19 تامىز, 12:46 237 0 جاڭالىقتار Túrkistan Gazeti

الماتىلىق ءۇش الپينيست «جەڭىس» شىڭىندا قالىپ قويدى

الماتىلىق ءۇش الپينيست مۇرات وتەباەۆ، اندرەي كورنەەۆ جانە وكپە قابىنۋىنان قايتىس بولعان الەكساندر چەچۋلين «جەڭىس» شىڭىندا قالىپ قويدى، دەپ حابارلايدى قازاقپارات ءتىلشىسى.

جوعالعان الپينيستەردىڭ ءبىرىنىڭ قىزى ايگۇل ماتاي: «ولار 6600 مەتر بيىكتىكتە قالىپ قويدى، تومەن تۇسۋگە ەشقانداي مۇمكىندىكتەرى جوق» دەپ جازدى ءوزىنىڭ Instagram پاراقشاسىندا.

«اۋا- رايىنىڭ قولايسىزدىعى مەن قاجەتتى قۇرال-جابدىقتاردىڭ جەتىسپەۋىنەن الپينيستەر توبى بازالىق لاگەرگە ۋاقىتىندا تۇسە المادى. امان قالعان مۇرات وتەپباەۆ پەن اندرەي كورنەەۆ ەشكىممەن بايلانىسا المايدى»، - دەپ جازدى ايگۇل. ونىڭ ايتۋىنشا، قىرعىزستان تجم قۇتقارۋشىلار توبى مي-8 تىكۇشاعىمەن 6600 مەتر بيىكتىككە جاقىن ايماقتاردى اينالىپ ءوتتى. الايدا، اۋا-رايىنىڭ قولايسىزدىعىنا بايلانىستى ىزدەۋ جۇمىستارى توقتاتىلدى. ايگۇلدىڭ ايتۋىنشا، بۇگىن تاڭەرتەڭ ول ءبىر توپ الپينيستەرمەن بىرگە بۇرىنداي اۋەجايىنان الماتىعا ۇشپاقشى.

«اۋا-رايى قولايسىز بولعاندىقتان، قۇتقارۋ توبىن جاياۋ جىبەرۋگە بولادى. ازاماتتىق تىكۇشاقتار بيىكتىكتەگى شامادان تىس قىسىمعا توتەپ بەرە المايدى. دوستار، قازاقستاندىقتار، مۇنداي جاعدايدا كومەكتەسۋلەرىڭىزدى سۇرايمىز!. ءبىز ءار كۇنىمىزدى ولاردىڭ ءتىرى ەكەنىنە دەگەن ۇمىتپەن وتكىزىپ كەلەمىز. اكەمنىڭ جولداستارى، ولاردىڭ امان-ەسەن ۇيگە ورالۋىنا كومەكتەسىڭىزدەر. بىزگە التىنشى ساناتتاعى تاۋلارعا شىعۋ قۇقىعى بار كاسىبي الپينيستەر قاجەت. وزدەرىڭىزبەن بىرگە تولقۇجات نەمەسە جەكە كۋالىك بولۋى كەرەك. جول قيىن، بىراق ءۇمىت بار. قازىرگى ۋاقىتتا مۇزدىقتا الپينيستەر جوق. مەن سونىمەن قاتار قىرعىزستاننىڭ ەڭ تاجىريبەلى الپينيستەرىنە جۇگىنەمىن»، - دەگەن قىز ءوزىنىڭ بايلانىس ءنومىرىن قالدىردى: 8 707 615 60 42.

مۇرات وتەپباەۆتىڭ الپينيزم بويىنشا 13 جىلدىق تاجىريبەسى بار. ءالپى ازيا كومانداسىنىڭ جاتتىقتىرۋشىسى، ءتورت بالانىڭ اكەسى. ءوز كەزەگىندە ءىىم تجك-ءى ىزدەستىرۋ جۇمىستارىن قر قورعانىس مينيسترلىگىمەن بىرگە جۇرگىزىلىپ جاتقاندىعىن اتاپ ءوتتى. «تىكۇشاقتار دايىن. ءبىز اۋا-رايىنىڭ جاقسارۋىن كۇتەمىز»، - دەدى قر ءىىم توتەنشە جاعداي وكىلدەرى.

سوڭعى جاڭالىقتار