12 شىلدە, 15:11 443 0 جاڭالىقتار Túrkistan Gazeti

زاڭسىز قارۋ-جاراق ساتۋشىلار جازالانادى

اتىس قارۋىن پايدالانۋمەن جاسالاتىن قىلمىستارعا قارسى ءىس-قيمىل ماقساتىندا پوليتسيا قىزمەتكەرلەرى قارۋدىڭ، وق-دارىلەردىڭ جولىن كەسۋ جانە ولاردى زاڭسىز اينالىمنان الۋ بويىنشا ءىس-شارالاردى جۇرگىزىپ جاتىر، دەپ حابارلادى قر ءىىم ءباسپاسوز قىزمەتى.

«جالپى، قازاقستان بويىنشا 84 ماقساتتى باعىتتالعان جەدەل-پروفيلاكتيكالىق ءىس-شارا (41 «قارۋ» ءجپىش جانە 45 «قۇقىقتىق ءتارتىپ» ءجپىش) وتكىزىلدى، ونىڭ بارىسىندا زاڭسىز اينالىمنان 3277 بىرلىك قارۋ تاركىلەندى. ونىڭ ىشىندە وسى جىلدىڭ ءساۋىر ايىنان بەرى جۇرگىزىلىپ جاتقان قارۋدى قايتارۋسىز تاپسىرۋ اكتسيالارى شەڭبەرىندە ازاماتتاردان 1973 بىرلىك اتىس قارۋى ساتىپ الىندى»، – دەلىنگەن ۆەدومستۆونىڭ حابارلاماسىندا.

جىل باسىنان بەرى اتىس قارۋىنىڭ زاڭسىز اينالىمىمەن بايلانىستى قىلمىستار بويىنشا 844 قىلمىستىق ءىس قوزعالدى. كريمينالدىق پوليتسيا بولىنىستەرى ارنايى ءىس-شارالار جۇرگىزۋ كەزىندە 53 بىرلىك قىسقا ۇڭعىلى اتىس قارۋىن، اۆتومات، 12 ويىق كارابين، 157 تەگىس ۇڭعىلى قارۋ، 60 شولاق مىلتىق، سونداي-اق وق-دارىلەر الدى.

جاسىرىن پروكسي سەرۆەرلەردى ينتەرنەت جەلىسىندە، سونداي-اق كريپتوۆاليۋتانى جانە Kiwi ءامياندى پايدالانۋمەن قارۋ جانە وق-دارىلەردى ساتۋدى مونيتورينگىلەۋ كەزىندە پوليتسيا قىزمەتكەرلەرى قارۋ مەن وق-دارىلەر ساتاتىن 34 شەتەلدىك ينتەرنەت-رەسۋرستى انىقتادى، ولاردىڭ جارتىسى بلوكتالدى، باسقالارى بويىنشا جۇمىس جالعاسۋدا.

اتالعان رەسۋرستاردىڭ باسىم بولىگى «ۆكونتاكتە» الەۋمەتتىك جەلىسىندە جانە حابارلاندىرۋلار سايتىندا، جارتىسى جابىق جەلىلەردە انىقتالدى. بۇل باعىتتا جۇمىس جالعاسۋدا.

تەگتەر زاڭ قارۋ

سوڭعى جاڭالىقتار