12 قىركۇيەك 2019, 11:57 550 0 جاڭالىقتار اسەل انۋاربەك

«حالىق داڭعازا اڭگىمەگە ەرمەۋى قاجەت»

وتكەن اپتادا نۇر-سۇلتان قالاسىنداعى تاۋەلسىزدىك سارايىندا مەملەكەت باسشىسى قاسىم-جومارت توقاەۆتىڭ قاتىسۋىمەن ۇلتتىق قوعامدىق سەنىم كەڭەسىنىڭ العاشقى وتىرىسى ءوتتى.

مەملەكەت باسشىسى ق.توقاەۆ: «سوڭعى ۋاقىتتا «جەر شەتەلدىكتەرگە ساتىلادى ەكەن» نەمەسە «كورشى ەلدىڭ 55 ەسكى زاۋىتى كوشىرىلەدى»، «مىڭداعان شەتەلدىك جۇمىسكەرلەر تارتىلادى ەكەن» دەگەن سياقتى ءتۇرلى قاۋەسەت اڭگىمەلەر تاراپ ءجۇر. حالقىمىز مۇنداي داڭعازا اڭگىمەلەرگە ەرمەۋى قاجەت. وزدەرىنىڭ كوزدەگەن ماقساتتارىنا جەتۋ ءۇشىن جۇرتتىڭ پاتريوتتىق سەزىمدەرىن ءوز مۇددەلەرى ءۇشىن پايدالانا بىلەتىن ادامدار وسىنداي الىپ-قاشپا اڭگىمەلەردى شىعارىپ ءجۇر. بيلىكتىڭ مىندەتى – قوعاممەن ديالوگ جۇرگىزۋ ارقىلى مەملەكەتتىك ساياساتتىڭ ماقساتىن ءتۇسىندىرۋ. مەن جەردى ەشكىمگە بەرمەيتىنىمىزدى تاعى دا ايتقىم كەلەدى»، – دەدى. سونىمەن قاتار، پرەزيدەنت ساياسي جۇيەنى جاڭعىرتۋدى جانە كىرىستەردىڭ ءادىل ءبولىنۋىن قامتاماسىز ەتۋى ءتيىس الەۋمەتتىك ساياساتتى قايتا قاراۋ ءىسىن جالعاستىرۋ قاجەتتىگىن ايتتى.

ادام كاپيتالىن دامىتۋ جايىندا ءسوز قوزعاعان ساياساتتانۋشى ساياسات نۇربەك ەڭ الدىمەن ءبىلىم الۋ جانە ەڭبەك ەتۋ ماسەلەسىنە توقتالدى. «ءبىرىنشى ماسەلە: بىلىمگە دەگەن جاپپاي سۇرانىس جوق. جالپى ىشكى ءونىمنىڭ ازايىپ  كەتكەنىنە قاراماستان، ءبىز­دە ءتيىمسىز جۇمىس ورىندارى ساقتالعان. ءبىلىم بەرۋ  جۇيەسى ءبىلىم ەكونوميكاسىنىڭ ماماندارىن ءالى كۇنگە دايىنداماي وتىر.  جوعارى ءبىلىمنىڭ بۇقارالىق سيپات الىپ كەتكەنىن قاسىم-جومارت كەمەلۇلى ءوزىنىڭ جولداۋىندا دا كوتەردى. جوعارى ءبىلىمنىڭ بۇل ماسەلەسىنە ەندى عانا  جۇيەلى قاراپ جاتىرمىز. سويتە تۇرا، ءبىلىم بەرۋ جۇيەسى بيزنەسكە قۇلاق   اسپايدى. جۇمىس بەرۋشىلەردىڭ 91 پايىزى تۇلەكتەردىڭ پراكتيكالىق ءبىلىمى  مەن ماشىعى جوق ەكەنىن ايتادى. ديپلوم يەلەرىنىڭ جارتىسىنا جۋىعى ءوز  ماماندىعى بويىنشا جۇمىس ىستەمەيدى. 25 جاستان كەيىن ءبىزدىڭ ادامدار ءبىلىم  الۋدى توقتاتادى. بىلىكتىلىگىن ارتتىرۋعا زەر سالمايدى. «ەڭبەك كەدەيلىگى» دەگەن تۇسىنىك قالىپتاستى. مىسالى، بىزدە دارىگەر مەن كولىك جۇرگىزۋشىسىنىڭ  ايلىقتارىنداعى ايىرماشىلىق 20 پايىزدان اسپايدى. ال اقش-تا بۇل   كورسەتكىش – 260, گەرمانيادا – 174, برا­زي­ليا­دا – 172 پايىز. وسىلايشا، نەعۇرلىم جوعارى بىلىكتى، شىعىنى ەلەۋلى ماماندىقتارعا سۇرانىس بايقالماي وتىر. بۇل – وتە كۇردەلى ماسەلە»، – دەپ اتاپ ءوتتى ساياسات  نۇربەك.

مەملەكەت باسشىسىنىڭ ۇلىتاۋعا جاساعان ساپارىنىڭ تاريحي ماڭىزدىلىعىنا اقىن قازىبەك يسا توقتالدى. تاياۋدا ۇلت تاريحىنداعى ۇلىتاۋعا قاسىم-جومارت توقاەۆ قازاقستان پرەزيدەنتى رەتىندە تۇڭعىش ساپار جاساپ، زيارات ەتىپ قايتتى. ەۋرازيا كەڭىستىگىندە ەرەكشە زور الىپ يمپەريا التىن وردانىڭ 750 جىلدىعىن مەرەكەلەۋ تۋرالى باس­تاما كوتەرگەن مەملەكەت باسشىسى: «شىڭعىس حاننىڭ ۇلكەن ۇلى جوشىنىڭ مازارى قازاق جەرىندە تۇرعانىن بۇگىندە ەلىمىزدە جانە شەتەلدەگى جۇرتشىلىقتىڭ كوپشىلىگى بىلە بەرمەيدى. ونىڭ تاريحي تۇلعاسىنا الەمنىڭ نازارىن اۋدارىپ، كەسەنەسىن مادەني تۋريزم نىسانىنا اينالدىرۋ وتە ماڭىزدى مىندەت» دەپ اتاپ ءوتتى. مەملەكەت باسشىسىنىڭ ۇلىتاۋ ساپارى مەن ۇلاعاتتى سوزدەرى رۋحىمىزدى كوتەرىپ، ەڭسەمىزدى بيىكتەتتى. ءيا، التىن وردانىڭ اتاسى جوشى حاننىڭ تۇلعاسىن ساقتاۋ تۇگەل تۇركى جۇرتىنا ورتاق ءىس»، – دەدى قازىبەك يسا.

ايتا كەتەيىك، ۇلتتىق قوعامدىق سەنىم كەڭەسى ءۇش توپقا ءبولىنىپ جۇمىس ىستەيدى. ەكونوميكالىق، الەۋمەتتىك جانە ساياسي جاڭعىرۋ توپتارى ەلدىڭ سوزىنە قۇلاق اسىپ، ول ۇسىنىستى قوعامدىق سەنىم كەڭەسىنىڭ وتىرىسىنا شىعارادى. كەشەگى وتكەن العاشقى وتىرىستىڭ وزىندە قوعامدا قوردالانعان بىرقاتار ماسەلەلەر ورتاعا سالىندى. ەندى كەڭەس مۇشەلەرى كوشپەلى وتىرىس­تار وتكىزۋگە نيەتتى. العاشقى وتىرىس ايماعى ارىس بولىپ بەكىتىلدى. ال ۇلتتىق قوعامدىق سەنىم كەڭەسىنىڭ ەكىنشى وتىرىسى 3 ايدان كەيىن ۇيىمداستىرىلاتىن بولادى.

 

اسەل انۋاربەك

سوڭعى جاڭالىقتار