17 شىلدە, 19:22 492 0 ىشكى ساياسات Túrkistan Gazeti

ۇلتتىق كەڭەس قۇرامى قالاي جاساقتالعانى بەلگىلى بولدى

ورتالىق كوممۋنيكاتسيالار قىزمەتىندە ۇلتتىق قوعامدىق كەڭەستىڭ مۇشەلەرى ۇيىمنىڭ الدىنا قويىلىپ وتىرعان مىندەتتەر تۋرالى ءمالىم ەتتى.

قر پرەزيدەنتىنىڭ كەڭەسشىسى، ۇلتتىق قوعامدىق كەڭەستىڭ حاتشىسى ەرلان قارين ۇلتتىق كەڭەستىڭ قر پرەزيدەنتى جانىنداعى كونسۋلتاتيۆتى كەڭەسشى ورگان بولاتىنىن ايتتى.

«كەڭەستىڭ نەگىزگى ماقساتى – جۇرتشىلىقتىڭ، ساياسي پارتيالاردىڭ ازاماتتىق قوعام وكىلدەرىنىڭ قاتىسۋىمەن مەملەكەتتىك ساياساتقا قاتىستى وزەكتى، ماڭىزدى ماسەلەلەرگە قاتىستى ۇسىنىمداردى تۇجىرىمداۋ. نەگىزگى مىندەتتەرى - مەملەكەتتىك باعدارلامالار مەن نورماتيۆتىك-قۇقىقتىق اكتىلەردىڭ جوبالارىنا قوعامدىق ساراپتاما جۇرگىزۋ جانە جۇرتشىلىقتىڭ، ازاماتتىق قوعامنىڭ پىكىرىن ەسكەرە وتىرىپ، ماڭىزدى پروبلەمالاردى تالقىلاۋ. جۇرتشىلىقتىڭ، ساياسي پارتيالاردىڭ، ۇكىمەتتىك ەمەس سەكتور مەن مەملەكەتتىك ورگاندار وكىلدەرى اراسىندا سىندارلى ديالوگتى قامتاماسىز ەتۋ. ۇلتتىق كەڭەستىڭ توراعاسى پرەزيدەنتتىڭ ءوزى بولىپ تابىلادى»، - دەدى ەرلان قارين.

كەڭەس حاتشىسى ۇيىمنىڭ قۇرامىنا ساياسي پارتيالار، قوعامدىق ۇيىمدار وكىلدەرى كىرگەنىن ايتادى.

«كەڭەستىڭ قۇرامىن انىقتاۋ ءۇشىن سوڭعى ءبىر ايدا كونسۋلتاتسيالار وتكىزىلگەن بولاتىن. سول كونسۋلتاتسيالاردا ايتىلعان پىكىرلەردى جۇيەلەپ، وسىنداي شەشىمگە كەلدىك. قوعام بەلسەندىلەرى مىنانداي تارتىپكە سايكەس ىرىكتەلدى. ۇزاق ۋاقىت بويى قوعامدىق ماڭىزى بار ماسەلەلەردى تۇراقتى كوتەرىپ جۇرگەن بەلسەندىلەر، ناقتى ءبىر سالا بويىنشا شۇعىلدانىپ جۇرگەن كاسىبي ماماندار كەڭەسكە كىردى. ولار قوعامنىڭ بارلىق سالاسىنان ىرىكتەلدى. ساياسي-قوعامدىق الاڭداردىڭ، ءتۇرلى ساياسي كۇشتەردىڭ وكىلدەرىن تارتۋعا تىرىستىق. ەسكى وپپوزيتسيا وكىلدەرى دە، جاڭا قالىپتاسىپ كەلە جاتقان قارسى توپتاردىڭ وكىلدەرى دە بار»، - دەدى ول.

ەسكە سالساق، قر پرەزيدەنتى قاسىم-جومارت توقاەۆ ەلورداداعى ۇلىقتاۋ راسىمىندە ۇلتتىق قوعامدىق سەنىم كەڭەسىن قۇرۋ كەرەكتىگى تۋرالى العاش ايتقان بولاتىن.

سوڭعى جاڭالىقتار