15 شىلدە, 11:33 392 0 ىشكى ساياسات Túrkistan Gazeti

زاۋىتبەك تۇرىسبەكوۆ: «الەمدەگى بار قازاقتى ساقتاۋ – ۇلت يدەياسى بولۋ كەرەك!»

جۋىردا نۇر-سۇلتان قالاسىنداعى «نازارباەۆ زياتكەرلىك مەكتەبىندە» «ۇلى دالا ۇرپاعى» اتتى جازعى مەكتەپ جۇمىستارى اياسىندا قازاق حالقىنىڭ ءداستۇرى مەن رۋحاني مادەنيەتى جايلى لەكتسيا ءوتتى.

ۇيىمداستىرىلعان شارا بارىسىندا «دۇنيەجۇزى قازاقتارى قاۋىمداستىعى» مەن «وتانداستار قورى» كەاق-نىڭ وكىلدەرى ۇلتتىق ءداستۇردىڭ ءمان-ماعىناسى تۋرالى، قازاقستاننىڭ باي مادەني مۇراسى تۋرالى تانىمدىق تۇرعىدا ايتتى. قازاق اندەرى مەن دومبىراسى تۋرالى قر مادەنيەت قايراتكەرى، موڭعوليانىڭ ەڭبەك سىڭىرگەن ءارتىسى مەرۋەش باشاي اڭگىمەلەدى.

«دۇنيەجۇزى قازاقتارى قاۋىمداستىعى مەن «وتانداستار قورى» كەاق كوتەرگەن شەت ەلدەردەگى قازاقتاردىڭ بالالارىنا ارنالعان «ۇلى دالا ۇرپاعى» اتتى جازعى مەكتەپ جوباسى نۇر-سۇلتان قالاسىنداعى «نازارباەۆ زياتكەرلىك مەكتەبى» ۇيىمىندا العاش رەت ىسكە اسىرىلىپ وتىر. استانامىزعا رەسەي، يران، موڭعوليا، تۇركمەنستان، تاجىكستان، وزبەكستان جانە قىرعىزستانداعى قازاق دياسپورالارىنىڭ 150 بالاسى جينالدى.

10 شىلدە كۇنى جازعى مەكتەپتىڭ سالتاناتتى اشىلۋىندا دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ قازاقستاننىڭ تۇڭعىش پرەزيدەنتى، ەلباسى ن.ءا. نازارباەۆتىڭ شەت ەلدەردە تۇراتىن قازاق دياسپوراسى بالالارىنىڭ انا تىلىندە وقۋىنا، ءبىلىم الۋىنا، تاريحي وتانىمەن مادەني-گۋمانيتارلىق قارىم-قاتىناستارىن ارتتىرۋعا بەرگەن تاپسىرمالارىنا سايكەس وسى جوسپارلاردىڭ ىسكە اسىرىلىپ جاتقاندارىن مالىمدەدى.

سونىمەن قاتار، وتكەن ايدا «وتانداستار قورىمەن» بىرلەسىپ وتكىزگەن ەۋروپا قازاقتارىنىڭ كىشى قۇرىلتايى، حالىقارالىق ونەر فەستيۆالى جانە الەمنىڭ وننان استام مەملەكەتتەرىنەن شاقىرىلعان تالانتتى قازاق جاستارىن قاتىستىرىلعان «قاسيەتتى قازاق ەلى» دوڭگەلەك ۇستەلى تۋرالى ايتىپ بەردى. مۇنىمەن قوسا الداعى تامىز ايىندا «بالداۋرەن» رەسپۋبليكالىق وقۋ-ساۋىقتىرۋ ورتالىعىندا وتەتىن بالالار قۇرىلتايىنا رەسەي، وزبەكستان، قىرعىزستان، قىتاي، يران جانە گەرمانيا ەلدەرىندەگى قازاق دياسپورالارىنىڭ 288 بالاسى قاتىسادى.

«شەت ەلدەردە تۇراتىن قانداستارىمىزدىڭ انا ءتىلى مەن قازاقتىڭ ۇلتتىق ءداستۇرى، اسىرەسە جاس ۇرپاق اراسىندا ساقتالۋىنا بارىنشا قامقورلىق جاساۋ دۇنيەجۇزى قازاقتارى قاۋىمداستىعىنىڭ باستى مىندەتتەرىنىڭ ءبىرى بولىپ سانالادى. الەمدەگى بار قازاقتى ساقتاۋ – ۇلت يدەياسى بولۋ كەرەك!»، - دەپ اتاپ ءوتتى زاۋىتبەك تۇرىسبەكوۆ.

ەكى اپتاعا سوزىلاتىن جازعى مەكتەپتىڭ باعدارلاماسىندا انا ءتىلىن دامىتۋ، قازاقستان تاريحىن وقىتۋ، قازاق حالقىنىڭ ادەت-عۇرىپ داستۇرىمەن تانىستىرۋ قامتىلعان. بالالاردى مۇراجايلار، تاريحي ورىنداردىمەن تانىستىرىپ، ەلورداداعى الدىڭعى قاتارلى جوعارعى وقۋ ورىندارىن ارالاۋ، ۇلتتىق اسپاپتاردى ۇيرەتۋ، قولدانبالى جانە بي ونەرىنە باۋلۋ، ۇلتتىق تاعامداردى دايىنداۋ سياقتى شەبەرلىكتەرگە ۇيرەتۋ قاراستىرىلعان

سوڭعى جاڭالىقتار