9 قىركۇيەك, 17:17 200 0 ەكونوميكا Túrkistan Gazeti

ەربولات دوساەۆ: ۇلتتىق بانك ەكى جىلدان سوڭ ەلورداعا كوشەدى

ۇلتتىق بانك باسشىسى ەربولات دوساەۆ ۇلتتىق بانكتى ەلورداعا كوشىرۋگە قاتىستى پىكىر ءبىلدىردى. 

«بۇل تاقىرىپ بىرنەشە جىلدان بەرى تالقىلانىپ كەلەدى. بانكتىڭ نۇر-سۇلتان قالاسىنا قونىس اۋداراتىن مەرزىمىنە قاتىستى مەملەكەت باسشىسى شەشىم شىعاردى. ۇلتتىق بانكتى قايتا قۇرۋ كەزىندە دەربەس ورتالىق مەملەكەتتىك ينستيتۋت رەتىندە ءبولىنىپ شىعاتىن، پرەزيدەنتكە تىكەلەي باعىنىشتى بولاتىن قارجىلىق نارىقتى رەتتەۋ مەن دامىتۋ اگەنتتىگى الماتىدا قالادى دەپ ايتا الامىن. قارجىلىق نارىقتىڭ دامۋىنا جاۋاپ بەرەتىن تاريحي ستاتۋسى بار رەتتەۋشى قارجىلىق ينستيتۋتتارعا جاقىن بولعانى دۇرىس. الماتىنىڭ قارجىلىق ورتالىق رەتىندە مارتەبەسى جوعالمايتىنىنا سەنىمدىمىن»، - دەدى دوساەۆ.

ول باسقا بانكتەر دە وزدەرىنىڭ باستى وفيستەرىن نۇر-سۇلتان قالاسىنا جاپپاي كوشىرەتىن تەندەنتسيا بايقامايتىنىن ايتتى. ءتىپتى First Heartland Jýsan Bank بىرىگۋىنەن سوڭ باستى ءوفيسىن الماتىعا كوشىرىپ جاتىر.

«قازاقستان ۇلتتىق بانكىنىڭ ەنشىلەس ۇيىمدارى الماتىدا قالادى. بۇل كەرىسىنشە الماتىنىڭ دامۋىنا جاڭا سەرپىن بەرمەك. ۇلتتىق بانكتىڭ اقشا نەسيە ساياساتىن جۇزەگە اسىرۋ ءۇشىن جاڭا كوممۋنيكاتسيالىق جاعدايلار جاسالۋى مۇمكىن. ساراپشىلاردىڭ مالىمدەۋىنشە، ەۆرووداقتا 90% جانە 95% جاعدايدا ورتالىق بانكتەر استانالاردا ورنالاسقان»، - دەدى ۇلتتىق بانك باسشىسى.

باس بانكير قارجىلىق سەكتور مەن بيزنەس وكىلدەرىن الماتى قالاسى ۇلتتىق بانك نازارىندا بولادى دەپ سەندىردى.

«قازاقستان تاۋەلسىزدىگىنىڭ 30 جىلدىعىنا وراي، ياعني 2 جىلدان سوڭ ۇلتتىق بانك ەلىمىزدىڭ باس قالاسىنا كوشۋى كەرەك. شامامەن كەلەسى جىلى استاناعا كوشەمىز»، -  دەدى ە.دوساەۆ.

سوڭعى جاڭالىقتار