19 شىلدە, 16:40 369 0 جاڭالىقتار Túrkistan Gazeti

سەنات دەپۋتاتتارىنىڭ اۋىلعا ساپارى

باتىس قازاقستان وبلىسىندا جۇمىس بابىنداعى ساپاردا جۇرگەن پارلامەنت سەناتىنىڭ دەپۋتاتتارى ەربولات مۇقاەۆ پەن ناريمان تورەعاليەۆ سىرىم اۋدانىندا بولىپ، اتاۋلى الەۋمەتتىك كومەكتى جاڭا ۇلگىدە الىپ وتىرعان انالارمەن كەزدەستى.

بيىل اۋداندا اتاۋلى الەۋمەتتىك كومەك جاڭا ۇلگى بويىنشا 469 جانۇياعا تاعايىندالعان. كەزدەسۋدە وتباسىلاردىڭ اتىنان ءسوز العان انالار مەملەكەت تاراپىنان بەرىلگەن مۇمكىندىكتەردى بالالاردىڭ ءبىلىم الۋى، اۋلاداعى ءوندىرىس جانە تۇرعىن ءۇي ماسەلەلەرىن شەشۋ جولىندا پايدالانىپ جاتقاندارىن ايتتى.

«الەۋمەتتىك كومەكتى قارجىلاي تابىس دەپ ەمەس، باقۋاتتى ومىرگە جەتۋ جولىنداعى كومەك دەپ ءتۇسىنۋ كەرەك. قاي ماسەلەنىڭ دە الەۋمەتتىك ءارى قۇقىقتىق قىرى بولادى. جاڭا ۇلگىدەگى اتاۋلى الەۋمەتتىك كومەكتى الۋ بارىسىندا دا قۇقىقتىق ماسەلەلەر ورىن الىپ جاتقانى جاسىرىن ەمەس. تابىسىن جاسىرۋ، كومەك تيەسىلى بولۋى ءۇشىن قاساقانا اجىراسۋ سەكىلدى جايتتار ءبىزدى قاتتى الاڭداتادى. ءبىز جانۇيالاردا بالالاردى ەڭبەككە باۋلۋدى وتىنەر ەدىك. مەملەكەت ءۇشىن ەڭ قاۋىپتى نارسە – تاربيەلەنبەگەن بالا. بالالار اتا-اناسىنان ۇكىمەتكە ارقا سۇيەي بەرۋدى، ۇنەمى بىرەۋدەن قولداۋ، دەمەۋ كۇتۋدى ۇيرەنبەي، ءوز بەتتەرىمەن ادامدىق جولىنا ءتۇسۋدى ۇيرەنسە ەكەن»، – دەدى سەناتور ەربولات مۇقاەۆ.

سەناتورلار اۋىل اقساقالدارىمەن، شارۋالارمەن جانە وكرۋگ اكىمدەرىمەن جۇزدەستى. اۋداندىق ارداگەرلەر كەڭەسىنىڭ توراعاسى انۋاربەك عالىموۆتىڭ كوتەرگەن ماسەلەسى تەك سىرىم اۋدانىنىڭ عانا ەمەس، ەلدەگى بارلىق قاريالارعا ورتاق بولدى. «1938 جىلدان باستاپ تۋىلعان ارداگەرلەرگە شيپاجايدا دەمالۋ مۇمكىندىگىن قاراستىرۋ كەرەك. زاڭعا وزگەرىس ەنگىزىلسە دەگەن ۇسىنىس ايتامىز»، - دەدى ول. اۋداندىق ارداگەرلەر كەڭەسىنىڭ مۇشەسى سىدىق تاجمۇقان نەسيەلەرگە ديففەرەنتسياتسيا جاساۋ، سونىمەن قاتار، جوبالىق سمەتالىق قۇجاتتامانىڭ مەرزىمى ءوتىپ كەتكەن جاعدايدا، جوبانى كەرى جاساقتاماۋ ءۇشىن تەك قانا باعاسىنا تۇزەتۋ ەنگىزۋ قاجەتتىگىن ۇسىندى. بۇل مەملەكەتتىڭ قارجىسى مەن ۋاقىتىن ۇنەمدەۋگە ۇلەس بولار ەدى دەدى ول. سونداي-اق تۇرعىنداردىڭ سۋدى ۇنەمدەپ پايدالانۋ، سۋ جۇيەسىن جاڭارتۋعا قوسىمشا قاراجات ءبولۋ، بالىق شارۋاشىلىعىنا بىرىڭعاي نەسيە بەرەتىن بانك اشۋ قاجەتتىلىگى ايتىلدى.

«قازىرگى تاڭدا كوپتەگەن شارۋالار مالدى جەكە تۇرعىنداردان الادى. شارۋا قوجالىقتارعا مال العانعا ۇكىمەت تاراپىنان سۋبسيديا تولەنەدى. وسىنداي دەمەۋ قارجى جەكە اۋىل تۇرعىندارىنا دا تولەنسە دەيمىز. اۋدان اۋماعىنداعى ورىن الاتىن توتەنشە جاعدايلار بايلانىستى جاقسى ساپالى تەحنيكا الىپ بەرۋ مۇمكىندىگىن قاراستىرۋدى دا سۇرايمىز. اسىل تۇقىمدى مال باسىنا بولىنەتىن سۋبسيديا تولەۋ ماسەلەسى دە نازارلارىڭىزدا بولسىن»، - دەدى كاسىپكەر عانيمات نۇرمۇحانوۆ. اۋداندىق ءماسليحات دەپۋتاتى ۆلاديمير دجۋماگاليەۆ قىس مەزگىلىندە جولدى كۇتىپ ۇستاۋ ءۇشىن شارۋا قوجالىقتارىمەن كەلىسىمشارت جاساقتالاتىنىن، سول جۇمىستى جۇرگىزۋگە بولىنەتىن قارجى تولىعىمەن الدىن-الا اۋدارىلسا دەگەن ۇسىنىستى ايتتى. ۆ.دجۋماگاليەۆ الدىڭعى ۇسىنىستارمەن ۇندەس «جۇمىسسىز جۇرگەن ازاماتتارعا» ارنالعان ارنايى زاڭ شىعارۋ، كاسىپتىك-تەحنيكالىق ءبىلىم العان جاس مامانداردى اۋىلعا جۇمىسقا تارتقان كەزدە 4-5 جىلعا كەلىسىمشارتقا وتىرعىزۋ ماسەلەلەرىن دە قوزعادى. سەنات دەپۋتاتتارىمەن بولعان كەزدەسۋدە سىرىمدىقتار اۋدان ورتالىعىنان 300-400 بالاعا ارنالعان گيمنازيا سالۋعا كومەكتەسۋدى سۇرادى.

كەزدەسۋدەن كەيىن سەناتورلار جىمپيتىدا «بيزنەستىڭ جول كارتاسى 2020» باعدارلاماسى ارقىلى جۇزەگە اسىرىلعان كاسىپكەرلىك جوبا – «ەۆەرەست» سۋپەرماركەتىندە بولىپ، ساۋدا ورتالىعىنىڭ جۇمىسىمەن تانىستى. سەنات دەپۋتاتتارى سۋپەرماركەتتەگى باعالارعا نازار اۋدارىپ، كاسىپكەرلەرگە تاۋار باعالارىن تۇراقتى ءارى قولجەتىمدى بولۋى تۋرالى ايتتى.

سوڭعى جاڭالىقتار