10 قىركۇيەك 2018, 11:55 1602 0 جاھان نازىم تويلىباەۆا

ءار ايدىڭ ءۇشىنشى جۇماسى «كولىكسىز كۇن» دەپ جاريالانباق

وزبەكستاندىقتار ايىنا ءبىر كۇن جاياۋ جۇرۋلەرى مۇمكىن. ياعني، ءار ايدىڭ ءۇشىنشى جۇماسى «كولىكسىز كۇن» دەپ جاريالانباق، دەپ حابارلايدى حابار 24.

ىشكى ىستەر مينيستىرلىگىنىڭ بۇل باستاماسىن ۇكىمەت قولداپ وتىر. تاجىريبە رەتىندە قىركۇيەكتىڭ سوڭىندا ارنايى اكتسيا ۇيىمداستىرىلادى. وزبەكستانداعى زاڭ شىعارۋ پالاتاسىنىڭ دەپۋتاتتارى دا كولىكتەرىن قويىپ، كوپشىلىكپەن بىرگە ءبىر كۇن قوعامدىق كولىكپەن قاتىناۋعا دايىن. باستاما جۇرتتان قولداۋ تاپسا، بۇل كۇنگە ارنايى مارتەبە دە بەرىلەدى.

ەكونوميكاسى ەكپىن الىپ كەلە جاتقان كورشى ەلدە جىل ساناپ كولىك سانى دا ەسەلەپ  ارتىپ كەلەدى. ءبىر عانا تاشكەنتتىڭ وزىندە ميللونعا جۋىق تەمىر تۇلپار بار. وعان قالاعا كەلىپ-كەتەتىن كولىكتى تاعى قوسىڭىز. باسقا ەلدەر سياقتى وزبەكستاندىقتار دا كەيدە كولىكتەرىن قوياتىن جەر تاپپاي قينالىپ جاتادى. قىرىق جىلدان استام تەمىر تۇلپار تىزگىنىمەن الىسىپ كەلە جاتقان عاني ابدۋللاەۆ ايىنا ءبىر كۇن جاياۋ ءجۇرۋ قۇپتارلىق ءىس دەپ وتىر.

وزبەكستاندىقتار «كولىكسىز كۇن» اكتسياسىن كۇزدىڭ سوڭىندا ۇيىمداستىرۋدى جوسپارلاپ وتىر. «بيلىك ەشكىمدى كولىكسىز ءجۇر دەپ ماجبۇرلەمەيدى. اركىمنىڭ ءوز ەركى. دەگەنمەن، بۇل جەردە تەك حالىقتىڭ بەلسەندىلىگى مەن تابيعاتقا دەگەن سۇيىسپەنشىلىگىن وياتۋ»، - دەيدى زاڭ شىعارۋ پالاتاسىنىڭ دەپۋتاتى. باستاما حالىقتان قولداۋ تاپسا دەپۋتات ءبىر كۇن جاياۋ جۇرۋگە دايىن ەكەندىگىن ءبىلدىردى.

جالپى وزبەكستاندا سارسەنبى «ورتكە قارسى كۇرەس» كۇنى دەپ بەلگىلەنگەن. ال بەيسەنبىدە پروفيلاكتيكالىق ءىس-شارالار جۇرگىزىلەدى. ەندى ءار ايدىڭ ءۇشىنشى جۇماسىندا جۇرت ماشيناسىن تاستاپ قوعامدىق كولىكپەن جۇرمەك.

سوڭعى جاڭالىقتار