23 تامىز 2018, 15:52 1251 0 سىرتقى ساياسات نازىم تويلىباەۆا

اقش پەن اۋعانستان ماسكەۋدەگى كەلىسسوزدەرگە قاتىسپايدى

قۇراما شتاتتار مەن اۋعانستان كەلەسى ايدا رەسەي ۇيىمداستىراتىن بەيبىت كەلىسسوزدەرگە قاتىسپايتىندارىن مالىمدەدى، دەپ حابارلايدى centralasian.org.

اۋعانستاننىڭ سىرتقى ىستەر مينيسترلىگىنىڭ ءباسپاسوز حاتشىسى سيبگاتۋللا ءاحماديدىڭ 22 تامىزدا مالىمدەۋىنشە، ماسكەۋدەگى بەيبىت كەلىسسوزدەردەن باس تارتۋ تۋرالى شەشىم اۋعان پرەزيدەنتى اشراف گاني مەن باسقا دا رەسمي تۇلعالاردىڭ كەڭەسۋىمەن قابىلدانعان.

اقپارات قۇرالدارىنىڭ اۋعانستان ۇكىمەتىندەگى دەرەككوزگە سۇيەنىپ حابارلاۋىنشا، كابۋل تالىپتەرمەن شەتەلدىڭ قاتىسۋىنسىز تىكەلەي كەلىسوزدەر جۇرگىزۋدى قالايدى.

بۇل ۋاقىتتا اقش مەملەكەتتىك دەپارتامەنتىنىڭ ءباسپاسوز حاتشىسى ماسكەۋدە 4 قىركۇيەككە جوسپارلانعان بەيبىت كەلىسسوزدەرگە قۇراما شتاتتار قاتىسپايتىندىعىن راستادى. ونىڭ ايتۋىنشا، "مۇنداي كەلىسسوزدەردىڭ ناتيجەسىندە بەيبىتشىلىك ورناتۋ مۇمكىن ەمەس".

رەسەي ماسكەۋدەگى بەيبىت كەلىسسوزدەرگە "تاليبان" قوزعالىسى مەن 12 ەلدى شاقىرعان. ولاردىڭ ىشىندە اقش پەن اۋعانستان بار. "تاليبان" وكىلى زابيۋللا مۋدجاحيد قوزعالىس دەلەگاتسياسىن رەسەيگە جىبەرەتىنىن مالىمدەگەن.

2015 جىلى ناتو كۇشتەرىنىڭ كوپ بولىگىن اۋعانستاننان شىعارعان سوڭ ەلدە جانجال شيەلەنىسە ءتۇستى. وتكەن اپتادا "تاليبان" وكىلدەرى بيلىكتىڭ ءۇش اي ءبىتىم تۋرالى ۇسىنىسىنا جاۋاپ بەرمەدى. پەنتاگون تالىپتەرگە رەسەي كومەكتەسىپ وتىر دەپ بىرنەشە مارتە مالىمدەگەن. رەسەيدىڭ سىرتقى ىستەر مينيسترلىگى مۇنداي ايىپتاۋلاردى نەگىزسىز دەپ اتادى.

سوڭعى جاڭالىقتار