19 ناۋرىز 2019, 10:56 1075 0 قاۋىپسىزدىك نازىم تويلىباەۆا

ۋلانعاندار سانى 39-عا جەتتى

شىمكەنت اكىمشىلىگىنىڭ وكىلدەرى № 54 ورتا مەكتەپتەگى جاپپاي ۋلانۋعا قاتىستى پىكىر ءبىلدىردى،  دەپ حابارلايدى Tengrinews.kz.

«18 ناۋرىزدا 16:53-تە № 54 ورتا مەكتەپتە بەلگىسىز نارسەدەن جاپپاي ۋلانۋ تىركەلدى. دەرەۋ تۇردە توتەنشە جاعدايدىڭ ءمان-جايىن انىقتاۋ ءۇشىن كوميسسيا قۇرىلدى. وقيعا ورنىنا توتەنشە جاعدايلار دەپارتامەنتىنىڭ جەدەل توبى، جەدەل جاردەم بريگاداسى، اكىمشىلىك قىزمەتكەرلەرى، قۇقىق قورعاۋ ورگاندارىنىڭ وكىلدەرى كەلدى. جاپا شەككەندەرگە العاشقى مەديتسينالىق كومەك كورسەتىلدى»، - دەدى اكىمشىلىكتەگىلەر.

بەلگىسىز زاتتان 4-7 سىنىپتىڭ 22 وقۋشىسى، ءبىر مۇعالىم، مەكتەپتىڭ ءبىر تەحنيكالىق جۇمىسشىسى ۋلانعان. ولاردىڭ ءبارى دە № 6 شىمكەنت قالالىق پوليكلينيكاسىنىڭ توكسيكولوگيالىق بولىمىنە جەتكىزىلدى.

«وقۋشىلاردىڭ اتا-انالارىمەن جۇمىس ناتيجەسىندە تاعى 15 بالادان ۋلانۋ بەلگىسى انىقتالدى، ولار دا قازىر اۋرۋحانادا. جاپا شەككەندەردىڭ بارىندە دە - جەڭىل دارەجەدەگى ۋلانۋ. مەكتەپتىڭ بارلىق وقۋشىسى مەن مۇعالىمى باقىلاۋعا الىندى. اۋرۋحاناعا جەتكىزىلگەن 39 ادام قاجەتتى مەديتسينالىق كومەكتى العان سوڭ ۇيلەرىنە جىبەرىلدى»، - دەلىنگەن حابارلامادا.

ولاردىڭ ءبارى ەندى تۇرعىلىقتى جەرى بويىنشا ۋچاسكەلىك دارىگەردىڭ باقىلاۋىندا بولادى. جۇمىس توبى توتەنشە جاعدايدىڭ سەبەبىن انىقتاۋ بويىنشا جۇمىستى جالعاستىرادى. مەكتەپتىڭ جانە ونىڭ اينالاسىنداعى اۋانىڭ سىناماسى الىندى. مەكتەپتە تابيعي گازدىڭ شىعۋى جايلى اقپارات راستالعان جوق. جاعدايدى قالا اكىمى ءوز باقىلاۋىنا الدى.

سوڭعى جاڭالىقتار