگە قاتىستى باحادىر ءمادالىۇلى ويىن-ساۋىق، ساۋدا ورتالىعىنداعى تۇراقتاردى اقىسىز ەتۋدى قالالىق ءماسليحاتتىڭ فراكتسيا مۇشەلەرىنە تاپسىراتىنىن ايتتى.

جيىن سوڭىندا پارتيالىق جوبانىڭ وزەكتى ماسەلەلەرىنە تالداۋ جۇرگىزىلىپ، ايتىلعان بارلىق ۇسىنىستى جۇزەگە اسىرۋدا قولداۋ كورسەتىلەتىنىن ايتتى.

 

ۇزدىك الەۋمەتتىك جوبالار

«ۇزدىك الەۋمەتتىك جوبالار – 2019» بايقاۋىنىڭ شىعىس قازاقستان وبلىسىنداعى جەڭىمپازدارى انىقتالدى. اۋماقتىق جانە وڭىرلىك كوميسسيالار بايقاۋدىڭ وبلىستىق كەزەڭىنە قاتىسۋعا نيەت تانىتقان 13 ءوتىنىمدى قاراپ، سونىڭ ىشىندە 4 باعىت بويىنشا ۇزدىك جوبالار ماراپاتتالدى.

جەڭىمپازداردى ماراپاتتاۋ راسىمىندە ءسوز سويلەگەن «Nur Otan» پارتياسىنىڭ شىعىس قازاقستان وبلىستىق فيليالى توراعاسىنىڭ ءبىرىنشى ورىنباسارى انۋاربەك مۇحتارحانوۆ قازاقستاندا الەۋمەتتىك جوبالاردى جۇزەگە اسىرۋدىڭ كومەگىمەن ءومىردىڭ قيىندىقتارىنا تاپ بولعان ازاماتتارعا، كومەككە ءزارۋ جاندارعا كومەك پەن قولداۋ كورسەتىلىپ جاتقانىن ايتتى.

«ۇزدىك الەۋمەتتىك جوبالار» بايقاۋى 2014 جىلدان بەرى «Nur Otan» پارتياسىنىڭ قولداۋىمەن جۇزەگە اسىرىلىپ كەلەدى. 2018 جىلدان باستاپ بايقاۋ اياسىندا مۇمكىندىگى شەكتەۋلى جاندارعا ارنالعان جوبالار ۇيىمداستىرۋعا باسا نازار اۋدارىلا باستادى. بايقاۋدىڭ نەگىزگى ماقساتى –ازاماتتاردىڭ وزدەرىنە دەگەن سەنىمدىلىگىن جانە تابىسقا جەتۋگە دەگەن ۇستانىمدارىن قالىپتاستىرۋ»، – دەدى انۋاربەك مۇحتارحانۇلى.

بايقاۋ قورىتىندىسى بويىنشا «ومىرلىك قيىن جاعدايلاردى جەڭۋگە كومەك كورسەتۋ» باعىتىندا «عاجايىپتار ەلى» وڭالتۋ جانە دامىتۋ ورتالىعىنىڭ جەتەكشىسى ليليا مامبۋروۆا جەڭىمپاز اتاندى. ال «مۇمكىندىگى شەكتەۋلى ادامداردى قوسا العاندا، ازاماتتاردى جۇمىسپەن قامتۋعا جاردەمدەسۋ» باعىتى بويىنشا «دارمەن» الەۋمەتتىك-وڭالتۋ ورتالىعى «زايسان جاستارى» قوعامدىق بىرلەستىگىنىڭ جەتەكشىسى جانسايا مۇستابەكوۆا ۇزدىك دەپ تانىلدى. «الەۋمەتتىك سالاداعى ۆولونتەرلىك قوزعالىستى دامىتۋ» باعىتى بويىنشا «وسكەمەن – اسار» اۆتوۆولونتەرلەرى جوباسىنىڭ اۆتورى اننا مازاەۆا جەڭىسكە جەتتى. «تەڭ مۇمكىندىكتەردى قامتاماسىز ەتۋ» باعىتى بويىنشا «بارلىعىنا قولجەتىمدى مەكتەپ» جوباسىنىڭ جەتەكشىسى يرينا لياحوۆسكايا ماراپاتتالدى.

«مۇمكىندىگى شەكتەۋلى ادامداردى قوسا العاندا، ازاماتتاردى جۇمىسپەن قامتۋعا جاردەمدەسۋ» باعىتى بويىنشا جوبامىزدى ۇيىمداستىرۋشى تاراپ جوعارى باعالاپ، جەڭىمپاز دەپ تانىعانى ءۇشىن قۋانىشتىمىز. وسىنداي بايقاۋلار ءبىزدىڭ جۇمىسىمىزعا تىڭ سەرپىن بەرەدى، – دەيدى «دارمەن» الەۋمەتتىك-وڭالتۋ ورتالىعى «زايسان جاستارى» قوعامدىق بىرلەستىگى جوباسىنىڭ اۆتورى جانسايا مۇستابەكوۆا. جەڭىمپازدارعا «Nur Otan» پارتياسىنىڭ شىعىس قازاقستان وبلىستىق فيليالىنىڭ اتىنان العىس حاتتار مەن باعالى سىيلىقتار تابىستالدى.

 

اۋىل گۇلدەنسە دەپ...

قوستاناي وبلىسىندا «اۋىل – ەل بەسىگى» مەملەكەتتىك باعدارلاماسىنىڭ ورىندالۋ بارىسى تالقىلاندى. بۇل جيىن وبلىس اكىمى ارحيمەد مۇحامبەتوۆتىڭ توراعالىعىمەن ءوتتى.

جيىن بارىسىندا ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلبارام مۇساعازينا «اۋىل – ەل بەسىگى» جوباسىن ىسكە اسىرۋ تۋرالى باياندادى. «ەلباسى «Nur Otan» پارتياسىنىڭ XVIII سەزىندە «اۋىل – ەل بەسىگى» جوباسىن ىسكە اسىرۋ تۋرالى ايتقان ەدى. جوبانىڭ باستى ماقساتى – اۋىلدىق جەرلەردە ءومىر ءسۇرۋ ساپاسىن جاقسارتۋ، اۋىلدىق وكرۋگتەردىڭ الەۋمەتتىك ورتاسىن جاڭعىرتۋ. وسى ماقساتتارعا 2019 جىلى رەسپۋبليكالىق بيۋدجەتتەن 30 ملرد تەڭگە بولىنگەن بولاتىن. جوبانى جۇزەگە اسىرۋدىڭ العاشقى جىلىندا ءىرى ەلدىمەكەندەرگە باسا نازار اۋدارىلدى. جوباعا بەس اۋدان ورتالىعى قاتىسادى. اتاپ ايتقاندا، وڭىردەگى 548 اۋىلدىڭ ىشىندە 41 مىڭنان استام ادام تۇراتىن اۋليەكول، قاراسۋ، بوروۆسكوە، سارىكول جانە فەدوروۆ اۋىلدارى وسى تىزىمگە ەنىپ وتىر»، – دەدى گۇلبارام مۇساعازينا.

القالى جيىندا بەلگىلى بولعانداي، بيىل جوبا اياسىندا 2,3 ملرد تەڭگەگە باعالانعان 46 جوبا جۇزەگە اسىرىلادى. بۇل – مەكتەپتەردى، مەكتەپ جانىنداعى ينتەرناتتاردى، بالاباقشالاردى، قوسىمشا ءبىلىم بەرۋ ۇيىمدارىن، مادەنيەت ۇيلەرىن، كىتاپحانالاردى، ستاديونداردى، اۋداندىق اۋرۋحانالار مەن ەمحانالاردى كۇردەلى جانە اعىمداعى جوندەۋ، سونداي-اق كەنتىشىلىك جولداردى ورتاشا جوندەۋ سىندى جوبالار. جۇمىستاردىڭ بارلىعىن تامىز ايىنان قاراشا ايىنا دەيىن اياقتاۋ قاراستىرىلىپ وتىر. بۇگىنگە دەيىن 15 جوبا تولىعىمەن تامامدالعان. 31 جوبا بويىنشا جوندەۋ جۇمىستارى جالعاسۋدا.

سەلەكتورلىق وتىرىستا سارىكول، قاراسۋ، مەڭدىقارا اۋداندارى اكىمدەرىنىڭ اتقارىلعان جۇمىس بارىسى تۋرالى ەسەپتەرى تىڭدالدى. ءوڭىر باسشىسى دەنيسوۆ، قامىستى، قارابالىق، ناۋرىزىم، التىنسارين، بەيىمبەت مايلين جانە ۇزىنكول اۋداندارىنىڭ اكىمدەرىنە ءبىر اپتا ىشىندە وبلىستىق ەكونوميكا جانە بيۋدجەتتىك جوسپارلاۋ باسقارماسىنا ءتيىستى نىسانالى ءىس-شارالارعا جانە 2020 جىلعا جوسپارلانعان جوبالارعا ارنالعان قۇجاتتامانى ازىرلەپ، تاپسىرۋدى جۇكتەدى.

 

 

جاستار باس قوسقان جيىن

«بالداۋرەن» رەسپۋبليكالىق وقۋ-ساۋىقتىرۋ ورتالىعىندا «Jastar – Otanga!» رەسپۋبليكالىق جاستار ساياسي لاگەرىنىڭ قاتىسۋشىلارى باس قوستى.

سالتاناتتى شارادا «Nur Otan» پارتياسى ساياسي كەڭەسى بيۋروسىنىڭ مۇشەسى، Jas Otan جاستار قاناتىنىڭ توراعاسى داۋلەت كارىبەك ءسوز سويلەپ، جاستار پرەزيدەنت قاسىم-جومارت توقاەۆتىڭ قازاقستان حالقىنا ارناعان «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىن زور ىقىلاسپەن قابىلداعانىن ايتتى. «ەلباسى نۇرسۇلتان نازارباەۆ «سەنىم. ديالوگ. بولاشاققا نىق قادام – «Nur Otan» پارتياسىنىڭ 7 سەرپىنى» اتتى پارتيا جۇمىسىن جۇيەلى جاڭعىرتۋ باعدارلاماسىندا جاستارعا ەرەكشە كوڭىل بولگەنى بارىمىزگە بەلگىلى. اسىرەسە، پارتيا توڭىرەگىنە جاستاردى بىرىكتىرۋ ءۇشىن شارالار قابىلداۋدى تاپسىردى. بۇل ەلىمىزدىڭ بارلىق جاستارىن ءبىر سەرپىلتىپ، ولاردىڭ بويىنا جىگەر سىيلادى. «Jastar – Otanga!» ساياسي لاگەرىنىڭ نەگىزگى ماقساتى – جاستار ساياسي رەزەرۆىن قۇرۋ، بەلسەندى جاستاردى قولداۋ، ەل كەلەشەگىن دارىپتەۋ ەكەنىن ايتا كەتكەن ءجون. لاگەردەگى اسەرگە تولى كۇندەر جاستارعا جاڭا كۇش-قۋات بەرىپ، بولاشاققا قويعان ماقساتتارىن، جوبالارىن جۇزەگە اسىرۋعا مۇمكىندىك بەرەدى. وسى ورايدا لاگەر جاستاردىڭ باسىن ءبىر ارناعا توعىستىرىپ، ءبىلىمىن شىڭداپ، ولاردىڭ ءبىر-بىرىمەن بايلانىس ورناتۋىنا سەبەپكەر بولىپ وتىر. ءبىر سوزبەن ايتقاندا، بۇل الاڭ جاڭا يدەيالار مەن جوبالاردىڭ تۋىنا ەرەكشە جاعداي جاسايدى»، – دەدى داۋلەت كارىبەك.

ءبىر اپتاعا سوزىلاتىن شارا بارىسىندا جاستار بىلىكتى، تاجىريبەلى باپكەرلەردىڭ ءدارىسىن تىڭداپ، ءبىلىمىن شىڭدايدى. ساياسي مەنەدجمەنت، جوبالاردى ۇيىمداستىرۋ سەكىلدى تاقىرىپتارعا ءتۇرلى ترەنينگتەرگە، سەمينارلارعا، ترەند سەسسيالارعا، ۋوركشوپتارعا قاتىسادى.

«Jastar – Otanga!» رەسپۋبليكالىق جاستار ساياسي لاگەرىنىڭ قاتىسۋشىلارى شارا اياسىندا تاجىريبە الماسىپ قانا قويماي، تاۋعا سەرۋەندەۋ، كينوكەشى، الاۋ جانىنداعى كەزدەسۋلەر، سپورتتىق جارىستار، زياتكەرلىك كۆەست سەكىلدى قىزىقتى ءىس-شارالارعا قاتىسادى. لاگەر اياسىندا «Jas Otan» جاستار قاناتىنىڭ ورتالىق كەڭەس وتىرىسى وتەدى. كەڭەستىڭ سايلانعان مۇشەلەرى مەن ءوڭىر توراعالارى اۋىل جاستارىنا ارنالعان الەۋمەتتىك ليفت، جەرگىلىكتى جەرلەردە جاستار مەملەكەتتىك باعدارلامالارىن ىسكە اسىرۋ، ەلىمىزدىڭ وقۋ ورىندارىندا سىبايلاس جەمقورلىقتى جويۋ تەتىكتەرى سىندى تاقىرىپتاردى تالقىلايدى.

 

نيەت بولسا، مۇمكىندىك مول

سولتۇستىك قازاقستان وبلىسىندا «جاس كاسىپكەر» پيلوتتىق جوباسى بويىنشا 600 ادام كاسىپكەرلىك نەگىزىمەن تانىسۋعا مۇمكىندىك الدى. شارا سوڭىندا ولار بيزنەس-جوبالارىن قورعاپ، يدەيالارىن ورتاعا سالدى. جوبالارىن ءساتتى قورعاعان كۋرسانتتار 200 اەك مولشەرىندە گرانت الۋ ءۇشىن ءوتىنىش بەرە الادى.

پەتروپاۆل قالاسىنىڭ تۇرعىنى گري­گوري روديونوۆ بولاشاقتا مەتالل بۇيىمدارىن جاساۋعا نيەتتى. ول ءوز ءىسىن اشۋدى جوسپارلاپ وتىر. گرانت ۇتىپ العان جاعدايدا اقشانى قوندىرعى ساتىپ الۋعا جۇمسايدى. 28 جاستاعى قايرات جۇمادي پەتروپاۆلدا ەمدەۋ-وڭالتۋ ورتالىعىن اشپاقشى. ويىن جۇزەگە اسىرۋ ءۇشىن گرانتتان بولەك نەسيە الماق. «قازىر بۋىنى سىرقىراپ، ومىرتقا جوتاسى اۋىراتىندار وتە كوپ. قالادا ارنايى ترەناجەرلارى بار ورتالىق ساناۋلى عانا. سوندىقتان مەنىڭ ەمدەۋ-وڭالتۋ ورتالىعىما سۇرانىستىڭ جوعارى بولاتىنىنا سەنىمدىمىن. مەديتسينالىق ءبىلىمىم بار. ەندى ارنايى ترەناجەرلاردى ساتىپ الۋ قاجەت. «جاس كاسىپكەر» باعدارلاماسى ارقىلى كوپتەن بەرى ارمانداعان جۇمىسىمدى جۇزەگە اسىرماقشىمىن»، – دەيدى قايرات جۇمادي.

سولتۇستىك قازاقستان وبلىسىندا «جاس كاسىپكەر» باعدارلاماسى بويىنشا ەكى لەكتە 600 ادام ءبىلىم الدى. ولاردىڭ 70-ىنە العاشقى گرانتتار – 200 اەك نەمەسە 505 مىڭ تەڭگە ءبولىندى. قالعاندارىنىڭ ءوتىنىشى ايدىڭ سوڭىنا دەيىن قارالادى.

ايتا كەتەيىك، «جاس كاسىپكەر» جوباسىندا وقىتۋدىڭ قۇرامداس بولىكتەرى قامتىلىپ، ءار ستارتاپتى تانىمال بيزنەس-ترەنەردىڭ جەكە سۇيەمەلدەۋى قاراستىرىلعان. وسى جوبا ارقىلى جاستار ىسكەرلىك بويىنشا جاڭا ءبىلىم مەن داعدىلاردى مەڭگەرىپ، وزدەرىنىڭ جەكە كاسىبىن اشا الادى. جوباعا قاتىسقان جاستار بيزنەس اشۋعا العاشقى كاپيتال رەتىندە گرانت نەمەسە جەڭىلدىكپەن قارجىلاندىرۋعا مۇمكىندىك الادى.

 

سوڭعى جاڭالىقتار