11 شىلدە, 10:30 374 0 قاۋىپسىزدىك Turkystan Support

  سۋديالاردىڭ قىزمەتتىك ساپاسى  ارتادى

قازاقستاندا قىركۇيەكتەن باستاپ سۋديالاردىڭ قىزمەتتىك ساپاسىن باعالاۋ قولعا الىنادى. بۇل تۋرالى  سۋديا­لاردىڭ كەڭەيتىلگەن كەڭەسىندە قر جوعارعى سوتىنىڭ توراعاسى جاقىپ اسانوۆ مالىمدەدى.

«سۋديا بولام دەۋشىلەردىڭ سانى بيىل 2 ەسە ءوستى. بۇرىن ءوز ەركىمەن كەتكەن سۋديالار وزگەرىستەردى كورىپ، قايتا سۋديا بولامىن دەپ  كونكۋرستارعا قاتىسۋدا. ءتىپتى بالا كۇتىمىنە بايلانىستى دەمالىسقا شىققان ارىپتەستەردىڭ ءوزى جاعدايدى كورىپ، جۇمىسقا قايتا شىعۋعا شەشىم قابىلداپ جاتىر»، – دەدى ج.اسانوۆ. جوعارى سوت توراعاسى بيىلدىڭ وزىندە 434 سۋديانىڭ سىناقتان وتەتىنىن اتاپ ءوتتى. «ءبىز سوعان ارنايى كوميسسيا قۇردىق. ىشىمىزدەگى ەڭ ابىرويلى سۋديا­­لاردى  سونىڭ قۇرامىنا ەنگىزدىك. تامىز ايىنىڭ ىشىندە جۇيەمىزدى، ادىستەمەمىزدى بەكىتەمىز. سول ادىستەمە بويىنشا ءاربىر سۋديانىڭ قىزمەتتىك ساپاسىنا  باعا بەرەتىن بولامىز. بيىلدىڭ وزىندە 434 سۋديا وسى سىناقتان وتەدى. 2,5 ايدىڭ ىشىندە اۋداندىق سوتتاردىڭ 80 پايىزى وسى باعالاۋدان ءوتۋى كەرەك. جالپى، سوتتى جاڭعىرتامىز دەسەك  قولعا الاتىن ەڭ باستى ماسەلە – سۋديالىق كادرلار. وسى پروبلەمانى تۇبەگەيلى شەشپەسەك، زاڭ دا، مىقتى سوت رەفورماسى دا ەشقانداي ناتيجە بەرمەيدى، جاعدايدى تۇزەمەيدى»، – دەدى جوعارعى سوت توراعاسى.

سونىمەن قاتار ج.اسانوۆ پارلامەنت قاراۋىندا سوت قىزمەتىنە بايلانىستى جەتى بىردەي زاڭنىڭ جاتقاندىعىن اتاپ ءوتتى.  «بىلتىردان بەرى بىزدە وتە كوپ شارا بولدى. 10-نان استامى تىكەلەي ەفيردە ءوتتى. سول كەزدە «جوعارعى سوتتىڭ باسشىلارى نەگە كوپ سويلەي بەرەدى، كوپ سويلەگەنشە سونىڭ بارلىعىن ىسكە اسىرماي ما؟» دەگەن اڭگىمەنى ەستىدىك. ارينە، ونىڭ بارلىعىن ءبىز ايتا المادىق. بىراق ونىڭ سەبەبى بولدى. ەڭ باستى سەبەبى ءبىز ءوزىمىزدىڭ باعدارلامالارىمىزدى جازعاننان كەيىن جاعدايدى جاقسارتۋ ءۇشىن ءبىراز زاڭدى وزگەرتۋ قاجەتتىلىگى پايدا بولدى. ال ەندى ونى وزگەرتۋ ءۇشىن سول ماسەلەگە قاتىستى بارلىق  مەملەكەتتىك ورگانداردىڭ، باسقا قۇرىلىمداردىڭ كەلىسىمى كەرەك. كەيبىر مەملەكەتتىك قۇرىلىمدار بىزبەن كەلىسپەي قارسىلىق ءبىلدىرىپ جاتتى. سوندىقتان ءبىز كوپ سويلەۋگە ءماجبۇر بولدىق. ويتكەنى ءوزىمىزدىڭ ۇستانىمىمىزدى دالەلدەۋ كەرەك بولدى»، – دەدى ول 2019 جىلدىڭ 1 جارتىجىلدىقتاعى سوت تورەلىگىن جۇزەگە اسىرۋ قورىتىندىسى قارالعان كەڭەستە.

سوڭعى جاڭالىقتار