19 شىلدە, 14:48 427 0 بىلگەنگە مارجان Túrkistan Gazeti

اكەسىنىڭ قابىرىن 76 جىلدان كەيىن ىزدەپ تاپتى

سەمەيدە 1942 جىلى ۇلى وتان سوعىسىنا شاقىرتۋ العان سوعىس ارداگەرى سارتاي بەيىمبەتوۆتىڭ قابىرىنەن الىنعان توپىراق تۋعان جەرىنە جەرلەندى.

ءىس-ءتۇزسىز جوعالعان ارداگەرگە تۋىستارى سوڭعى 7 جىل بويى ىزدەۋ سالعان. ناتيجەسىندە ارداگەردىڭ رەسەي فەدەراتسياسى كالينين وبلىسى، ستاريتسكي اۋدانى، لەبەدەۆو اۋىلىندا جەرلەنگەنى انىقتالدى. قورعانىس مينيسترلىگى ورتالىق مۇراعاتىنىڭ حابارلاۋىنشا، ارداگەر 1943 جىلى العان جاراقاتىنان قايتىس بولعان.

ول ءوزىنىڭ جاۋىنگەرلىك مىندەتىن قىزىل اسكەر قۇرامىندا 653 اتقىشتار پولكىندە، 102-ءشى ديۆيزيادا وتەگەن.

«مەن ءوزىمدى باقىتتىمىن دەپ سانايمىن. وسى ۋاقىتقا دەيىن كوزىم جاستان قۇرعاماي، اكەم جايلى شىندىقتى بىلمەي كەتەم بە دەگەن ويمەن ءجۇردىم. كوڭىلىم بۇگىن ورنىنا ءتۇستى. اكەم رەسەي فەدەراتسياسىنىڭ لەبەدەۆو اۋىلىندا جەرلەنىپتى. جاسىم 82-گە كەلسە دە، باسىنا بارىپ، قۇران باعىشتادىم. ەسكەرتكىشىن كوردىم. بارشا اتسالىسقان جاندارعا ايتار العىسىم شەكسىز. كەيىنگى ۇرپاق سوعىس اتاۋلىنى كورمەي، بەيبىتشىلىكتە ءومىر سۇرسە دەيمىن»،- دەيدى ارداگەردىڭ قىزى شايجامال سارتايقىزى.

سارتاي بەيىمبەتوۆتىڭ تۋىستارى مارقۇمنىڭ قابىرىنەن ءبىر ۋىس توپىراعىن الىپ، سەمەيدەن 30 شاقىرىم جەردە ورنالاسقان تۋعان جەرىنە اپارىپ جەرلەدى.

 

سوڭعى جاڭالىقتار