22 شىلدە, 11:37 488 0 ادەبيەت Túrkistan Gazeti

بەلگىلى اقىننىڭ قولجازباسى تابىلدى

بەلگىلى اقىن، اۋدارماشى تۇرماعامبەت ىزتىلەۋوۆتىڭ جاڭا قولجازباسى تابىلدى. بۇل جونىندە تۇركىتانۋشى، فيلولوگيا عىلىمدارىنىڭ كانديداتى، سەرىكباي قوسان ءمالىم ەتتى.

رۋحاني قۇندىلىق تۇڭعىش پرەزيدەنت - ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا قولعا الىنعان يگىلىكتى ءىستىڭ ءبىرى.

«ورتالىق عىلىمي كىتاپحاناسىندا شايىردىڭ ءبىر ءتولتۋما قولجازباسىن كەزىكتىرىپ، تۇپنۇسقانىڭ ەلەكتروندى-ساندىق كوشىرمەسىن الۋدىڭ ءساتى ءتۇستى. ت.ىزتىلەۋۇلىنىڭ بۇل قولجازباسىنىڭ مازمۇنى جاعىنان بۇرىنعى مۇرالارىنان ەلەۋلى ەرەكشەلىگى بار. قولجازبانىڭ كولەمى 139 پاراقتان، 278 بەتتەن قۇرالعان. قولجازبا «ىزتىلەۋوۆ تۇرماعامبەتتىڭ جيناعان ماتەريالدارى» دەپ اتالادى. شىعىستا جاسالىپ، بۇحارا مادەنيەتىنىڭ ستيلىندە وڭدەلگەن. كاردون قاعازبەن تىستالىپ، تۇپتەلگەن قولجازبانىڭ بيىكتىگى – 35, ەنى – 12 سانتيمەتردى قۇرايدى»، - دەدى سەرىكباي قوسان.

سەرىكباي قوساننىڭ ايتۋىنشا، تۇرماعامبەت ىزتىلەۋوۆتىڭ بۇل قولجازباسى شامامەن 20-جىلداردىڭ بەدەرىندە حاتقا تۇسە باستاعان سياقتى. ونىڭ ءبىر دالەلى، قولجازبانىڭ 195-بەتىندە «پرەزيدۋم كازتسيك كسسر. 1927 گ.» دەگەن تاقىرىپپەن ۇكىمەت مۇشەلەرىنىڭ ءتىزىمى بەرىلگەن.

«ونداعى 15 ازاماتتىڭ اراسىندا قازاتكوم توراعاسى ە.ەرنازاروۆ، قازحالكوم كەڭەسىنىڭ توراعاسى ن.نۇرماقوۆ، اۋىل شارۋابانك باستىعى ۇ.قۇلىمبەتوۆ سەكىلدى سول تۇستاعى بەلگىلى تاريحي تۇلعالاردىڭ ەسىمدەرى اتالعان»، - دەدى سەرىكباي قوسان.

سەرىكباي قوسان اقىن-اۋدارماشى تۇرماعامبەت ىزتىلەۋوۆتىڭ وتىزىنشى جىلداردا بيلىك تاراپىنان قۋدالانىپ، ونىڭ جازعان كەيبىر دۇنيەلەرى قولدى بولعانىن ايتادى. سوندىقتان بۇل قولجازبانى ءتيىستى ورىندارعا كىمنىڭ وتكىزگەنى ناقتى ەمەس.

«تۇرماعامبەت ءوزىنىڭ كەيبىر قولجازبالارىن ت.جۇرگەنوۆ سىندى جاقىن ىنىلەرىنە، قالماقان، وتەباي سەكىلدى حاتشىلارىنا سەنىپ قالدىرۋى بەك مۇمكىن. ال سولاردىڭ قايسىبىرى اتالعان ازاماتتاردىڭ قولىمەن كىتاپحانا قويمالارىنا وتكەن شىعار. 30-جىلدارى الماتىدا «اعارتۋ، مادەنيەت قوعامدارى» اشىلىپ، وندا كوپتەگەن قالامگەر قىزمەت اتقاردى. ەل-جەردەن تىلشىلەر تارتىلىپ، حالىق اۋىز ادەبيەتى ۇلگىلەرىنىڭ باي قورى جيناقتالدى. ءسوز بولىپ وتىرعان قولجازبانى اتالعان مەكەمە وكىلدەرىنە تۇرماعامبەتتىڭ ءوزى وتكىزۋى مۇمكىن-اۋ دەگەن دە وي كەلەدى»، - دەدى سەرىكباي قوسان.

سوڭعى جاڭالىقتار