27 تامىز 2019, 11:26 379 0 جاڭالىقتار Túrkistan Gazeti

بيىل 4300 قاراعاندىلىق باسپانالى بولادى

بيىلعى جىلى قاراعاندى وبلىسىندا «نۇرلى جەر» باعدارلاماسى بويىنشا 4 300 پاتەر سالۋ جوسپارلانعان. بۇل تۋرالى وبلىس اكىمدىگىندە وتكەن اپپارات جينالىسىندا قۇرىلىس، ساۋلەت جانە قالا قۇرىلىسى باسقارماسىنىڭ باسشىسى تايحان قالماحانوۆ ءمالىم ەتتى، دەپ حابارلايدى قازاقپارات.

ايماق باسشىسىنىڭ باسپاسوز قىزمەتىنەن مالىم ەتكەندەي، 4300 پاتەردىڭ 1 722-ءسى بۇگىندە پايدالانۋعا بەرىلگەن. جوسپار بويىنشا جىل سوڭىنا دەيىن «ءۇش جاپىراق» شاعىن اۋدانىندا 576 پاتەر تاپسىرىلۋى ءتيىس. تاعى 1054-ءى «7-20-25» تۇرعىن ءۇي باعدارلاماسى بويىنشا قولدانىسقا ەنگىزىلمەك. «بيىل 376 وتباسىعا باسپانالار «باقىتتى وتباسى» باعدارلاماسى بويىنشا تاپسىرىلادى. ول جەڭىلدەتىلگەن يپوتەكانى جىلدىق 2% مولشەرلەمەسىمەن رەسىمدەۋدى كوزدەيدى.

سونداي-اق، بيىل  جالعا بەرىلەتىن 1243 پاتەر پايدالانۋعا بەرىلەدى. ونىڭ ىشىندە 776 پاتەردىڭ كىلتتەرى كوپبالالى وتباسىلارعا ۇلەستىرىلەدى. 467 پاتەردى الەۋمەتتىك وسال توپتار ساناتىنا كىرەتىن ازاماتتار الادى. وسىلايشا، تۇرعىن ۇيگە كەزەكتە تۇرعان كوپبالالى وتباسىلار سانى 1464-تەن 688-گە دەيىن قىسقارادى»، - دەلىنگەن اكىمدىك اقپاراتىندا.  ءمالىم ەتىلگەندەي، بيىلعى جىلدىڭ شىلدە ايىنا دەيىن 168 كوپبالالى وتباسى پاتەر الدى. وبلىستىق جانە رەسپۋبليكالىق بيۋدجەت ەسەبىنەن ولار ءۇشىن تۇرعىن ءۇي ەكىنشى دەڭگەيلى نارىقتان ساتىپ الىندى. جىل سوڭىنا دەيىن تاعى 204 پاتەردى ساتىپ الۋ جانە تابىس ەتۋ جوسپارلانۋدا.

سوڭعى جاڭالىقتار