20 قاراشا 2018, 12:38 1074 0 ىشكى ساياسات نازىم تويلىباەۆا

نۇرسۇلتان نازارباەۆ: پوليتسيانى رەفورمالاۋ ىسىنە شۇعىل كىرىسۋىمىز قاجەت

بۇگىن اقوردادا مەملەكەت باسشىسى نۇرسۇلتان نازارباەۆتىڭ توراعالىعىمەن ىشكى ىستەر ورگاندارى قىزمەتىن جاڭعىرتۋ ماسەلەلەرى جونىندەگى كەڭەس ءوتتى، دەپ حابارلايدى قازاقپارات.

قر پرەزيدەنتى ءباسپاسوز قىزمەتىنىڭ مالىمەتىنشە، كەڭەستى اشقان ەلباسى  قۇقىقتىق ءتارتىپتى قامتاماسىز ەتۋ جانە قىلمىسپەن كۇرەس ماسەلەسى ايرىقشا باقىلاۋىندا ەكەندىگىن باسا ايتتى.

نۇرسۇلتان نازارباەۆ سوڭعى 3 جىلدا ىشكى ىستەر ورگاندارى كۇش-جىگەرىنىڭ ارقاسىندا ەلىمىزدەگى قىلمىس دەڭگەيى 17,5 پايىزعا قىسقارعان.

«ادامدار كريمينالدان قورعانۋ ءۇشىن ءبىرىنشى كەزەكتە پوليتسياعا جۇگىنەدى. تاۋەلسىزدىكتىڭ وسى جىلدارىنىڭ ىشىندە 779 قىزمەتكەر قازا تاۋىپ، شامامەن 2,5 مىڭى جاراقات الدى. جانە دە مۇنى ەستەن شىعارماۋ كەرەك. بۇعان قوسا، ىشكى ىستەر ورگاندارىنىڭ اعىمداعى جاعدايى قوعامنىڭ سۇرانىسىنا تولىقتاي كولەمدە جاۋاپ بەرە المايدى»، - دەدى مەملەكەت باسشىسى.

قازاقستان پرەزيدەنتى پوليتسيا قىزمەتكەرلەرىنىڭ ازاماتتارىمەن ءوزارا ءىس-قيمىلىنىڭ قولدانىستاعى ستاندارتتارى ەسكىرگەن جانە قازىرگى زامان تالاپتارىن ەسكەرە بەرمەيدى.

«ىشكى ىستەر ورگاندارى جۇيەسىنىڭ قىزمەتى قوعامنىڭ سەنىمىن اقتاي المايدى، ازاماتتاردىڭ كەيىستىگىن تۋدىرۋدا. ادامدار وزدەرىن قاۋىپسىز سەزىنبەيدى. ونسىز ءبىز قازاقستاندىقتاردىڭ جوعارى ءومىر ساپاسىن قامتاماسىز ەتە المايمىز. ال بۇل ءبىزدىڭ باعدارىمىز سانالادى. سوندىقتان پوليتسيانى پوليتسيانى رەفورمالاۋ ىسىنە شۇعىل كىرىسۋىمىز قاجەت»، - دەدى نۇرسۇلتان نازارباەۆ.

مەملەكەت باسشىسى  وسى جىلعى قازاقستان حالقىنا  جولداۋدىڭ باعىتتارىنا سايكەس ىشكى ىستەر سالاسىن مازمۇندى ءارى ساپالى وزگەرتۋدى جۇزەگە اسىرۋ قاجەتتىگىن كورسەتتى.

كۇن تارتىبىنە سايكەس كەڭەس بارىسىندا قر پرەزيدەنتى اكىمشىلىگىنىڭ باسشىسى اسەت يسەكەشەۆ پەن ىشكى ىستەر ءمينيسترى قالمۇحانبەت قاسىموۆتىڭ باياندامالارى تىڭدالدى.

ۇسىنىلعان اقپاراتتاردى قاپەرگە العان قازاقستان پرەزيدەنتى بارلىق جوسپارلانعان شارالاردى تىڭعىلىقتى ازىرلەۋ قاجەتتىگىن اتاپ ءوتتى.

سوڭعى جاڭالىقتار