16 شىلدە, 12:55 398 0 ىشكى ساياسات Túrkistan Gazeti

تالايدان جىر بولعان جەر داۋى شەشىلدى

شىعىس قازاقستاندا ەكى جىل بويى جول قۇرىلىسىنا كەدەرگى بولعان جەر داۋى شەشىمىن تاپتى. بۇل تۋرالى قر يندۋستريا جانە ينفراقۇرىلىمدىق دامۋ مينيسترلىگى «قازاقپاراتتىڭ» رەسمي ساۋالىنا بەرگەن جاۋابىندا ايتتى.

وسكەمەن-راحمان قاينارى باعىتىنداعى جولدىڭ وسينوۆ يرەگى دەپ اتالاتىن تۇسى ەڭ قاۋىپتى بولىك سانالادى. وسى يرەكتى اينالىپ وتەتىن تىكە جولدىڭ قۇرىلىسى 2017 جىلى باستالعان بولاتىن. كەيىن جولدىڭ كەيبىر بولىگى ورمان قورىنا كىرەتىندىكتەن، قۇرىلىس جۇمىسى كەشەۋىلدەپ قالعان. اۋىل شارۋاشىلىعى مينيسترلىگى مەملەكەتتىك ورمان قورىنداعى جەردى قۇرىلىسقا پايدالانۋعا رۇقسات بەرمەگەن. سالدارىنان ەنى 177 مەتر بولاتىن، تەرەڭدىگى كەي تۇستاردا 45 مەتردەن اساتىن سايعا كوپىر سالۋ جۇمىسى ورتا جولدا توقتاتىلعان.

قر يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتى بويىنشا، وسى ماسەلەنى ءبىرجولا شەشەتىن ۇكىمەت قاۋلىسى شىعىپتى.

«قازاقستان رەسپۋبليكاسى ۇكىمەتىنىڭ قاۋلىسىنا سايكەس شىعىس قازاقستان وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى «وسكەمەن ورمان شارۋاشىلىعى» كوممۋنالدىق مەملەكەتتىك مەكەمەسىنىڭ ورمان قورى جەرلەرى ساناتىنان جالپى اۋدانى 1,55 جانە 24,3 گەكتار جەر ۋچاسكەلەرى ونەركاسىپ، كولىك، بايلانىس جەرلەرى، عارىش قىزمەتى، قورعانىس، ۇلتتىق قاۋىپسىزدىك مۇقتاجدىقتارىنا ارنالعان جانە وزگە دە اۋىل شارۋاشىلىعىنا ارنالماعان جەرلەر ساناتىنا اۋىستىرىلدى. وسى قاۋلىنىڭ 1-تارماعىندا كورسەتىلگەن جەر ۋچاسكەلەرىن رەسپۋبليكالىق ماڭىزى بار «وسكەمەن – التاي – ۇلكەن نارىن – كاتونقاراعاي – راحمان قاينارى» اۆتوموبيل جولىنىڭ (72-88 كم) جانە (56-72 كم) ۋچاسكەلەرىن رەكونسترۋكتسيالاۋ ءۇشىن «قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگىنىڭ اۆتوموبيل جولدارى كوميتەتى» رەسپۋبليكالىق مەملەكەتتىك مەكەمەسىنە بەرىلۋى قامتاماسىز ەتىلدى. قازىرگى تاڭدا جوعارىدا اتالعان ۋاستكەدە قۇرىلىس جۇمىستارى تولىقتاي جۇرگىزىلۋدە»، - دەلىنگەن رەسمي مالىمەتتە.

 

سوڭعى جاڭالىقتار