10 مامىر 2019, 14:49 835 0 ىشكى ساياسات "تۇركىستان" گازەتىنىڭ اۆتورلارى

پرەزيدەنت سايلاۋىنا تۇسەتىن جەتى ۇمىتكەر

تۋرا 1 ايدان كەيىن، 9 ماۋسىمدا وتەتىن كەزەكتەن تىس پرەزيدەنتتىك سايلاۋعا قاتىساتىن كانديداتتاردىڭ ەسىمى تولىقتاي بەلگىلى.

پرەزيدەنتتىككە ۇمىتكەر اتانعان تۇلعالاردىڭ قاي-قايسىسى دا ەلىمىزدىڭ ساياسي-قوعامدىق دامۋىنا اتسالىسقان.

سونىمەن بۇل سايلاۋدا ەلىمىزدە تىركەلگەن ساياسي پارتيالاردىڭ وكىلدەرىمەن قاتار، رەسپۋبليكا ەڭبەككەرلەرىنىڭ قۇقىعىن قورعايتىن كاسىپوداقتار فەدەراتسياسىنان، رۋحاني-پاتريوتتىق بىرلەستىكتەردەن كانديداتتار تىركەلدى.

باق وكىلدەرى مەن ساراپشىلار 9 سانىنا باسا دەن قويعانى جاسىرىن ەمەس. جىل باسىنان بەرى وسى سانمەن بايلانىستى مەملەكەتتىك ساياسي وقيعالار ءجيى تىركەلدى. راسىمەن دە 9 ماۋسىمدا وتەتىن كەزەكتەن تىس پرەزيدەنت سايلاۋىنا 9 كانديدات قاتىساتىن بولعان.

«Nur Otan» پارتياسى» قوعامدىق بىرلەستىگىنەن قاسىم-جومارت توقاەۆ، «اۋىل» حالىقتىق-دەموكراتيالىق پاتريوتتىق پارتياسىنان تولەۋتاي راحىمبەكوۆ، قازاقستان كوممۋنيستىك حالىقتىق پارتياسىنان جامبىل احمەتبەكوۆ، «اق جول دەموكراتيالىق پارتياسى» قوعامدىق بىرلەستىگىنەن دانيا ەسپاەۆا، «ۇلت تاعدىرى» رەسپۋبليكالىق قوعامدىق بىرلەستىگىنەن ءامىرجان قوسانوۆ، «قازاقستان رەسپۋبليكاسىنىڭ كاسىپوداقتار فەدەراتسياسى» رەسپۋبليكالىق كاسىپوداقتار بىرلەستىگىنەن امانگەلدى تاسپيحوۆ، «قازاقستان قۇرىلىسشىلار وداعى» رەسپۋبليكالىق زاڭدى تۇلعالار بىرلەستىگىنەن تالعات ەرعاليەۆ، «ۇلى دالا قىراندارى» رەسپۋبليكالىق قوعامدىق مادەني-الەۋمەتتىك بىرلەستىگىنەن ءسادى-بەك تۇگەل، «حالىق دەموگرافياسى» قوعامدىق بىرلەستىگىنەن جۇماتاي اليەۆ ورتالىق سايلاۋ كوميسسياسىنا قاجەتتى 7 قۇجات توپتاماسىن تولىق تاپسىرعان.

بىراق «قازاقستان قۇرىلىسشىلار وداعى» رەسپۋبليكالىق زاڭدى تۇلعالار بىرلەستىگىنەن تالعات ەرعاليەۆ كەيىننەن پرەزيدەنتتىككە ۇمىتكەر رەتىندە ۇسىنعان ءوتىنىشىن كەرى قايتاراتىندىعىن ءمالىم ەتىپ، «اق جول» پارتياسىنىڭ كانديداتى دانيا ەسپاەۆاعا قولداۋ ءبىلدىردى.

ال ورتالىق سايلاۋ كوميسسياسىنا سوڭعى بولىپ ءوتىنىم بىلدىرگەن جۇماتاي اليەۆ مەملەكەتتىك تىلدەن ەمتيحان تاپسىرا الماي قالدى. «مەملەكەت جانە ءدىن» تاقىرىبىندا 13 سويلەمدى شىعارما جازىپ، 19 قاتە جىبەرگەن. لينگۆيستيكالىق كوميسسيا مۇشەسى ءادىل احمەتوۆ: «تاقىرىپ مۇلدەم اشىلماعان، سويلەمدەرىنىڭ بارلىعى جۇيەسىز. ءدىن ماسەلەسى دە مۇلدەم اشىلمادى دەۋگە بولادى، ءۇستىرت. ەكىنشى كەزەڭدە مۇحتار اۋەزوۆتىڭ «اباي جولى» رومانىنىڭ 2-تومىنان ءۇزىندى وقىدى. م.اۋەزوۆتىڭ ءسوزى «قىزدىڭ جيعان جۇگىندەي» عوي. ءماتىننىڭ ءوز اۋەزى بار. بۇل جەردە دە ءوزىنىڭ شورقاقتىعىن بايقاتتى. ءۇشىنشى كەزەڭدە «ىرىس الدى – ىنتىماق» تاقىرىبىندا بايانداما جاسادى. تاقىرىپ مۇلدەم اشىلمادى. ساۋاتسىز بولدى. سەگىزدەن استام قاتە جىبەرىلسە، شىعارما تەرىس باعالانادى. سوندىقتان پرەزيدەنتتىككە ۇمىتكەر جۇماتاي اليەۆ مەملەكەتتىك ءتىلدى ەركىن مەڭگەرمەگەن دەگەن كوميسسيا قورىتىندىسى شىقتى»، – دەدى. قالعان ۇمىتكەرلەردىڭ ءبارى دە مەملەكەتتىك ءتىلدى ەركىن مەڭگەرگەندىگىن انىقتاۋ ءۇشىن ارنايى قۇرىلعان لينگۆيستيكالىق كوميسسيا الدىندا ەمتيحان تاپسىرىپ، سىننان سۇرىنبەي ءوتتى.

وسىلايشا قر ازاماتتارى 9 ماۋسىم كۇنى 7 ۇمىتكەر اراسىنان، ءوزى ءۇمىت ارتقان ءبىر كانديداتقا داۋىس بەرە الادى.

سوڭعى جاڭالىقتار