9 قىركۇيەك, 16:27 187 0 جاڭالىقتار Túrkistan Gazeti

فريستايلدان وليمپيادا چەمپيونى قازاقستان اكروباتتارىنىڭ كەڭەسشىسى بولىپ تاعايىندالدى

بۇگىن قازاقستان ۇوك-تىڭ شتاب-پاتەرىندە فريستايل-اكروباتيكادان ۇلتتىق قۇرامانىڭ جاڭا كەڭەسشى-جاتتىقتىرۋشىسى انتون كۋشنير رەسمي تۇردە تانىستىرىلدى. 35 جاستاعى بەلارۋس مامانى، 2014 جىلعى سوچي وليمپياداسىنىڭ چەمپيونى قازاقستاندىق اكروباتتاردى جاتتىقتىرۋعا كومەكتەسەدى دەپ حابارلايدى Olympic.kz. 

قازاقستان ۇوك باس حاتشىسى ساكەن مۇسايبەكوۆ جاڭا كەڭەسشى-جاتتىقتىرۋشىنى تانىستىرا وتىرىپ، ونىڭ تاجىريبەسى مەن سپورتشى رەتىندەگى تابىستى مانسابى تەك وتاندىق سپورتشىلارعا عانا ەمەس، سونىمەن بىرگە، قازاقستاندىق جاس باپكەرلەرگە دا پايداسىن تيگىزەدى دەپ اتاپ ءوتتى.

انتون كۋشنيردىڭ سپورتتىق مانسابىندا وليمپيادا التىنىنان باسقا الەم كۋبوگى دا (2009/2010) بار. سونداي-اق، ول الەم كۋبوگىنىڭ (2007/2008) جانە الەم چەمپيوناتىنىڭ (2011) قولا جۇلدەگەرى اتانعان. ايتا كەتەرلىگى، ول وليمپيادا ويىندارىندا شاڭعى اكروباتيكاسىنداعى ەڭ قيىن جاتتىعۋدى ورىنداعان. قيىندىعى 5,0 كوەفيتسەنتتى بەس پيرۋەتپەن ءۇش ەسە سەكىرىپ، 134,5 ۇپايىن ەنشىلەگەن. بۇل ناتيجە وليمپيادادا ءبىر سەكىرۋدە جينالعان ەڭ جوعارى ۇپاي بولدى.

«شىلدە ايىندا ءوزىمنىڭ سپورتتىق مانسابىمدى اياقتاۋ تۋرالى شەشىم قابىلدادىم. سپورتشى رەتىندە مەن سپورتقا 27 جىلىمدى ارنادىم. ءوز تاجىريبەمدى سپورتشىلارمەن ءبولىسىپ، باپكەرلەر قۇرامىنا، جاتتىقتىرۋشىلارعا  سپورتشىنى دايىنداۋعا كومەكتەسۋگە دايىن ەكەنىمدى  بايقادىم. سوندىقتان مەن قازاقستان قۇراماسىنىڭ ۇسىنىسىن قابىلداپ، بىرگە جۇمىس ىستەۋگە قۋانا كەلىستىم. مەنىڭ مۇنداعى باستى مىندەتىم، ارينە، سپورتشىلاردىڭ ناتيجەسىن جاقسارتۋ، سونىمەن قاتار، جاتتىقتىرۋشىلارعا كەڭەسشى رەتىندە كومەكتەسۋ. جۇمىس بارىسىندا گەننادي نيكولاەۆيچ سىندى بىلىكتى باپكەردەن مەنىڭ دە الارىم كوپ دەپ ويلايمىن. قازاقستان ۇوك-نە سەنىم ارتقانى ءۇشىن ۇلكەن العىس بىلدىرەمىن. ەندى سەنىمدى اقتاۋ ءۇشىن بارىمدى سالاتىن بولامىن»،-دەيدى انتون كۋشنير.

انتون كۋشنير ۋكراينادا دۇنيەگە كەلگەن، الايدا سپورتتا بەلارۋس ەلىنىڭ نامىسىن قورعاپ، تۋىن جەلبىرەتكەن. ءتورت وليمپياداعا قاتىسقان ول بۇگىندە سپورتشى رەتىندە مانسابىن اياقتاپ وتىر. جاتتىقتىرۋشى رەتىندە قىزمەتىن قازاقستان ۇلتتىق قۇراماسىنان باستايدى.

اكروباتتاردىڭ ماۋسىمى 21 جەلتوقساندا قىتايدا وتەتىن الەم كۋبوگىنىڭ ءبىرىنشى كەزەڭىنەن باستالادى. جاڭا ماۋسىمدا قازاقستان قۇراماسىندا كوماندا كوشباسشىسى جانبوتا الدابەرگەنوۆامەن بىرگە 6 سپورتشى بار. وتكەن ماۋسىمدا جانبوتا ۋنيۆەرسيادادا ءۇشىنشى ورىن الىپ، 2019 جىلعى الەم بىرىنشىلىگىندە توعىزىنشى ورىننان كورىنگەن بولاتىن.

فريستايل-اكروباتيكادان قازاقستان قۇراماسىنىڭ ءتىزىمى: اقمارجان قالمۇرزاەۆا، ىڭكاربەك باعلان، ەلدار بادرۋتدينوۆ، رومان يۆانوۆ، ايانا جولداس، مارجان اقجىگىت.

سونداي-اق، قازاقستاندىق اكروبات جىبەك اراپباەۆا جاڭا ماۋسىمنان باستاپ فريستايل-اكروباتيكادان قۇرامانىڭ اعا جاتتىقتىرۋشىسى قىزمەتىن اتقارادى.

سوڭعى جاڭالىقتار