29 تامىز, 11:25 463 0 ونەر "تۇركىستان" گازەتىنىڭ اۆتورلارى

«تاريحي مۇرا جاناشىرى» اتتى كورمە ءوتتى

قازاقستان رەسپۋبليكاسى مادەنيەت جانە سپورت مينيسترلىگىنە قاراستى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ۇيىمداستىرۋىمەن مەملەكەت جانە قوعام قايراتكەرى، عالىم-ەتنوگراف وزبەكالى جانىبەكوۆتىڭ 88 جىلدىعىنا وراي ءومىرى مەن شىعارماشىلىعىنا ارنالعان  «تاريحي مۇرا جاناشىرى» اتتى كورمە ءوتتى.

قازاق مادەنيەتىنىڭ قارا نارىنا بالانعان، «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ نەگىزىن قالاۋشى، قاسيەتتى تايقازاننىڭ تاريحي ورنىنا ورالۋىنا ۇلەس قوسقان عالىم-ەتنوگراف وزبەكالى جانىبەكوۆتىڭ تۋعان كۇنىندە ونىنشى رەت وتكەن كورمەگە «ازىرەت سۇلتان» مەملەكەتتىك تاريحي-مادەني قورىق-مۋزەيى ديرەكتورىنىڭ ورىنباسارى م.تاستانبەكوۆ، ءو.جانىبەكوۆتىڭ شاكىرتى، ءارى قىزمەتتەسى قانات تۇياقباەۆ، تۇركىستان قالالىق ارداگەرلەر كەڭەسىنىڭ توراعا ورىنباسارى پەرنەتاي دوسىبەكوۆ، ءو.جانىبەكوۆ­تىڭ قارىنداسى ايعانىم سەرىم جانە تورعايداعى قىزمەتتەسى  ىدى­رىس جۇمابەكوۆ، مۋزەي قىزمەتكەرلەرى مەن باق وكىلدەرى قاتىستى.

اكادەميك ماناش قوزىباەۆ: «وزەكەڭ وزىندىك ءىزى بار، وزىندىك جىگەرى بار، قۇرىشتان سومدانىپ قۇيىلعان باتىر، عالىم، قايراتكەر، ونەرپاز ازامات رەتىندە قازاق تاريحىندا ەسىمى قاتتالدى» دەپ جازسا، جازۋشى ءابىش كەكىلباەۆ: «ۇلتتىق مەملەكەتىمىزدىڭ قايتادان قالپىنا كەلتىرىلىپ، تاۋەلسىز دامۋ جولىنا تۇسۋىنە دە وزاعاڭنىڭ سىڭىرگەن ەڭبەگى ەرەكشە» دەپ تەبىرەنگەن.

وتىرارداي قاسيەتتى وڭىردە دۇنيەگە كەلىپ، ءال-فارابيدەي باباسىن رۋحاني ۇستاز تۇتىپ، اتا-بابا مۇراسىمەن سۋسىنداعان وزبەكالى جانىبەكوۆ وسە كەلە قازاقتانۋ عىلىمىنىڭ قارا نارىنا، ۇلت ماقتانىشىنا اينالدى. ول قازاق حالقىنىڭ مادەنيەتىنىڭ، انا ءتىلىنىڭ، ءداستۇرى مەن ادەت-عۇرپىنىڭ جاڭارىپ، دامۋىنا وراسان زور ۇلەس قوستى. حح عاسىردىڭ 70 جىلدارىنىڭ وزىندە-اق، قوجا احمەت ياساۋي كەسەنەسىنىڭ قالپىنا كەلتىرىلۋىنە ۇيىتقى بولدى.

كورمەگە ۇلتتىق ونەر مەن مادەنيەتتىڭ جاناشىرى اتانعان عالىم-ەتنوگرافتىڭ 60-تان اسا جادىگەرى قويىلدى. ولاردىڭ قاتارىندا وزبەكالى جانىبەكوۆتىڭ بالالىق شاعى مەن قىزمەتتىك جىلدارىنداعى فوتوسۋرەتتەرى، قازاقستانداعى مۋزەيلەردى ۇيىمداستىرۋداعى شەبەرلىگى، ءوزىنىڭ تۇتىنعان زاتتارى – فوتواپاراتى، قول سومكەسى، قالامى، شاپانى، باس كيىمى، قالامىنان تۋعان «وتىرار»، «قازاق كيىمى»، «جولايرىقتا»، «تاعدىر تاعىلىمى»، «ەحو» سىندى كىتاپتارى مەن ماقالالارى، تورعايدا قىزمەت اتقارىپ جۇرگەندە بەرىلگەن ەستەلىك زاتتارى، جۇمىس بولمەسىندە پايدالانعان ءمارماردان جاسالعان قالامسابى بار. سونىمەن قاتار وزبەكالى جانىبەكوۆتىڭ جەكە كىتاپحاناسىنداعى شەتەل ادەبيەتتەرى مەن وتاندىق جازۋشىلاردىڭ كىتاپتارى دا كورمەگە كەلۋشىلەرگە تانىستىرىلدى.

 

جانىبەك ءاشىم

 «تۇركىستان-اقپارات»

سوڭعى جاڭالىقتار