12 قىركۇيەك 2019, 11:24 538 0 جاڭالىقتار Túrkistan Gazeti

مەملەكەت باسشىسى قحر بۇكىلقىتايلىق حالىق وكىلدەرى جيىنى تۇراقتى كوميتەتىنىڭ توراعاسىمەن كەزدەستى

كەزدەسۋ بارىسىندا قازاقستان مەن قىتايدىڭ پارلامەنتارالىق ىنتىماقتاستىعى جايى تالقىلاندى. ەكى تاراپتا اتالمىش قارىم-قاتىناستىڭ جۇمىسىن وڭ باعالادى. بۇل تۋرالى اقوردانىڭ ءباسپاسوز قىزمەتى حابارلادى.

قاسىم-جومارت توقاەۆ لي چجانشۋدى قحر-دىڭ 70 جىلدىق مەرەكەسىمەن قۇتتىقتاپ، قىتايعا مەملەكەتتىك ساپارى بارىسىندا جاسالعان ءوزارا ءتيىمدى ۋاعدالاستىقتار جونىندە ايتتى.

– كەشەگى كەلىسسوزدەر ءساتتى ءوتتى. قىتاي قازاقستاننىڭ ۇلكەن كورشىسى. سوندىقتان ءبىز ەكى ەل اراسىنداعى جان-جاقتى ىنتىماقتاستىعىمىزدى ەسكەرە وتىرىپ، توراعا سي تسزينپينمەن بىرلەسكەن مالىمدەمەگە قول قويدىق. وندا ءبىزدىڭ ارىپتەستىگىمىز ستراتەگيالىق جانە ۇزاق مەرزىمدى مانگە يە ەكەنى كورسەتىلگەن. بۇل ساپارىمنىڭ قورىتىندىلارىنا قاناعاتتانۋعا بارلىق نەگىز بار،– دەدى پرەزيدەنت.

مەملەكەت باسشىسى ەكى ەلدىڭ پارلامەنتارالىق قارىم-قاتىناستارىن ودان ءارى نىعايتۋ پەرسپەكتيۆالارى تۋرالى ايتا كەلىپ، وسى جىلدىڭ قىركۇيەگىندە نۇر-سۇلتان قالاسىندا وتەتىن ەۋرازيا پارلامەنتتەرى سپيكەرلەرى IV كەڭەسىنىڭ ماڭىزدىلىعىن دا اتاپ ءوتتى.

– ءسىزدىڭ قازاقستانعا ءۇش رەت كەلگەنىڭىزدى بىلەمىن. جاقىن ارادا ءسىز قازاقستانعا قايتا باراسىز. بىراق بۇل ساپارىڭىز بۇكىلقىتايلىق حالىق وكىلدەرى جيىنى تۇراقتى كوميتەتىنىڭ توراعاسى رەتىندە بولاتىندىقتان، ونىڭ ءجونى دە بولەك بولماق. ءبىز ءسىزدىڭ ساپارىڭىزدى زور ىقىلاسپەن كۇتەمىز،– دەدى قاسىم-جومارت توقاەۆ.

لي چجانشۋ قاسىم-جومارت توقاەۆتىڭ قازاقستان-قىتاي قارىم-قاتىناستارىن دامىتۋعا قوسقان ەلەۋلى ۇلەسىن اتاپ ءوتىپ، ونىڭ سي تسزينپينمەن كەلىسسوزدەرىنىڭ ناتيجەلى وتكەنىنە توقتالدى.

– كەشە ءسىز بەن توراعا سي ءتسزينپيننىڭ اراسىندا سەنىمدى ءارى جەمىستى كەلىسسوزدەر بولدى. كەڭ اۋقىمدى ماسەلەلەر بويىنشا پىكىر الماسۋلار ءوتتى. سونىڭ ناتيجەسىندە بىرلەسكەن مالىمدەمەگە قول قويىلدى. وندا ەكى كوشباسشى دا تاراپتار ستراتەگيالىق ارىپتەستىكتى دامىتادى دەپ مالىمدەدى. وسىلايشا، ءسىزدىڭ قىتايعا ساپارىڭىز ۇلكەن جەتىستىكپەن اياقتالدى. ال قازاقستان-قىتاي قارىم-قاتىناسى جاڭا تاريحي كەزەڭگە ءوتتى،– دەدى لي چجانشۋ.

سوڭعى جاڭالىقتار