15 شىلدە 2019, 10:52 820 0 ونەر Túrkistan Gazeti

«Baqytty bala»-لار ميلليونەر اتاندى

اقتوبەدە «Baqytty bala» ۆوكالدىق كونكۋرسىنىڭ جەڭىمپازدارى انىقتالدى. 

سالتاناتى شارا بارىسىندا  اقتوبە وبلىسىنىڭ اكىمى وڭداسىن ورازالين ءوزىنىڭ قۇتتىقتاۋىن قازاق، ورىس، اعىلشىن تىلىندە جالعاستىرىپ، فەستيۆالگە قاتىسۋشىلار مەن جينالعان كورەرمەندەرگە، قازىلار القاسىنا العىسىن ءبىلدىردى.

«ءار اتا-انا ءۇشىن ومىرىندەگى ەڭ ۇلكەن باقىت – ۇرپاق ءوسىرۋ، بالا تاربيەلەۋ. بۇگىنگى بالا - ەلدىڭ ەرتەڭى، بولاشاعى، ۇلتتىڭ جالعاسى. قاي مەملەكەت بولماسىن بالا تاربيەسىنە ەرەكشە كوڭىل بولەتىنى ءسوزسىز. بۇگىنگى تاڭدا ەلىمىزدە بالالاردىڭ باقىتتى بالالىق شاعىن الاڭسىز وتكىزۋىنە ارنالعان كوپتەگەن الەۋمەتتىك جوبالار بار. بيىلعى جاستار جىلىنىڭ اياسىندا ارايلى اقتوبەمىزدىڭ برەندىنە اينالعان «Baqytty Bala» اشىق بالالار ۆوكالدىق فەستيۆال-بايقاۋى يگى داستۇرگە اينالىپ، ەكىنشى رەت ۇيىمداستىرىلىپ وتىر. سونىمەن بىرگە، بۇل بايقاۋ ءوز ونەرىمەن دۇنيە ءجۇزىن مويىنداتقان داڭقتى جەرلەسىمىز ديماش قۇدايبەرگەننىڭ ارتىنان ەرگەن ءىزباسارلارىنا جول اشتى. بىلتىرعى بايقاۋدا جاس ءانشى ەرجان ماقسىمنىڭ باس جۇلدەگە يە بولىپ، قازىرگى تاڭدا ۇلكەن ساحنالاردا ونەر كورسەتىپ جۇرگەنىن ماقتانىشپەن ايتا الامىز. بۇل بايقاۋ قانشاما جاس تالانتتاردىڭ ەسىمدەرىن الەمگە تانىتاتىن دوستىق مەكەنىنە اينالدى»، - دەدى وبلىس باسشىسى.

بيىلعى جىلعى 10-14 شىلدە ارالىعىندا اقتوبە قالاسىنىڭ 150 جىلدىق مەرەيتويىنا وراي وبلىس اكىمدىگىنىڭ جانە «ديماش-الي» پروديۋسەرلىك ورتالىعىنىڭ قولداۋىمەن «Baqytty Bala - 2019» ەكىنشى بالالار اشىق ۆوكالدىق فەستيۆال-بايقاۋى وتكىزىلدى. داستۇرگە اينالعان بايقاۋعا قاتىسقىسى كەلەتىن جاستاردىڭ سانى جىل سايىن كوبەيىپ كەلەدى. فەستيۆالدى ۇيىمداستىرۋ كوميتەتى قازاقستان، وزبەكستان، قىرعىزستان، رەسەي، ۋكراينا، بەلارۋسسيا، مولدوۆا، تۇركيا، گرەتسيا، پولشا جانە كانادادان كەلىپ تۇسكەن وتىنىشتەرمەن قوسا 500-دەن استام حاتتاردى الدى

باس جۇلدە ەكى ونەرپازعا بۇيىردى. ولار رەسەيدىڭ تيۋمەن قالاسىنان كەلگەن يسلام بالكوەۆ پەن نۇر - سۇلتان قالاسىنىڭ قاتىسۋشىسى ايگەرىم تىلەۋبەك. ولاردىڭ ارقايسىسىنا 1 ميلليون تەڭگەدەن سىي بەرىلدى.

«بالالار كەرەمەت ونەر كورسەتتى. سوندىقتان ءبىز قايسىسىن تاڭدارىمىزدى بىلمەي، قينالدىق»، - دەدى ادىلقازى مۇشەسى ايدا نيكولايچۋك. ءىىى-ورىندى الماتىلىق قاراقات باشانوۆا مەن قوستانايلىق يساتاي بولاتحان، ءىى-ورىندى ۋكراينالىق دارينا گاليتسكايا مەن اقتوبەلىك اڭسار ءجۇسىپ، ءى-ورىندى رەسەيدىڭ تۋلا قالاسىنان كەلگەن ماريا پانيۋكوۆا مەن الماتىلىق نۇرلىبەك ساپارباي يەلەندى.

ءۇشىنشى ورىنعا 100 مىڭ تەڭگە، ەكىنشى ورىنعا 150 مىڭ تەڭگە، ءبىرىنشى ورىنعا 250 مىڭ تەڭگەنىڭ سەرتيفيكاتى بەرىلدى.

ايتا كەتەيىك، جەڭىمپاز ايگەرىم تىلەۋبەك ديماشتىڭ ءبىر كونتسەرتىندە ءان شىرقايتىن بولدى. ديماش قۇدايبەرگەن گالا كونتسەرتتە «ۇمىتىلماس كۇن» ءانىن ورىندادى.

سوڭعى جاڭالىقتار