6 قىركۇيەك, 18:24 315 0 جاڭالىقتار Túrkistan Gazeti

«باقىتتى وتباسى» جانە «7-20-25» يپوتەكالىق باعدارلاماسىنىڭ قانداي ايىرماشىلىقتارى بار؟

مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا مالىمدەگەن «باقىتتى وتباسى» باعدارلاماسى مەن «7-20-25» يپوتەكالىق باعدارلاماسى اراسىنداعى ايىرماشىلىقتار بويىنشا ازاماتتار تاراپىنان كەلگەن ساۋالدارعا قاتىستى «باسپانا» يپوتەكالىق ۇيىمى تۇسىنىك بەردى. 

«7-20-25» جانە «باقىتتى وتباسى» - ءبىر-بىرىنە ۇقسامايتىن، شارتتارى ءبىر-ءبىرىن قايتالامايتىن بولەك يپوتەكالىق باعدارلامالار بولىپ تابىلادى. ولاردىڭ تۇتىنۋشى ساناتتارى بولەك. «7-20-25» باعدارلاماسى اتىندا ءۇيى جوق، رەسمي تابىسى بار، حالىقتىڭ ەكونوميكالىق بەلسەندى ساناتىنا جاتاتىن ازاماتتارعا ارنالعان. ال «باقىتتى وتباسى» باعدارلاماسى قۇرامىنا كوپبالالى انالار، تولىق ەمەس وتباسىلار، مۇمكىندىگى شەكتەۋلى بالا اسىراپ وتىرعان وتباسىلار كىرەتىن حالىقتىڭ الەۋمەتتىك قورعالاتىن ساناتىنا ارنالعان. «7-20-25» باعدارلاماسى نارىقتان وزدىگىنشە قارجى تارتىپ، بانكتەردىڭ يپوتەكالىق كرەديتتەرىن ساتىپ الادى، ال «باقىتتى وتباسى» باعدارلاماسى تىكەلەي مەملەكەتتىك بيۋدجەت تاراپىنان قارجىلاندىرىلادى»، دەلىنگەن حابارلامادا.

حالىقتىڭ ەكونوميكالىق بەلسەندى بولىگىنە ارنالعان «7-20-25» باعدارلاماسى 7% جىلدىق ۇستەمەمەن، 20%-دان باستالاتىن العاشقى جارنا، 25 جىلعا دەيىنگى مەرزىم شارتتارىمەن يپوتەكالىق نەسيە الۋعا مۇمكىندىك بەرەدى.

«7-20-25» باعدارلاماسى ەلباسى ن.ءا.نازارباەۆتىڭ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋى اياسىندا «ءاربىر وتباسى ءۇشىن باسپانا الۋدىڭ جاڭا مۇمكىندىكتەرىن بەرۋ» ءبىرىنشى باستاماسىن ىسكە اسىرۋ ماقساتىندا ازىرلەندى.

باعدارلاما بۇعان دەيىن نارىقتا بولعان جىلدىق ۇستەمەلەردى ەكى ەسەگە ازايتتى، يپوتەكالىق نەسيە مەرزىمىن 25 جىلعا دەيىن سوزدىردى. بۇل ءوز كەزەگىندە ازاماتتار ءۇشىن يپوتەكانىڭ اي سايىنعى تولەمدەرىن ارزانداتىپ، ءبىر جىل ىشىندە 10 مىڭنان استام وتباسىنىڭ باسپانالى بولۋىنا مۇمكىندىك بەردى.

«الايدا اتالمىش باعدارلاما كوپبالالى انالار، تولىق ەمەس وتباسىلار، مۇمكىندىگى شەكتەۋلى بالا اسىراپ وتىرعان وتباسىلار كىرەتىن حالىقتىڭ الەۋمەتتىك قورعالاتىن ساناتىنا ارنالماعان. ولار ءۇشىن ۇكىمەت تاراپىنان «باقىتتى وتباسى» باعدارلاماسى ازىرلەنىپ، جۇمىس ىستەۋدە»، دەلىنگەن ۇيىم حابارلاماسىندا.

سوڭعى جاڭالىقتار