21 شىلدە, 12:42 376 0 قاۋىپسىزدىك Túrkistan Gazeti

پوليتسيانىڭ حالىقتىق كەڭسەسى اشىلدى

ەل تۇرعىندارىنىڭ تىنىشتىعىن كۇزەتىپ، قۇقىقتارىن قورعاپ، قوعامدىق ءتارتىپتى ساقتاۋ، قىلمىسپەن كۇرەسۋ، حالىق پەن مەملەكەت قاۋىپسىزدىگىن قامتاماسىز ەتۋ ىشكى ىستەر ورگاندارىنا مەملەكەت تاراپىنان باسا نازار اۋدارىلۋدا. 

قر تۇڭعىش پرەزيدەنتى – ەلباسى نۇرسۇلتان نازارباەۆ پوليتسيا قىزمەتى جونىندە «نۇر وتان» پارتياسىنىڭ XVI سەزىندەگى سويلەگەن سوزىندە: «پوليتسيا – قوعامنىڭ وزىنە دەگەن سەنىمىن ارتتىراتىنداي ەتىپ جۇمىس ىستەۋى كەرەك» دەگەن تاپسىرما جۇكتەسە، مەملەكەت باسشىسى قاسىم-جومارت توقاەۆ «پوليتسيانىڭ جۇمىسى قوعامنىڭ ءجىتى نازارىندا. سىزدەردىڭ قىزمەتتەرىڭىز ەل ازاماتتارىنىڭ مۇددەلەرىمەن جانە قاۋىپسىزدىگىمەن تىعىز بايلانىستى. بۇل ءۇشىن حالىقپەن تىعىز بايلانىس قاجەت.  پوليتسياعا قويىلاتىن نەگىزگى تالاپ – ءتيىمدى جۇمىس. ال، ونىڭ تيىمدىلىگىن باعالاۋدىڭ باستى شارتى – حالىق سەنىمى» دەپ، ەلباسىنىڭ باستاعان قۇقىق قورعاۋ جۇيەسىندەگى رەفورمانى جالعاستىرۋدى ۇسىنعان.

وسى ماقساتتا قۇقىق قورعاۋ ورگاندارىنىڭ جۇمىسىن جۇيەلەندىرۋ، حالىقپەن  تىعىز قارىم-قاتىناستا جۇمىس جاساۋ ماقساتىندا جول كارتاسى قابىلدانعان. جول كارتاسىندا كوتەرىلگەن مىندەتتەردى جۇزەگە اسىرۋ، ىشكى ىستەر سالاسىندا جۇرگىزىلەتىن جۇمىستاردىڭ اشىقتىعى مەن جاريالىلىعىن قامتاماسىز ەتۋ، تۇرعىنداردىڭ كورسەتىلەتىن قىزمەتتەر الۋىنا قولايلى جاعداي جاساۋ ماقساتىندا پوليتسيانىڭ حالىقتىق كەڭسەسىن اشۋ قولعا الىنعان بولاتىن.
بۇگىن اۋدان اكىمدىگى مەن پوليتسيا ءبولىمىنىڭ بىرلەسە جۇرگىزىلگەن جۇمىستارىنىڭ ناتيجەسىندە وتىرار اۋداندىق پوليتسيا ءبولىمىنىڭ حالىقتىق كەڭسەسى اشىلدى. يگى شارانىڭ اشىلۋىنا تۇركىستان وبلىستىق پوليتسيا دەپارتامەنتىنىڭ باستىعى، پوليتسيا گەنەرال-مايورى قايرات دالبەكوۆ جانە اۋدان اكىمى ەرلان ايتاحانوۆتار قاتىسىپ، ىزگى تىلەكتەرىن جەتكىزدى.

حالىقتىق كەڭسەنىڭ اشىلۋىنا ارنايى كەلگەن دەپارتامەنت باستىعى ىشكى ىستەر سالاسىندا حالىقپەن تىعىز قارىم-قاتىناس جاساۋ، جۇرگىزىلەتىن جۇمىستاردى جەڭىلدەتۋ ماقساتىندا كورسەتكەن قولداۋى ءۇشىن وتىرار اۋدانىنىڭ اكىمدىگىنە العىسىن جەتكىزىپ، قاسيەتتى ولكەدە اشىلعان حالىقتىق كەڭسە تۇرعىندارعا ساپالى قىزمەت كورسەتەدى دەگەن سەنىمىن ءبىلدىردى.

سونىمەن قاتار، قايرات سۇلتانبايۇلى «جول كارتاسى» اياسىندا وتىرار اۋدانىندا قۇرىلعان تۋريستىك پوليتسياعا ارنايى جابدىقتالعان ەلەكتروموبيل تابىستادى. ال، اۋدان اكىمى ەرلان ايتاحانوۆ «كەز-كەلگەن يگى ىستەردىڭ قاسيەتتى وتىراردان باستاۋ الۋى تاريح بەتتەرىندەگى ءداستۇر مەن زاڭدىلىققا اينالعانى ءسوزسىز. حالىق پەن قۇقىق قورعاۋ ورگاندارى تىعىز بايلانىستا جۇمىس جۇرگىزەتىن حالىقتىق كەڭسە وبلىسىمىزدا العاشقىلاردىڭ ءبىرى بولىپ اۋدانىمىزدا اشىلىپ، تۇرعىندارعا قاجەتتى كەڭەستەرى مەن قىزمەتتەرىن كورسەتپەك» دەپ، الداعى جۇمىستارعا ساتتىلىك تىلەدى.

قۋانىشتى ساتتە ەل اعاسى، ىشكى ىستەر ورگاندارىنىڭ ارداگەرى جۇماحان ابدىقادىروۆ باتا بەرسە، جيىن سوڭى اۋدان ونەرپازدارىنىڭ ءان شاشۋىمەن جالعاسىن تاپتى.

سوڭعى جاڭالىقتار