26 ناۋرىز 2019, 11:15 837 0 ىشكى ساياسات نازىم تويلىباەۆا

اسقار مامين قر پرەمەر-ءمينيسترى كەڭسەسىنىڭ جاڭا باسشىسىن تانىستىردى

بۇگىن ۇكىمەت وتىرىسىندا قر پرەمەر-ءمينيسترى اسقار مامين قر پرەمەر-ءمينيسترى كەڭسەسىنىڭ جاڭا باسشىسى  – عالىمجان قويشىباەۆتى تانىستىردى، دەپ حابارلايدى  primeminister.kz.

«ۇكىمەت قاۋلىسىمەن عالىمجان تەلمانۇلى قويشىباەۆ پرەمەر-مينيستر كەڭسەسىنىڭ باسشى بولىپ تاعايىندالدى»، – دەپ حابارلادى پرەمەر-مينيستر.

ا. مامين ع. قويشىباەۆتىڭ پرەزيدەنت اكىمشىلىگىندە جانە سىرتقى ىستەر مينيسترلىگى جۇيەسىندە  – ەلشى، ءمينيستردىڭ ورىنباسارى بولىپ كوپ جىلدار بويى ەڭبەك اتقارعانىن اتاپ ءوتىپ، جاڭا قىزمەتتە ساتتىلىك تىلەدى.

ەسكە سالا كەتەيىك، بۇعان دەيىن قر پرەمەر-ءمينيسترى كەڭسەسىنىڭ باسشىسى لاۋازىمىن اتقارعان د. كالەتاەۆ پرەزيدەنتتىڭ جارلىعىمەن قر پرەزيدەنتىنىڭ اكىمشىلىگى باسشىسىنىڭ ءبىرىنشى ورىنباسارى بولىپ تاعايىندالدى.

ع. قويشىباەۆ 1968 جىلى قىزىلوردا قالاسىندا دۇنيەگە كەلگەن. م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتەتىن تامامداعان. 1995–2004 جىلدارى قازاقستان رەسپۋبليكاسىنىڭ رەسەي فەدەراتسياسىنداعى ەلشىلىگىنىڭ اتتاشەسى، ءۇشىنشى حاتشىسى، ءبىرىنشى حاتشىسى، كەڭەسشىسى، كەڭەسشى-ۋاكىلى بولىپ قىزمەت ەتكەن.

2004 جىلى – قازاقستان رەسپۋبليكاسىنىڭ ۇجىمدىق قاۋىپسىزدىك تۋرالى شارتى ۇيىمىنىڭ جانىنداعى وكىلەتتى وكىلى بولعان.

2004–2006 جىلدارى – قر پرەزيدەنتى اكىمشىلىگىنىڭ باس ينسپەكتورى.

2006–2008 جىلدارى  – قر سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى.

2008–2012 جىلدارى – قر ليتۆا رەسپۋبليكاسىنداعى توتەنشە جانە وكىلەتتى ەلشىسى، قر لاتۆيا رەسپۋبليكاسىنداعى، ەستونيا رەسپۋبليكاسىنداعى جانە فينليانديا رەسپۋبليكاسىنداعى توتەنشە جانە وكىلەتتى ەلشىسى (قوسا اتقارۋشى).

2012–2016 جىلدارى  – قر فينليانديا رەسپۋبليكاسى مەن ەستونيا رەسپۋبليكاسىنداعى توتەنشە جانە وكىلەتتى ەلشىسى (قوسا اتقارۋشى).

2016 جىلدان باستاپ –  قر سىرتقى ىستەر ءمينيسترىنىڭ ورىنباسارى قىزمەتىن اتقارعان.

سوڭعى جاڭالىقتار