14 شىلدە, 17:59 430 0 بىلگەنگە مارجان Túrkistan Gazeti

"التىن ادام" ماكەدونيادا

قازاقستان رەسپۋبليكاسى ۇلتتىق مۋزەيى 2019 جىلعى 11 شىلدەدە سولتۇستىك ماكەدونيا رەسپۋبليكاسىنىڭ ۇلتتىق ارحەولوگيالىق مۋزەيىندە «ۇلى دالا: تاريح جانە مادەنيەت» كورمەسىن اشتى.

كورمە «التىن ادامنىڭ الەم مۋزەيلەرىنە شەرۋى» حالىقارالىق كورمە جوباسى اياسىندا ۇيىمداستىرىلىپ وتىر.

كورمەگە قازاقستان رەسپۋبليكاسىنىڭ سيمۆولى سانالاتىن «التىن ادام» قويىلدى. كورمەنىڭ ماقساتى – قازاقستاننىڭ تاريحي-مادەني باي مۇراسىمەن شەتەلدىك كورەرمەندى تانىستىرۋ.

سولتۇستىك ماكەدونيانىڭ ۇلتتىق ارحەولوگيالىق مۋزەيىندەگى كورمەدەن كيىمى التىن جاپسىرمالى جانە جەبە، قار بارىسى، ارقار، جىلقى جانە قۇس تۇرىندەگى التىن تىلىمشەلەر اشەكەيلەپ تۇرعان كونۋس ءپىشىندى ەرەكشە باس كيىمدى التىن ادامنىڭ رەكونسترۋكتسياسىن جانە وسى جاس اقسۇيەك ساق جاۋىنگەرىمەن (ارحەولوگتاردىڭ پىكىرلەرى بويىنشا 17-18 جاستار شاماسىندا) بىرگە جەرلەنگەن ەرتە تەمىر عاسىرىنىڭ (ب.د.د V-IV عع.) ارحەولوگيالىق ولجالارىنىڭ كوللەكتسياسىن تاماشالاۋعا مۇمكىندىك بار.

كورمەگە قازاقستان رەسپۋبليكاسى ۇلتتىق مۋزەيىنىڭ قورلارىنان بارلىعى 292 زات ۇسىنىلدى. كورمەگە ۇسىنىلعان قازاقستاننىڭ ەجەلگى جانە ورتاعاسىرلىق ونەرىنىڭ جاۋھارلارى – بۇل ەۋرازيا دالا مادەنيەتى مۇراسىنىڭ وزىندىك ەرەكشەلىگىن كورسەتەتىن بۇرىنعىنىڭ اتاۋسىز شەبەرلەرى تۋىندىلارىنىڭ از عانا بولىگى.

كورمەنىڭ سالتاناتتى اشىلۋ راسىمىنە سولتۇستىك ماكەدونيا رەسپۋبليكاسىنىڭ مادەنيەت ءمينيسترى حىسني يسمايل (Hysni Ismaili), قر ۇلتتىق مۋزەيى ديرەكتورىنىڭ ورىنباسارى الماز نۇرازحان، سولتۇستىك ماكەدونيا رەسپۋبليكاسىنىڭ ۇلتتىق ارحەولوگيالىق مۋزەيىنىڭ ديرەكتورى گوران سانەۆ قاتىستى. ولار بىرەگەي كورمە جوباسى ارقىلى قازاقستاننىڭ تاريحي-مادەني مۇراسىمەن، ەجەلگى جانە ورتاعاسىرلىق ونەر تۋىندىلارىمەن تانىسۋلارىنا مۇمكىندىك العاندارى ءۇشىن قازاقستاندىقتارعا العىس ءبىلدىردى. سونىمەن قاتار، قوس مەملەكەتتىڭ وكىلدەرى ماكەدونيا مەن قازاقستاننىڭ تاريحى، ءوزارا ۇقساستىعى مەن ورتاق كوزقاراستارى تۋرالى كەڭىرەك ايتىپ، بولاشاقتا مادەني بايلانىستى ارتتىرۋعا سەنىم ءبىلدىردى.

1960-جىلداردىڭ سوڭى مەن 1970-جىلداردىڭ باسىندا الماتىنىڭ ماڭايىندا تانىمال ارحەولوگ كەمال اقىشەۆ زەرتتەپ جۇرگەن ەسىك قورعانىنان، كەيىن قازاقستاننىڭ سيمۆولىنا اينالعان، ساق پاتشاسى – «التىن ادامنىڭ» سۇيەگى تابىلعان ارحەولوگيالىق سەنساتسيا بولدى.

باعا جەتپەس ولجاعا «قازاق تۋتانحامونى» دەگەن ات بەرىلىپ، «عاسىر جاڭالىعى» دەپ تانىلدى. ەجەلگى دالا بيلەۋشىسىنىڭ تاجىندەگى قاناتتى التىن پىراق اشەكەيلەرى قازاقستان رەسپۋبليكاسى ەلتاڭباسىنىڭ بولشەگىنە اينالدى، ال التىن ادامنىڭ ءمۇسىنى الماتىداعى تاۋەلسىزدىك الاڭىنا ورناتىلدى.

جارتى عاسىرعا جۋىق ۋاقىت وتكەننەن كەيىن قازاقستان رەسپۋبليكاسى ۇلتتىق مۋزەيى حالىقارالىق «التىن ادامنىڭ الەم مۋزەيلەرىنە شەرۋى» جوباسىن جاريالادى. اۋقىمدى شارا شەڭبەرىندە بەلارۋس، رەسەي، ازەربايجان، قىتاي، پولشا جانە وڭتۇستىك كورەيا، وزبەكستان مۋزەيلەرىندە كورمەلەر ۇلكەن جەتىستىكپەن وتكەن بولاتىن.

سوڭعى جاڭالىقتار