11 شىلدە, 10:44 398 0 ونەر اسەل انۋاربەك

دومبىرا ءۇنى كۇمبىرلەگەن كۇن

وتكەن جەكسەنبىدە ەلىمىزدە ۇلتتىق دومبىرا كۇنى تويلاندى. شىلدەنىڭ العاشقى جەكسەنبىسىن ۇلتتىق اسپابىمىزدىڭ ءتول مەرەكەسىنە اينالدىرۋ تۋرالى شەشىم قر تۇڭعىش پرەزيدەنتى – ەلباسى نۇرسۇلتان نازارباەۆتىڭ جارلىعىمەن وتكەن جىلى قابىلدانعان ەدى. بۇل جارلىق ۇلتتىق مادەنيەت پەن بىرەگەيلىكتى ساقتاۋ جانە قايتا جاڭعىرتۋ يدەياسىنىڭ توڭىرەگىندە قوعامدى ودان ءارى توپتاستىرۋ ماقساتىندا شىعارىلعان بولاتىن.

اتاۋلى مەرەكە ەلوردادا بيىل دا ەرەكشە تويلاندى. نۇر-سۇلتان قالاسىندا ۇلتتىق دومبىرا كۇنىنە ارنالعان مەرەكەلىك كونتسەرت ءوتتى. وسىعان وراي «قازاق ەلى» مونۋمەنتىنىڭ الدىنداعى الاڭ بىلتىرعىداي ۇلكەن ساحناعا اينالىپ، ەلوردا تۇرعىندارى مەن قوناقتارى كۇمبىرلەگەن كۇي، اۋەلەگەن ءان تىڭدادى. مەرەكەلىك كونتسەرتتى مەملەكەت باسشىسى قاسىم-جومارت توقاەۆ تا كوپپەن بىرگە تاماشالاپ، جينالعان جۇرتتى ۇلتتىق دومبىرا كۇنىمەن قۇتتىقتادى. «ءتول مادەنيەتىمىزگە دەگەن قامقورلىق ارقاشان مەملەكەتتىڭ ايرىقشا نازارىندا بولادى. ءبىز قازاقتىڭ ءداستۇرلى ءانىن، كۇيىن ەلىمىزگە عانا ەمەس الەم جۇرتشىلىعىنا تانىتىپ جۇرگەن ونەرپازدارىمىزعا لايىقتى قولداۋ كورسەتە بەرۋىمىز كەرەك. ولار – حالقىمىزدىڭ ۇلتتىق بولمىسىن ساقتاۋ ءۇشىن ەڭبەك ەتىپ جۇرگەن ونەر تارلاندارى. دومبىرا بۇكىل قازاقستان حالقىن بىرىكتىرەتىن تەڭدەسى جوق مادەني مۇرا. ۇلتتىق رۋحانياتىمىزدى  دارىپتەيتىن مەرەكە  دومبىرانىڭ مارتەبەسىن  بيىككە كوتەرە بەرسىن!»، – دەدى قاسىم-جومارت توقاەۆ. مەملەكەت باسشىسى قازاقستان بىرلىگى بەكەم، ىنتىماعى جاراسقان ۇلت پەن ۇلىستاردىڭ مەكەنى ەكەنىن باسا ايتتى. ەلىمىزدە ءتۇرلى حالىقتاردىڭ مادەنيەتى ءوسىپ، وركەندەپ وتىرعاندىعىنا نازار اۋداردى.

نۇر-سۇلتان قالاسىنىڭ مادەنيەت جانە سپورت باسقارماسى ۇيىمداستىرعان جاپپاي كونتسەرتكە قاتىسۋعا نيەتتىلەر ورىندايتىن 6 كۇي الدىن الا تاڭدالدى. ولاردىڭ قاتارىندا «سارىارقا»، «اداي»، «القيسسا»، «كوڭىل تولقىنى»، «بالبىراۋىن» جانە «كوروعۇلى» كۇيلەرى بار. مەرەكە بارىسىندا كۇمبىرلەگەن كۇيدەن باسقا كوپشىلىك نازارىنا «جاستار» تەاترىنىڭ اكتەرلەرى تاريحي قويىلىمىن ۇسىندى، ەلوردالىق مۋزىكا مەكتەپتەرىنىڭ شاكىرتتەرى ءوز ونەرلەرىن ورتاعا سالدى. قوناقتار اقىندار ايتىسىن تاماشالاۋعا دا مۇمكىندىك الدى. ال اقىندار ۇلتتىق مۋزىكالىق اسپابىمىز – دومبىرانى جىرعا قوستى. ايتۋلى شارا وتكەن الاڭعا بىرنەشە اقشاڭقان ۇيلەر دە تىگىلدى. كورمە ۇيىمداستىرىلىپ، مۋزەيدە كوزدىڭ قاراشىعىنداي ساقتالعان قۇندى جادىگەرلەر قويىلدى. اراسىندا سال-سەرىلەر ءوز داۋىرىندە ۇستاعان كونە دومبىرالاردىڭ كوشىرمەلەرى بولدى.

دومبىرا كۇنىندە كوپشىلىك الدىندا ونەر كورسەتۋگە ىرگەدەگى ەلدى مەكەندەردەن كەلگەندەرى دە بار. بۇل مەرەكە ەلدى وسىلاي ۇيىستىردى.

 

اسەل انۋاربەك

سوڭعى جاڭالىقتار