11 قىركۇيەك, 15:28 257 0 جاڭالىقتار Túrkistan Gazeti

قاسىم-جومارت توقاەۆ قحر ىسكەرلىك ورتا وكىلدەرىمەن كەزدەستى

ىسكەرلىك ورتامەن جيىننىڭ اشىلۋىندا پرەزيدەنت قاسىم-جومارت توقاەۆ  قازاقستان مەن قىتايدىڭ 27 جىلدىق ىنتىماقتاستىعىنىڭ ناتيجەسىندە ەكى ەل اراسىندا قارىم-قاتىناس نىعايىپ، جان-جاقتى ستراتەگيالىق ارىپتەستىك قالىپتاسقانىن ايتتى. بۇعان ەكى ەلدىڭ جوعارى دەڭگەيدە سەنىمدى ديالوگ ورناتۋى نەگىز بولعانىن دا تىلگە تيەك ەتتى. قاسىم-جومارت توقاەۆ ءوز سوزىندە ەكى مەملەكەت اراسىنداعى بايلانىستىڭ نىعايۋىنا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ پەن قحر توراعاسى سي ءتسزينپيننىڭ دوستىعى زور ۇلەس قوسقانىن دا باسا اتاپ ءوتتى.

پرەزيدەنت قازاقستان مەن قىتايدىڭ ەكونوميكالىق ىنتىماقتاستىعىنىڭ بولاشاعى زور دەپ ەسەپتەيدى. ەكى جاقتى ارىپتەستىكتىڭ باسىم باعىتتارىن اتاپ وتكەن مەملەكەت باسشىسى ەكى ەلدىڭ بيزنەس-وكىلدەرى بولاشاقتا اتقاراتىن جاڭا مىندەتتەرگە دە توقتالدى.

اتاپ ايتقاندا، قاسىم-جومارت توقاەۆ الداعى ۋاقىتتا يننوۆاتسيالىق جانە عىلىمي-تەحنيكالىق باعىتتارعا زور ىقىلاس ءبولۋ كەرەكتىگىنە توقتالدى. سونداي-اق، ول اتالعان باعىتتاردا قازاقستان قىتايمەن بىرلەسىپ جۇمىس ىستەۋگە دايىن ەكەنىن دە جەتكىزدى.

پرەزيدەنت تۋريزم سالاسى بويىنشا دا وي قوزعاپ، ءوزارا ىسكەرلىك بايلانىس پەن رەكرەاتسيالىق تۋريزم ۇلكەن قارقىنمەن دامىپ جاتقان قازاقستانعا قىتايلىق تۋريستەرىن تارتۋعا دا مول مۇمكىندىك بارىن ايتتى. وسى رەتتە مەملەكەت باسشىسى كورشى ەلدىڭ ىسكەرلىك ورتاسىن قازاقستاندا قىتايلىق 5ا ستاندارتتارىنا سايكەس تۋريستىك ورتالىقتار سالۋعا شاقىردى.

قاسىم-جومارت توقاەۆ قازاقستان مەن قىتاي اراسىنداعى قارجى سالاسىنداعى قارىم-قاتىناستىڭ مۇمكىندىگى زور ەكەنىنە توقتالدى. بۇل ماسەلەدە «استانا» حالىقارالىق قارجى ورتالىعىنىڭ ماڭىزدى ءرول اتقاراتىنىن ەسكە سالدى. پرەزيدەنت «استانا» حقو بازاسىندا RMB Connect مەحانيزمى قۇرىلاتىنىن جەتىزدى.

– RMB Connect جوباسى يۋانمەن ينۆەستيتسيالار سالۋعا مۇمكىندىك بەرەدى. جاڭا ەكوجۇيە قىتاي ءيۋانىنىڭ الەمگە تارالۋىنا ەلەۋلى ۇلەس قوساتىنىنا جانە قازاقستان كاسىپورىندارى مەن وڭىردەگى وزگە ەلدەر ءۇشىن يۋانمەن وپەراتسيا جاساۋ بويىنشا جاڭا ەسەپ ايىرىسۋ-كليرينگ ورتالىعىنا اينالاتىنىنا سەنىمدىمىن،–  دەدى مەملەكەت باسشىسى.

ءسوز سوڭىندا قاسىم-جومارت توقاەۆ قازىرگى جاعدايدا «بيزنەسكە ارنالعان ۇكىمەت» (Government to Business) فورماتىنداعى ءوزارا ءىس-قيمىل ىسكەرلىك ىنتىماقتاستىقتى جانداندىرۋدىڭ پارمەندى قۇرالدارىنىڭ ءبىرى بولىپ تابىلاتىنىن اتاپ ءوتتى.

پرەزيدەنت ايتقانداي، بۇل كەزدەسۋ قازاقستان مەن قىتايدىڭ ساۋدا-ەكونوميكالىق ارىپتەستىگىن تەرەڭدەتۋگە ناقتى قادام بولادى.

دوڭگەلەك ۇستەل بارىسىندا ءىرى قىتاي كومپانيالارىنىڭ وكىلدەرى، ونىڭ ىشىندە «China General Technology (Group) Holding Co.، Ltd» باس ديرەكتورى لۋ يمين، قىتاي ەكسپورت-يمپورت بانكىنىڭ ۆيتسە-پرەزيدەنتى نين يۋن، قىتاي-ەۋرازيالىق ەكونوميكالىق ىنتىماقتاستىق قورىنىڭ باسقارما توراعاسى چجان شيلي، «China Construction Bank» باقىلاۋ كەڭەسىنىڭ توراعاسى ۆان يۋنتسين، «COFCO Group» ۆيتسە-پرەزيدەنتى لۋان جيچەن، «Anhui Jianghuai Automobile Co.، Ltd» ان تسزين جانە باسقالار ءسوز سويلەدى.

سوڭعى جاڭالىقتار