23 شىلدە 2019, 14:40 672 0 جاڭالىقتار Túrkistan Gazeti

اپتاپ ىستىق قاشانعا دەيىن جالعاسادى؟

بيىلعى جاز مەزگىلى بارلىق ايماق تۇرعىندارى ءۇشىن دە وڭايعا سوقپاي تۇر. الاتاۋدىڭ ەتەگىندەگى الماتىنىڭ وزىندە سىناپ باعاناسى تاڭەرتەڭگى ۋاقىتتا – 27-29°س، ال ءتۇس قايتا – 36-38°س-قا دەيىن كوتەرىلۋدە.

ماماندار جاقىن كۇندەردە كۇن-رايى وزگەرمەي، شىلدەنىڭ شىلىڭگىر ىستىعى تامىزدا دا جالعاساتىنىن ايتادى. اپتاپ ىستىق جاڭا تۋعان نارەستەلەر مەن ەگدە جاستاعى ادامدارعا، دەنساۋلىعى سىر بەرگەن جاندارعا اۋىر تيۋدە. قالالىق جەدەل جاردەم قىزمەتىنىڭ وكىلدەرىنىڭ ايتۋىنشا شاقىرۋشىلاردىڭ باسىم بولىگى جوعارىدا اتالعان ازاماتتار ەكەن. الماتى قالاسى مەديتسينالىق جەدەل جاردەم قىزمەتى ديرەكتورىنىڭ مىندەتىن اتقارۋشى ازامات امەنوۆ: «ادەتتە شاقىرتۋلاردىڭ جالپى سانى تاۋلىگىنە 2400 بولسا، قازىرگى تاڭدا ول 2600-3000 شاقىرۋعا دەيىن كوبەيدى. شاقىرتۋلاردىڭ باسىم كوپشىلىگى جۇرەك-قان تامىرلارى جۇيەسىنە بايلانىستى سىرقاتى بار ناۋقاستاردان تۇسەدى. سولاردىڭ قاتارىندا ارتەريالدى گيپەرتەنزيامەن، سۋسامىرمەن اۋىراتىن ناۋقاستار دا بار»، – دەيدى.

الماتىدا مۇنداي ىستىق سوڭعى رەت 2007 جىلى تىركەلگەن. جەتەكشى ينجەنەر-سينوپتيك داۋلەت كەسەباەۆ: «ەگەر تەرمومەتر كورسەتكىشى 40°س-تان اسسا، وندا بۇل كليماتتىق وزگەرىس بولىپ سانالادى. شىلدە جىلدىڭ ەڭ ىستىق ايى بولعاندىقتان، بۇل ادەتتەگى جاعدايعا جاتادى. قالادا ەڭ ىستىق جاز 1983 جىلى تىركەلگەن. ول كەزدە ىستىق 43°س-قا جەتكەن. ال سوڭعى رەت الماتىدا 2007 جىلى 39°س ىستىق بولعان»، – دەيدى.

اپتاپ ىستىقتان ەۋروپانىڭ بىرنەشە ايماعى مەن وڭتۇستىك ازيانىڭ ءبىراز بولىگى جاپا شەگۋدە. فرانتسيادا كۇننىڭ ىسۋىنا بايلانىستى 4 مىڭ مەكتەپ ۋاقىتشا جۇمىسىن توقتاتتى. ەلدىڭ بىرنەشە اۋداندارىندا قاۋىپتىلىكتىڭ قىزىل دەڭگەيى جاريالاندى. مامانداردىڭ ايتۋىنشا، ەلدە اپتاپ ىستىق رەكوردتىق دەڭگەيگە جەتتى. وسىعان وراي جەرگىلىكتى بيلىك ايماقتا توتەنشە جاعدايلاردىڭ الدىن الۋ شارالارىن قولعا العان. بۇنداي جاعداي يتاليادا دا تىركەلىپ وتىر. ال ءۇندىستاننىڭ چەنناي قالاسىندا اپتاپ ىستىقتان اۋىز سۋ قورى تاۋسىلعان. سونىڭ سالدارىنان كوپتەگەن مەكەمەلەر مەن قوناق ءۇي، مەيرامحانالار جابىلعان. دارىگەرلەردىڭ كومەگىنە جۇگىنگەن تۇرعىندار كوبەيدى. جەرگىلىكتى بيلىك تىعىرىقتان شىعۋ ءۇشىن سۋدى شتاتتىڭ وزگە وڭىرلەرىنەن تاسىپ الەك. بىراق 6 ميلليون تۇرعىنى بار قالانى تولىق قامتۋ مۇمكىن ەمەس. سوندىقتان حالىق اراسىندا نارازىلىق كۇشەيگەن. بيلىك بولسا جاعداي تەك جاۋىن جاۋعان كەزدە عانا تۇزەلەتىنىن ايتادى. ال ەلدە بىرنەشە اپتا بويى اۋا تەمپەراتۋراسى 40 گرادۋستان تۇسپەي تۇر. ەلدىڭ سولتۇستىك شىعىسىنداعى بيحار شتاتىندا ىستىققا شىداي الماي وتىزدان استام ادام كوز جۇمعان. بەيرەسمي دەرەكتەرگە سۇيەنسەك نيۋ-دەليدە 50 گرادۋستىق سىناپ باعاناسى تىركەلگەن.

سوڭعى جاڭالىقتار