28 ماۋسىم 2019, 13:04 713 0 قوعام دينارا مىڭجاسارقىزى

80 توننا گۋمانيتارلىق كومەك ارىسقا جول تارتتى

«نۇر-سۇلتان قالاسى ارىسپەن بىرگە» دەگەن جازۋى بار 20  توننالىق 4 جۇك كولىگى ارىسقا قاراي جولعا شىقتى. 

كاسىپكەرلەر مەن جاستار ۇيىمدارىنىڭ، اكىمدىك وكىلدەرىنىڭ كۇش سالۋىمەن ەلوردا حالقىنان جينالعان گۋمانيتارلىق كومەكتىڭ ەكىنشى لەگى ارىسقا جونەلتىلدى. «جاس سارباز» جاسوسپىرىمدەر اسكەري-پاتريوتتىق قوزعالىسىنىڭ نۇر-سۇلتان قالالىق فيليالىنىڭ توراعاسى، اسحات نالشىبەكتىڭ ايتۋىنشا، استانالىق تۇرعىندار ارىستاعى اعايىنعا بارىنشا بەلسەندى كومەك جيناپ جاتىر. "ەلوردا حالقى ارىستاعى اپاتتى كۇيزەلە قابىلداعانىن كومەكتەسۋگە نيەتتى ادامداردىڭ مولدىعىنان بايقاۋعا بولادى. ءوزىم دە ارىستىڭ تۋماسىمىن. وسىندا وقۋعا ءتۇسىپ، جۇمىسقا ورنالاستىم. قيىن كەزدە زارداپ شەككەن جۇرتقا كومەك قولىن سوزىپ جاتقان نۇرسۇلتاندىقتارعا ارىستىڭ تۋماسى رەتىندە العىس ايتامىن. ءوز زامانداستارىمىز قارجىلاي كومەك جيناۋ ءۇشىن بىرلەسىپ بارىپ قان دا تاپسىردى. سونىڭ اقشاسىن كورپوراتيۆتىك قورعا اۋداردى»، –  دەيدى بەلسەندى جاس.   نۇر-سۇلتان قالاسى اكىمىنىڭ ورىنباسارى ەرلان كاناليموۆ ارىس قالاسىنداعى ۇيلەردى قالپىنا كەلتىرۋگە 19 قۇرىلىس جاساعى قاتىساتىنىن ايتادى.  «العاشقى ەكى كۇندە مەملەكەتتىك ورگاندار مەن كاسىپورىندار ارىسقا كومەك رەتىندە ءبىر كۇندىك ەڭبەكاقى ەسەبىنەن 200 ملن تەڭگە اۋداردى. كەشە 3 جۇك كولىگى شىققان، بۇگىن تورتەۋىن اتتاندىرىپ وتىرمىز. ال ەرتەڭ تاعى 3  جۇك كولىگىن جىبەرەمىز.  قالا اكىمىنىڭ تاعى ءبىر ورىنباسارى قۇرىلىس ماماندارىمەن ارىستا ءجۇر. ءبىزدىڭ ۇسىنىسىمىزدى ەلوردانىڭ قۇرىلىس كومپانيالارى قولداپ، 19 قۇرىلىس جاساعى قۇرىلدى.ءار جاساقتا كەمىندە 10 مامان بار. قۇرىلىس ماتەريالدارىن دا ءوزىمىز الىپ بارامىز. ءبىرىنشى ءۇي يەلەرىمەن بىرگە ءار ءۇيدىڭ اقاۋ اكتىسى جاسالادى. سول بويىنشا 9-سەكتورداعى 500 ءۇيدىڭ قايسىسىن جوندەۋ كەرەكتىگى بەلگىلى بولادى. 19 جاساق پالاتا قالاشىعىندا جاتىپ، ءبىر ايدىڭ ىشىندە ۇيلەردى قالپىنا كەلتىرەدى. 50 ەرىكتى جاس بارىپ، تۇرعىنداردىڭ كوشۋىنە كومەكتەسەدى. قازىردىڭ وزىندە 50 ەرىكتى ستۋدەنت مەديتسينالىق كومەك كورسەتىپ ءجۇر»، – دەيدى نۇر-سۇلتان ەرلان كاناليموۆ.

سوڭعى جاڭالىقتار