26 ماۋسىم, 16:50 1513 0 قوعام دينارا مىڭجاسارقىزى

اتىراۋ تەلەراديوسىنىڭ بەس جاڭالىعى

بايلانىس جانە اقپارات  قىزمەتكەرلەرى كۇنىنە وراي اتىراۋدا «قازاقستان» رترك» اق اتىراۋ وبلىستىق فيليالىنا قاراستى «Atyraý radiosy»-نىڭ جاڭا  راديوستۋدياسى اشىلىپ، جاڭا راديوتاراتقىش ىسكە قوسىلدى. سونىمەن قاتار، راديونىڭ لاتىن الىپبيىندەگى جاڭا لوگوتيپىنىڭ تانىستىرىلىمى ءوتىپ، جاڭا فورماتتاعى «Efirde 102.0 FM» تەلەراديوحابارى ەفيرگە جول تارتتى.

تەلەراديوحاباردىڭ العاشقى سانى تۇركىستان وبلىسى ارىس قالاسىنداعى جويقىن جارىلىستان زارداپ شەككەندەرگە اتىراۋلىقتاردىڭ كومەگى تۋراسىندا بولدى. تەلەراديوحابار فورماتىنىڭ ەرەكشەلىگى، اتىراۋدا تۇڭعىش رەت راديوەفير تەلەەفيرگە قوسىلىپ وتىر. وسىلايشا قالىڭ كوپشىلىك تەلەراديوباعدارلامانى اۋە تولقىنىنان تىڭداپ، ءارى تەلەەكراننان دا تاماشالاي الادى. كاسىبي مەرەكەگە ورايلاستىرىلعان ءىس-شارا اياسىندا سونداي-اق، «Atyraý» تەلەراديوسىنىڭ جاڭا سالىنعان جاپسارلاس عيماراتى مەن ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىمەن بىرلەسكەن جوبانىڭ  تۇساۋكەسەر ءراسىمى ءوتتى.

ءىس-شاراعا اتىراۋ وبلىسى اكىمى نۇرلان نوعاەۆ باستاعان جەرگىلىكتى اتقارۋشى بيلىك وكىلدەرى، وبلىستىق قوعامدىق كەڭەس توراعاسى مۇرات ساقتايۇلى،  ح.دوسمۇحامەدوۆ ات. اتمۋ جۋرناليستيكا كافەدراسىنىڭ  مەڭگەرۋشىسى، قاۋىمداستىرىلعان پروفەسسور مانشۇك تىنىشقاليقىزى، اقىن-جازۋشى مەن زيالى قاۋىم وكىلدەرى، جۋرناليستيكا ارداگەرلەرى ت.ب. قاتىستى. سالتاناتتى ءىس-شارانى قۇتتىقتاۋ سوزىمەن اتىراۋ وبلىسىنىڭ اكىمى نۇرلان نوعاەۆ:

  • «Atyraý» تەلەراديوسى وبلىستاعى 80 جىلدان اسا تاريحى بار ىرگەلى قارا شاڭىراق. 80 جىل بۇرىن سول كەزدەگى گۋرەۆ حالقىنا  العاشقى جاڭالىق تاراتقان بۇل مەديا-مەكەمە  بۇگىندە زامان سۇرانىسىنا ساي جاڭا تەحنولوگيامەن جابدىقتالىپ، تىڭ حابارلارىمەن كورەرمەن كوزايىمىنا اينالىپ وتىر. ەلدەگى ساياسي-ەكونوميكالىق، توتەنشە جاعدايلار كەزىندە دەرەۋ ءۇن قوسىپ،  حالىققا جەدەل اقپارات  تاراتىپ، قوعامدا وڭ پىكىر قالىپتاسۋىنا ىقپال ەتىپ وتىر. بۇگىن كەلەسى ءبىر بەلەسىنە شىعىپ، جاپسارجاي اشىپ، راديونىڭ تىنىسىن كەڭەيتىپ وتىر. جاڭا فورماتتاعى تەلەراديوحاباردىڭ العاشقى سانىن ارىس قالاسىنداعى   توتەنشە جاعدايعا ارناۋدىڭ ءوزى تەلەارنا ۇجىمىنىڭ ونەگەلى  باستاماسى دەپ بىلەمىن»، - دەپ ءوڭىر باسشىسى جۇرەكجاردى لەبىزىن ءبىلدىردى.

بۇعان دەيىن اتىراۋداعى جەرگىلىكتى راديونىڭ تارالۋ كەڭىستىگىندە بىرقاتار كەدەرگى تۋىنداعان ەدى. 250 كيلوۆاتتىق ەسكى راديوتاراتقىشتىڭ سالدارىنان راديوتولقىننىڭ تاراۋ اياسى 3 شاقىرىم عانا بولدى. ەندى كەڭەيتىلگەن دياپازوندى 1000 كيلوۆاتتىق جاڭا راديوتاراتقىش ىسكە قوسىلىپ، اتىراۋلىقتار اۋە تولقىنىن جاڭا ساپادا تىڭدايتىن بولادى. راديوتولقىننىڭ ەركىن تاراۋىنا ءزاۋلىم ۇيلەر كوپ كەدەرگىنىڭ ءبىرى ەدى.  وسى ماسەلە ەسكەرىلىپ، جاڭا راديوتاراتقىش قالا سىرتىنداعى 180 مەترلىك تەلەمۇناراعا ورناتىلدى. بۇل دا بولسىن راديوتولقىننىڭ ەركىن تاراۋىنا باستى سەپ بولماق. «قازاقستان» رەسپۋبليكالىق تەلەراديوكورپوراتسياسى» اق اتىراۋ وبلىستىق فيليالىنىڭ ديرەكتورى قانات اۋەسباي:

  • «بۇل «Atyraý» تەلەراديوسىنىڭ ءباسپاسوز  جانە اقپارات قىزمەتكەرلەرى كۇنىنە ارناپ جاريالاعان بەس جاڭالىعى. سونىڭ ەڭ باستىسى راديومىزدىڭ تىنىسىنىڭ  كەڭەيىپ،  جاڭا ستۋدياسىنىڭ اشىلۋى. تىنىسىنىڭ كەڭەيگەنى سول راديۋسى كەڭ جاڭا راديوتاراتقىش ورناتقانىمىزدىڭ ارقاسىندا «قۇلاعىمىز اشىلعانداي». بۇل كوپ جىلدار بويى  ايتىلا ايتىل، اقجەم، جازىلا جاۋىر بولعان كۇرمەۋلى ماسەلە ەدى.  بۇدان بىلاي راديوتولقىننىڭ تارالۋ ايماعى 60 شاقىرىمعا دەيىن كەڭەيىپ وتىر. باستىسى، اۋە تولقىنىندا 102.Fم جيىلىگىنە قوسىلىپ، ۇنەمى بىزبەن بىرگە بولۋعا شاقىرامىز».

جاڭا فورماتتا تۇساۋى كەسىلگەن تەلەراديوحابار «Efirde 102.0 FM» اتالادى. تەلەراديوحاباردىڭ العاشقى سانى تۇركىستان وبلىسىنىڭ ارىس قالاسىندا بولعان توتەنشە جاعدايعا ارنالدى.  «Efirde» ءسوزى كوگىلدىر ەكراندى مەڭزەپ تۇرسا، «102.FM» راديو سيپاتىن اڭعارتىپ تۇر. تەلەۆيزيا مەن راديومەن بىرلەسكەن مۇنداي جوبانى جۇزەگە اسىرۋدا مەديا الەمىندەگى زاماناۋي تاجىريبە ەسكەرىلىپ وتىر. تەلەۆيزيانىڭ ءتۇپ وتانى امەريكا دەسەك، ول جەردە راديوەفيردى تەلەەفيرگە قوسىپ ورتاق حابار جاساۋ قاي زاماننان بار ءۇردىس. مۇنىڭ باستى تيىمدىلىگى سول، راديو اۋديتورياسىن  كەڭەيتۋ»، دەيدى تەلەراديو حاباردىڭ جۇرگىزۋشىسى، تانىمال جاس جۋرناليست جاندوس نۇربولاتۇلى.

اتىراۋ تەلەراديوسىنداعى تاعى ءبىر سۇيىنشىلەر جاڭالىق جاڭا جاپسارلاس عيماراتتىڭ اشىلۋى. 1000 شارشى مەتر بولاتىن 3 قاباتتى عيماراتتا اكىمشىلىك-باسقارۋ قىزمەتكەرلەرى، ينجەنەرلەر، تاقىرىپتىق رەداكتسيا، مەنشىكتى تىلشىلەر مەن جاڭا تەلەستۋديا ورنالاسادى. عيماراتتىڭ ءبىر زالى ايتقالي قۇمارعاليۇلى مەديا اۋديتورياسى بوپ اشىلدى. ايتقالي قۇمارعاليۇلى «اتىراۋ» تەلەراديوكومپانياسىنا ۇزاق جىل باسشىلىق ەتىپ، قازىعىن قاعىپ، ۋىعىن كوتەرگەن، ىسكەر باسشى، شەبەر ۇيىمداستىرۋشى، قارىمدى قالامگەر. اۋديتوريانىڭ تۇساۋكەسەرىنە  ايتقالي قۇمارعاليۇلى ءوزى قاتىسىپ،  اسەرىمەن ءبولىستى:

  • ءبىر جىلدارى قيىن كەزدەر بولدى. تەلەارنالاردىڭ جۇمىسى توقتاپ قالدى. قىزمەتكەرلەرگە ەڭبەكاقى تاۋىپ بەرۋدىڭ ءوزى ۇلكەن ماسەلە بولعان كەزدە كوپ راديو جابىلدى. فيليالدار اراسىندا وسى «ATYRAY» راديوسىن  ساقتاپ قالدىق.  بۇگىن مىنە، ۇزاق جىلدان كەيىن  جاڭا تەحنولوگيامەن جابدىقتالىپ اشىلىپ جاتىر. قۋانىشىم شەكسىز. سونىمەن قاتار،  مەنى قۇرمەتتەپ اۋديتوريا اشىپ جاتقان تەلەارنا ۇجىمىنا العىس ايتامىن. بۇل وبلىستا تەلە جۋرناليستەر دايىنداۋعا ۇلكەن مۇمكىندىك بەرەدى دەپ ويلامىن. ءوزىم دە شاكىرت تاربيەلەۋگە بەلسەنە اتسالىسامىن.    

مەديا اۋديتوريا  ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىمەن بىرلەسكەن جوبا اياسىندا جۇزەگە اسىپ وتىر. ۋنيۆەرسيتەتتىڭ  جۋرناليستيكا كافەدراسىنىڭ  مەڭگەرۋشىسى، قاۋىمداستىرىلعان  پروفەسسور  مانشۇك تىنىشقاليقىزى:

  • «كاسىبي مەرەكەمىزبەن تۇسپا تۇس كەلىپ جاتقان ماڭىزدى شارادا باس قوسىپ تۇرمىز. تەلەارنا ىشىنەن اشىلىپ جاتقان مەديا اۋديتوريا بولاشاق تەلە جۋرناليستەر دايىنداۋعا ماڭىزى زور.  بۇگىندە  ءبىلىمدى عىلىممەن، تاجىريبەمەن ۇشتاستىرۋ تالابى  قويىلىپ وتىر. بىرلەسكەن جوبامىز ەلىمىزدەگى دۋالدى ءبىلىم بەرۋ جۇيەسىنە قوسقان ۇلەسىمىز بولماق. تەلەارنانىڭ كاسىبي ماماندارىنان بىلىمدەرىن جەتىلدىرىپ، كاسىبي وسۋگە قادام باسادى»، - دەپ بەلگىلى عالىم تەلەارنا ۇجىمىنىڭ جۇمىسىنا ساتتىلىك تىلەدى.

ءىس-شارا اياسىندا «قازاقستان» رترك» اق اتىراۋ وبلىستىق فيليالىنىڭ 5 قىزمەتكەرى: «Atyraý radiosy» اعا رەداكتورى سلۋحيا قاتتارقىزى، رەداكتورلار گۇلناز كارىمجان، ايناگۇل قونىسقاليقىزى، شولپان اباتقىزى،  ينديرا مەرەكەنقىزى قازاقستان جۋرناليستەر وداعى سىيلىعىنىڭ يەگەرى اتاعىمەن ماراپاتتالدى. ايتۋلى ماراپات «Atyraý radiosy»-نىڭ 80 جىلدىعى مەن قازاقستان جۋرناليستەر وداعىنىڭ 60 جىلدىق مەرەيتويى قۇرمەتىنە بەرىلدى.

    «قازاقستان» رەسپۋبليكالىق تەلەراديوكورپوراتسياسى» اق اتىراۋ وبلىستىق فيليالىنا قاراستى «Atyraý radiosy»-نىڭ تاريحى 1938 جىلى گۋرەۆ وبلىسىنىڭ قۇرىلۋىنان باستاۋ الادى. 1938 جىلدىڭ 2-ءشى ناۋرىزىندا العاش رەت راديو حابارى ەفيرگە شىقتى.  قازىر ول 102.0 FM جيىلىگىندە تاۋلىگىنە 17 ساعات حابار تاراتىپ وتىر.

سوڭعى جاڭالىقتار