23 شىلدە, 12:40 384 0 قوعام Túrkistan Gazeti

مەملەكەت قانداي جاعدايدا كرەديتتى تولەپ بەرەدى؟

پرەمەر-ءمينيستردىڭ ورىنباسارى ءارى قارجى ءمينيسترى ءاليحان سمايىلوۆ كوللەكتورلىق بيۋروعا كەتكەن كرەديتتەردى مەملەكەت قانداي جاعدايدا وتەيتىنىن ءتۇسىندىردى.

ءمينيستردىڭ ايتۋىنشا، كەيبىر كرەديتتەر كوللەكتورلارعا بەرىلسە دە، بانكتىڭ بالانسىندا قالا بەرەدى. بۇل جاعدايدا قارىزدىڭ ايىپپۇلى مەن ءوسىمپۇلىن وتەۋ، سونداي-اق تۇرمىسى تومەن ازاماتتاردىڭ بەرەشەگىن 300 مىڭ تەڭگەگە دەيىن شەگەرۋ شارالارى اتقارىلادى. ال ەگەر كرەديت تولىعىمەن كوللەكتورلىق بيۋروعا ساتىلسا، ەشقانداي شارا قولدانىلمايدى. بۇل ازاماتتار قارىزدى دا، ايىپپۇلدى دا وزدەرى تولەيدى.

"بانكتەر مەن ميكروقارجىلاندىرۋ ۇيىمدارى كوللەكتورلارمەن جۇمىس ىستەگەن كەزدە دەبيتورلىق بەرەشەكتى ساتۋى دا، ساتپاۋى دا مۇمكىن. مۇندا ەكى جاعداي كەزدەسەدى. ءبىرىنشى جاعدايدا بانكتەر سوتقا جۇگىنبەي تۇرىپ، كوللەكتورلارعا بەرەشەكتى قايتارۋعا تاپسىرما بەرەدى. وندايدا دەبيتورلىق بەرەشەك بانكتە قالا بەرەدى. سونداي بەرەشەكتى ءبىز وتەيمىز. ال دەبيتورلىق بەرەشەك كوللەكتورلىق اگەنتتىككە ساتىلعان كەزدە، ول بانكتەن كەتەدى، بانكتە قالمايدى. جارلىققا سايكەس بانكتەر مەن ميكروقارجىلاندىرۋ ۇيىمدارىنىڭ بالانسىندا تۇرعان بەرەشەكتەر عانا وتەلەدى", - دەدى سمايىلوۆ ۇكىمەت ۇيىندە وتكەن ءباسپاسوز ءماسليحاتىندا.

ءمينيستردىڭ سوزىنە سۇيەنسەك، بۇگىندە ايىپپۇلدار مەن ءوسىمپۇلداردىڭ جالپى كولەمى 58 ميللياردا تەڭگەدەن اسادى. ونىڭ 70 پروتسەنتىن بانكتەر وزدەرى جاپسا، 30 پروتسەنتى مەملەكەتتىڭ ەسەبىنەن وتەلەدى.

ايتا كەتسەك، قازاقستاندا پرەزيدەنتتىڭ جارلىعى بويىنشا كەپىلسىز كرەديت العان 5 ميلليونعا جۋىق ادامنىڭ ايىپپۇلدارى مەن وسىماقىلارى وتەلەدى. ال تۇرمىسى تومەن ازاماتتار ءۇشىن وسىنداي جەڭىلدىكپەن بىرگە 300 مىڭ تەڭگەگە دەيىنگى قارىز سوماسى كەشىرىلەدى، بىراق كرەديتتىڭ سوماسى 3 ميلليون تەڭگەدەن اسپاۋى قاجەت. تۇرمىسى تومەن ازاماتتاردىڭ قاتارىنا كوپبالالى وتباسىلار، مۇگەدەك بالاسى بار وتباسىلار، اسىراۋشىسىنان ايىرىلعاندار، جەتىم بالالار جانە اتاۋلى الەۋمەتتىك كومەك الاتىندار جاتادى.

سوڭعى جاڭالىقتار