29 تامىز, 11:10 544 0 نۇر وتان اسەل انۋاربەك

ناقتى رەفورمالار كەزەڭى

بۇل تۋرالى «Nur Otan» پارتياسى توراعاسىنىڭ ءبىرىنشى ورىنباسارى «حابار» اگەنتتىگىنىڭ «جەتى كۇن» باعدارلاماسىنا بەرگەن سۇحباتىندا ايتتى.

سۇحبات بارىسىندا ول 21 تامىزدا وتكەن ساياسي كەڭەستىڭ كەڭەيتىلگەن وتىرىسىندا ەلباسى بەرگەن تاپسىرمالاردىڭ ماڭىزى، پارتيانى قايتا جانداندىرۋ جولىنداعى جاڭا باعدارلاما جانە پارتيا جۇمىسىنىڭ الداعى باعىت-باعدارى تۋرالى ايتتى.

– ەلباسى ساياسي كەڭەستىڭ وتىرىسىندا «سەنىم. ديالوگ. بولاشاققا نىق قادام – «Nur Otan» پارتياسىنىڭ 7 سەرپىنى» اتتى جاڭا باعدارلامانى تانىستىرىپ، بيلەۋشى پارتياعا ناقتى تاپسىرمالار بەردى. ولاردىڭ ەڭ باستىسى – پارتيا جۇمىسىن جانداندىرۋ، – دەدى باۋىرجان بايبەك.

سونىمەن قاتار ول تاۋەلسىزدىكتىڭ العاشقى جىلدارىندا ەگەمەندىكتى ساقتاپ قالۋ وڭاي بولماعانىن، سونداي ساتتە حالىق ءبىراۋىزدان ەلباسىعا سەنىم ارتىپ، سونىڭ ارقاسىندا ەلىمىزدىڭ قيىن جاعدايلاردان قينالماي وتكەنىنە نازار اۋداردى.

– قازىر جاعداي جاقساردى. سوعان بايلانىستى قوعامنىڭ سۇرانىسى دا وزگەردى. ءبىز وسى سۇرانىستارعا ساي بولىپ، حالىقتىڭ سەنىمىن اقتاۋ ءۇشىن جۇمىس ىستەيمىز. سوندىقتان ءبىزدىڭ نەگىزگى جاڭا قۇرالىمىز – پرايمەريز، ياعني كەز كەلگەن ماسەلەنى اشىق، ءادىل تالقىلاۋ، – دەگەن باۋىرجان بايبەك الداعى ۋاقىتتا پارتيا زامان تالاپتارىنا ساي وزگەرىپ، ناقتى رەفورمالار قولعا الىناتىنىن ايتتى.

ەلباسى انىقتاپ بەرگەن 7 باعىت ارقىلى پارتيا جۇمىسىن قايتا جانداندىرۋ اياسىندا جاستارعا، اسىرەسە، اۋىل جاستارىنا جاعداي جاساۋ، اۋىلدىق جەرلەردەن جۇمىس ورىندارىن اشۋ، نۇر-سۇلتان، الماتى، شىمكەنت سياقتى ءىرى قالالارعا كوشىپ كەلىپ جاتقان ازاماتتارعا قولداۋ كورسەتۋ، كوپ بالالى انا، مۇمكىندىگى شەكتەۋلى ازاماتتار، باسقا دا الەۋمەتتىك توپتارعا ناقتى كومەك كورسەتۋ، باستاۋىش پارتيا ۇيىمدارىنىڭ جۇمىسىن جەتىلدىرۋ، پارتيالىق باقىلاۋدى كۇشەيتۋ سياقتى كوپتەگەن وزەكتى ماسەلەلەر بويىنشا دا جۇمىستار جۇرگىزىلەدى.

سونداي-اق باۋىرجان بايبەك بۇگىندە پارتيانىڭ الدىنا قويىلىپ وتىرعان تالاپتارعا ءماجىلىس پەن بارلىق دەڭگەيدەگى ماسليحاتتارداعى فراكتسيالاردىڭ مۇشەلەرى، نۇروتاندىق مينيسترلەر مەن اكىمدەر دە ساي بولۋى كەرەكتىگىن ايتتى.

– ەلباسى «Nur Otan»-دى ناقتى ىستەردىڭ پارتياسى دەپ ۇنەمى ايتىپ كەلەدى. سوندىقتان ءبىز بيلەۋشى پارتيا رەتىندە ەڭ الدىمەن اشىق، ءادىل بولۋدى وزىمىزدەن تالاپ ەتەمىز. ءبىز ءبىر-بىرىمىزدەن ەل ءۇشىن ناقتى نە ىستەگەنىمىزدى سۇراۋىمىز كەرەك. وسىنى ءار پارتيا قىزمەتكەرى سەزىنۋى ءتيىس. سول سەبەپتى الداعى ۋاقىتتا ءوز قاتارىمىزدى تا­زارتۋعا باسا ءمان بەرەمىز، – دەدى «Nur Otan» پارتياسى توراعاسىنىڭ ءبىرىنشى ورىنباسارى.

سونىمەن بىرگە ول بۇدان بىلاي پارتيانىڭ قوعامداعى بار ماسەلەلەردى جاسىرماي، اشىق ايتاتىنىن جەتكىزدى.

– ەگەر ءبىر ماسەلە وڭ شەشىمىن تاپسا نەمەسە سوڭىنا دەيىن جەتكىزىلمەسە، سونىڭ ءبارىن حالىققا جاريالاپ وتىرامىز. قازاقتا «اۋرۋىن جاسىرعان اڭداماي ولەدى» دەگەن ءسوز بار. سوندىقتان پارتيا بار كەمشىلىكتەردى دەر كەزىندە كوتەرىپ، ايتۋ كەرەك، – دەدى باۋىرجان بايبەك.

سۇحبات بارىسىندا ول بۇل ىسكە بۇقارالىق اقپارات قۇرالدارى دا اتسالىسىپ، حالىققا شىندىقتى جەتكىزۋ كەرەكتىگىنە توقتالدى.

– ەلباسى «Nur Media» حولدينگىنە ناقتى تاپسىرما بەردى. ول جالپى بۇقارالىق اقپارات قۇرالدارىنا دا قاتىcتى. وتاندىق اقپارات قۇرالدارى شىندىقتى ايتۋلارى كەرەك. بىراق سىننىڭ دەسترۋكتيۆتى جانە كونسترۋكتيۆتى دەگەن ەكى ءتۇرى بار. ياعني، ادام تەك سىناي بەرمەي، ماسەلەنىڭ شەشىلۋ جولىن دا ايتۋى كەرەك. سوندا عانا ونداي سىننىڭ حالىققا پايداسى بولادى. ال قۇر سوزبەن ەش نارسەگە جەتە المايمىز، – دەدى سۇحبات بەرۋشى.

سۇحبات كەزىندە پارتيانىڭ حالىقتى ماسىلدىق پسيحولوگيادان ارىلتىپ، ەڭبەك ەتۋگە ۇگىتتەۋ ىسىنەن دە تىس قالمايتىنى ءسوز بولدى.

– ەلباسى ۇنەمى حالىقتى ادال ەڭبەك ەتۋگە شاقىرىپ كەلەدى. بۇل – قوعامدا ادىلدىكتىڭ ورناۋىنا دا ۇلكەن اسەرىن تيگىزەدى. سوندىقتان ادام ءوزى ۇنەمى العا ۇمتىلىپ، تالپىنۋى كەرەك. كاسىپپەن اينالىسامىن دەگەنگە مەملەكەت تە قولداۋ كورسەتىپ وتىر. پارتيا دا وسى ىسكە اتسالىسىپ، ءتۇسىندىرۋ جۇمىستارىنا قاتىسادى. ءبىزدىڭ ماقساتىمىز – حالىققا بالىق ەمەس، قارماق بەرۋ، – دەدى باۋىرجان بايبەك.

بۇدان باسقا پارتيا توراعاسىنىڭ ءبىرىنشى ورىنباسارى ايتىس ونەرى، ءتول مادەنيەتىمىزدى دارىپتەۋ سياقتى ماڭىزدى سالالارعا ەرەكشە توقتالىپ، بۇل باعىتتا پارتيا اۋقىمدى جۇمىستار جۇرگىزەتىنىن ايتتى.

– ەلباسى تاۋەلسىزدىك العالى بەرى ايتىستى قولداپ كەلە جاتىر. ايتىس ءبىزدىڭ سالت-ءداستۇرىمىزدىڭ اجىراماس ءبىر بولىگى. ول دا پرايمەريز سياقتى. سەبەبى ول جەردە اشىق سىن ايتىلىپ، ەلدىڭ ءسوزىن سويلەگەن ەڭ مىقتى اقىن جەڭىسكە جەتەدى. پارتيادا پرايمەريزدەر سولاي ءوتۋى كەرەك. ويتكەنى پارتيا ناعىز دەموكراتيالىق ينستيتۋت. سوندىقتان ىشكى پارتيالىق دەموكراتيا قالىپتاسىپ، ءتۇرلى پىكىرلەر ايتىلۋى ءتيىس. سول سەبەپتى پارتيا الداعى ۋاقىتتا بارلىق ماسەلەنى اشىق تالقىلايتىن بولادى، – دەگەن باۋىرجان بايبەك «Nur Otan»-نىڭ حالىقتىق پارتيا ەكەنىن، سوندىقتان حالىقتىڭ ءسوزىن سويلەپ، مۇڭىن مۇڭداپ، ازاماتتاردىڭ نە نارسەگە مۇقتاج ەكەنىن ءبىلۋ، ەلدىڭ اراسىندا ءجۇرىپ، ەتەنە جۇمىس ىستەۋ پارتيالىقتاردىڭ باستى مىندەتى ەكەنىن جەتكىزدى.

سونداي-اق ول ايتىسكەر بولۋ ءۇشىن تالانت پەن دارىننان بولەك جان-جاقتى ءبىلىم دە كەرەك ەكەنىنە توقتالدى.

– ايتىسكەر بولۋ ءۇشىن تالانت كەرەك. سونىمەن بىرگە ءبىلىم مەن مادەنيەت تە قاجەت. سوندىقتان پارتيا ايتىس ونەرىنىڭ دامۋى ءۇشىن ايتىسكەرلەرمەن جۇمىسقا دا باسا ءمان بەرەدى، – دەدى باۋىرجان بايبەك.

اڭگىمە بارىسىندا ۇلتتىق رۋح ماسەلەسى دە نازاردان تىس قالعان جوق. بۇل جونىندە پارتيا توراعاسىنىڭ ءبىرىنشى ورىنباسارى ۇلتتىق رۋحى وسال حالىقتىڭ ەشقانداي بيىككە كوتەرىلە المايتىنىن ايتتى.

– ەلباسىمىز ۇنەمى وسى ماسەلەگە باسا ءمان بەرىپ، بارلىق جاعدايدى جاساپ كەلەدى. تۇڭعىش پرەزيدەنتىمىز بۇل ىستە كوبىنە جاپونيانىڭ تاجىريبەسىن مىسالعا كەلتىرىپ وتىرادى. كەزىندە الاشوردالىقتار دا سالت-ءداستۇر مەن جاڭا تەحنولوگيانى ۇشتاستىرىپ، ەكى جاقتىڭ وزىق تۇستارىن قاتار الىپ ءجۇرۋ كەرەكتىگىن ايتقان ەدى. سول سەبەپتى ءبىز ءوزىمىزدىڭ جاقسى، زامان تالابىنا ساي ۇلتتىق قۇندىلىقتارىمىزدى ساقتاپ، قورعاپ، ولاردى بولاشاقتىڭ تالاپتارىمەن ۇيلەستىرە دامىتۋىمىز كەرەك. ال كەمشىن تۇستارىمىزدان باس تارتۋدان قورىقپاۋىمىز قاجەت، – دەدى باۋىرجان بايبەك.

سونداي-اق ول 2013 جىلى قابىلدانعان «Nur Otan» پارتياسىنىڭ دوكتريناسىنا توقتالىپ ءوتتى.

– پارتيامىزدىڭ دوكتريناسىندا ءتول مادەنيەتىمىزدى، رۋحانياتىمىزدى دامىتۋ ماسەلەلەرى اشىق ايتىلعان. بۇل – ءبىز ءۇشىن اسا ماڭىزدى. سەبەبى قازىرگى تاڭدا قوعامداعى كەيبىر ماسەلەلەر وسى سالاداعى ولقىلىقتاردان بولىپ وتىر. سونىڭ ىشىندە ەڭ الدىمەن وتباسىلىق قۇندىلىقتارىمىز السىرەپ كەتتى. سوندىقتان الداعى ۋاقىتتا پارتيا وسى باعىتتاعى جۇمىستاردى قولعا الادى، – دەگەن پارتيا توراعاسىنىڭ ءبىرىنشى ورىنباسارى تاۋەل­سىز­دىگىمىزدى نىعايتىپ، ەلدىگىمىزدى بەكەمدەۋ ءۇشىن بارشا قازاقستاندىقتار جۇدىرىقتاي جۇمىلىپ ارەكەت ەتۋى كەرەكتىگىن ايتتى

 

سوڭعى جاڭالىقتار