3 قىركۇيەك, 19:26 352 0 ايماق Túrkistan Gazeti

اقتوبەدە جۇمىسشىلار كورسەتكەن قىزمەتى ءۇشىن اقشانى كىمنەن سۇرارىن بىلمەي ءجۇر

«جاڭاتاس اقتوبە» جشس-ءى وندىرگەن قيىرشىقتاستى تاسىمالداعان جۇمىسشىلار ەڭبەكاقىسىن داۋلاپ وبلىس اكىمدىگىنە باردى، دەپ حابارلايدى قازاقپارات ءتىلشىسى.

اقتوبە وبلىسى، شالقار اۋدانى، بەرشۇگىر اۋىلىنداعى ءوندىرىس ورنىندا قيىرشىق تاس شىعارعان «جاڭاتاس اقتوبە» جشس-ءنىڭ جۇمىسشىلارى جالاقىسىن داۋلاپ، بىرنەشە رەت اكىمدىككە باردى. وبلىس اكىمدىگى «جاڭاتاس اقتوبە» كومپانياسىنىڭ جەر قويناۋىن پايدالانۋ قۇقىعى «Temir Tas» جشس-نە بەرىلگەنىن، جۇمىسشىلار الدىنداعى قارىز 21-قىركۇيەككە دەيىن وتەلەتىنىن حابارلادى. بىراق قارىز تۇگەل وتەلمەيتىن سياقتى. سەبەبى بەرەجاق 12 ميلليارد تەڭگەگە جەتكەن.

«زاڭ بويىنشا ەڭ الدىمەن ءبىز جالاقىنى تولەۋىمىز قاجەت. ال بۇگىن اكىمدىككە كەلگەن ادامدار زاۋىتقا قىزمەت كورسەتكەن، قيىرشىق تاس تاسىمالداعان كاسىپكەرلەر. كاسىپورىنعا بىرنەشە مۇمكىندىك بەرىلگەنىمەن تىعىرىقتان شىعا المادى. ءبىر عانا بانك الدىنداعى قارىزى 7 ميلليارد تەڭگەگە جەتكەن. جالپى 12 ميلليارد تەڭگە قارىز»، - دەدى وبلىس اكىمىنىڭ ورىنباسارى قايرات بەكەنوۆ. جۇمىسشىلار سوتقا ارىز بەرىپ، سوت شەشىمى كاسىپكەرلەردىڭ پايداسىنا شەشىلدى.

قىزمەت كورسەتۋشىلەر قۇجاتتارىمەن «جاڭاتاس اقتوبە» كومپانياسىنا بارعانىمەن بانكروت بولۋدىڭ الدىندا تۇرعاندىقتان زاۋىت اقشا جوق دەپ كەرى قايتارعان. ەكى ورتادا قالعان تاسىمالداۋشىلار ەندى سوت ورىنداۋشىلارىنا ءۇمىت ارتادى. «جاڭاتاس اقتوبە» كومپانياسىندا وڭتايلاندىرۋ ءجۇرىپ جاتىر. قازىرگى كەزدە سوت ورىنداۋشىلارى كومپانيانىڭ بەرشۇگىر ستانساسىنداعى تەمىرجول جولاعىنا، زاۋىتتىڭ كارەرىنە تىيىم سالدى. وڭتايلاندىرۋ ءىسى اياقتالعان سوڭ مۇلكى باعالانىپ، تۇسكەن اقشا جالاقىعا، قىزمەت كورسەتۋ اقىسىنا بەرىلەدى»، - دەدى وبلىستىق ادىلەت دەپارتامەنتى باسشىسىنىڭ ورىنباسارى ازامات بەردىبەكوۆ. بارلىعى ونعا جۋىق تاسىمالداۋشى 1-11 ميلليون تەڭگە ارالىعىندا اقشا الۋى ءتيىس. «جاڭاتاس اقتوبە» كومپانياسى كەڭسەسىن جاۋىپ تاستاسا،  «Temir Tas» جشس-ءى بۇل سۇراقتىڭ وزدەرىنە قاتىسى جوق ەكەنىن ەسكەرتكەن. «2019 جىلدىڭ ماۋسىم ايىندا جەر قويناۋىن پايدالانۋ قۇقىعى بىزگە اۋىستى. كەلىسىمشارتتا جۇمىسشىلاردىڭ جالاقىسى مەن سالىقتى تولەۋ مىندەتتەلدى. ءبىز 12 ميلليارد تەڭگە قارىزدى قابىلداعان جوقپىز. قازىر ءوز مىندەتىمىزگە العان اقشانى تولەپ جاتىرمىز. قىركۇيەك ايىنىڭ سوڭىنا دەيىن 10 ميلليون تەڭگەگە جۋىق اقشانى اۋدارامىز. بىزگە جالاقىسىن سۇراپ 89 ادام عانا حابارلاستى»، - دەدى «Temir Tas» جشس-ءنىڭ اتقارۋشى ديرەكتورى الەكساندو تسوي. ايتا كەتەيىك، اقتوبە وبلىسى بويىنشا 13 كومپانيا جۇمىسشىلارىنا 213 ميلليون تەڭگە قارىز. ياعني، 370 ادام ەڭبەكاقىسىن ۋاقىتىلى الماعان. اسىرەسە بانكروت بولاتىن بەس كومپانيانىڭ قارىزى 89 ميلليون تەڭگە. بەرەجاق كومپانيالار اراسىندا اقتوبە مەتالل قۇبىرلار زاۋىتى، قوقىس جيناۋمەن اينالىسقان «تازا قالا» كومپانياسىن مەن شاعىن مۇناي وڭدەۋ زاۋىتى بار.

سوڭعى جاڭالىقتار