6 قىركۇيەك, 16:47 269 0 جاڭالىقتار Túrkistan Gazeti

پرەزيدەنت ارىس تۇرعىندارىنا كومەكتەسكەن قازاقستاندىقتارعا العىس ايتتى

قر پرەزيدەنتى قاسىم-جومارت توقاەۆ ارىس قالاسىنداعى جارىلىستا كومەك كورسەتكەن قازاقستاندىقتارعا العىس ايتتى، دەپ حابارلايدى قازاقپارات ءتىلشىسى.

«وسىدان ەكى جارىم اي بۇرىن ارىس قالاسىندا بولعان جارىلىستىڭ ەلىمىزگە قانشالىقتى اۋىر تيگەنىن جاقسى بىلەسىزدەر. بۇل توتەنشە وقيعا تەك قازاقستاننىڭ تۇرعىندارىن عانا الاڭداتىپ قويعان جوق. الىس-جاقىن ەلدەر دە نيەتتەستىك ءبىلدىرىپ، شىنايى قولداۋ كورسەتتى. حالقىمىز ءبىرتۇتاس ەل بولىپ، ارىس تۇرعىندارىنا قول ۇشىن بەردى. ءاربىر وبلىس بۇل قالانى قالپىنا كەلتىرۋ جۇمىسىنا بەلسەندى تۇردە اتسالىستى. 24 ماۋسىم حالقىمىزدىڭ تاعى ءبىر سىناقتان سۇرىنبەي وتكەن كۇنى رەتىندە تاريحتا قالدى. ارىس تۇرعىندارىنىڭ تىنىشتىعى بۇزىلعانىمەن ەلدىڭ رۋحى تۇسكەن جوق. ارينە، ەڭ وكىنىشتىسى جارىلىس سالدارىنان بىرنەشە ازاماتىمىز قازا تاپتى. ءبىز قازا بولعانداردىڭ تۋىستارى مەن جاقىندارىنىڭ قايعىسىنا ورتاقتاسا بىلدىك»، - دەدى مەملەكەت باسشىسى اقوردادا ارىس قالاسىن قالپىنا كەلتىرۋگە قاتىسقانداردى ماراپاتتاۋ راسىمىندە.

پرەزيدەنت قيىندىققا قاراماي تۇتاس ءبىر قالانىڭ تۇرعىندارىن قاۋىپسىز جەرگە كوشىرۋدى ناعىز ەرلىك دەپ اتادى.

«بۇل بار-جوعى ەكى ساعاتتىڭ ىشىندە جۇزەگە استى. ءبىزدىڭ تاريحىمىزدا بۇنداي جاعداي بولعان ەمەس. قالانى كوشىرۋ تۋرالى دەر كەزىندە شەشىم قابىلداۋدىڭ ارقاسىندا قاۋىپ-قاتەردىڭ الدىن الدىق. قاراپايىم ەڭبەك ادامدارى سىن ساعاتتا سابىر ساقتاپ، ەرەن ەرلىكتىڭ ۇلگىسىن كورسەتتى(...) مەن تۇرعىنداردى قاۋىپسىز جەرگە كوشىرگەن جانە پانالاتقان ازاماتتارعا زور ريزاشىلىعىمدى بىلدىرەمىن. زارداپ شەككەندەردى ەمدەپ، ولاردىڭ ءومىرى ءۇشىن كۇرسكەن دارىگەرلەرگە العىس ايتامىن. ءدال وسىنداي توتەنشە جاعدايدا ازاماتتارىمىز ءبىر ادامداي جۇمىلىپ، ءبىر جاعادان باس، ءبىر جەڭنەن قول شىعارىپ، ەڭبەك ەتتى. بۇل ءبىزدىڭ حالقىمىزعا ءتان ەرەكشە مەيىرىم مەن قايىرىمدىلىق، پاراساتتىلىق دەپ بىلەمىن»، - دەدى قاسىم-جومارت توقاەۆ.

سوڭعى جاڭالىقتار