27 تامىز 2019, 17:10 471 0 ايماق Túrkistan Gazeti

قاراعاندىدا 1 مىڭنان استام بالا جەكەمەنشىك مەكتەپتەردە مەمتاپسىرىس بويىنشا ءبىلىم الادى

بيىلعى وقۋ جىلىندا قاراعاندىدا العاش رەت 6 جەكە مەنشىك مەكتەپتە مەملەكەتتىك تاپسىرىس بويىنشا ءبىلىم الاتىن بولدى. بيلىك وكىلدەرىنىڭ پىكىرىنشە، بۇل قادام باسقا مەكتەپتەردى جەڭىلدەتۋگە كومەكتەسەدى، دەپ حابارلايدى قازاقپارات ءوڭىر باسشىسىنىڭ رەسمي سايتىنا سىلتەمە جاساپ.

قالالىق بيۋدجەتتەن بۇل ماقساتقا 322 ملن تەڭگە ءبولىندى. اتالمىش سوما جەكە مەكتەپتەردە 1080بالانىڭ ءبىلىم الۋىنا جۇمسالادى.  - جەكە مەنشىك مەكتەپتەردە وقۋعا مەملەكەتتىك تاپسىرىس كولەمى قاراعاندى قالاسى اكىمدىگىنىڭ قاۋلىسىمەن انىقتالعان. كىشى سىنىپ وقۋشىلارى ءۇشىن ول ايىنا 15 510 تەڭگەنى، ورتا بۋىن ءۇشىن –  ايىنا 20 555 تەڭگەنى جانە جوعارى سىنىپ وقۋشىلارى ءۇشىن ايىنا 23 359 تەڭگەنى قۇرايدى، - دەدى قاراعاندى ءبىلىم ءبولىمىنىڭ باسشىسى گۇلسىم قوجاحمەتوۆا.

بۇدان باسقا، قالالىق بيلىك قازىرگى تاڭدا بيزنەسمەندەر ءۇشىن جەكە مەنشىك مەكتەپتەردى اشۋ ءتيىمدى بولاتىنداي جاعداي جاساۋعا تىرىسۋدا. پريشاحتينسكىدە بۇگىندە 240 ورىندىق جەكە باستاۋىش مەكتەپتىڭ قۇرىلىسى ءجۇرىپ جاتىر، مايقۇدىق، گۇلدەر جانە كۇنگەي ىقشاماۋداندارىندا سالىناتىن تاعى ءۇش مەكتەپتىڭ جوباسى قاراستىرىلۋ بارىسىندا.  قاراعاندىدا بارلىعى 133 مەملەكەتتىك ءبىلىم بەرۋ ۇيىمدارى بار. ولاردىڭ ىشىندە 80 مەكتەپ، 42 بالاباقشا، 10 مەكتەپتەن تىس ۇيىم جانە ءبىر تۇزەتۋ كابينەتى بار. بيىل ب. مومىشۇلى كوشەسىندە 1300 ورىندىق جاڭا مەكتەپ اشىلادى. ءبىلىم ءبولىمىنىڭ اقپاراتى بويىنشا، قازىر 13 قالالىق مەكتەپ شاماسىنان تىس جۇكتەلگەن، №34 مەكتەپتە بالالار ءۇش اۋىسىمدا وقيدى.

سوڭعى جاڭالىقتار