28 ماۋسىم 2018, 15:27 2629 0 زاڭ ماقسات قۇسايىنوۆ

سوت پەن باق اراسىنداعى بايلانىس

قۇقىقتىق مەملەكەت قۇرۋعا باعىتتالعان نىق قادامداردىڭ ءبىرى سوت قىزمەتىنىڭ اشىقتىعى مەن جاريالىلىعىنا كەلىپ تىرەلەدى. قوعامنىڭ دامۋ كەزەڭىندە بۇقارالىق اقپارات قۇرالدارى ساناعا زور ىقپال جاساپ قانا قويمايدى، سونىمەن قاتار، حالىقتىڭ سوت سالاسىنا دەگەن سەنىمىنە ىقپال جاسايدى.

الماتى قالاسىنىڭ الاتاۋ اۋداندىق سوتىندا سوت ادىلدىگىن جۇزەگە اسىرۋ باعىتىندا اتقارىلعان جۇمىستارىن اشىق كورسەتۋ ءۇشىن سوت ورگاندارى مەن بۇقارالىق اقپارات قۇرالدارى وكىلدەرى اراسىندا تىعىز قارىم-قاتىناس ورناعان. سوت جۇيەسىنىڭ بەدەلى حالىقتىڭ وعان دەگەن كوزقاراسى، سەنىمى ارقىلى ايقىندالاتىندىقتان، سوتتاردىڭ جۇمىسى حالىق ءۇشىن قولجەتىمدى بولۋى شارت. الاتاۋ اۋداندىق سوتى عيماراتىندا وتكىزىلىپ جاتقان ءىس-شارالار كوپ جاعدايدا بۇقارالىق اقپارات قۇرالدارى وكىلدەرىنىڭ قاتىسۋىمەن جۇزەگە اسىرىلىپ جاتادى. سوت عيماراتىنا ەركىن كەلىپ، جۋرناليستەر كەز كەلگەن اشىق سوت وتىرىسىنا قاتىسىپ، ءار ءبىر باق وكىلى ءوزىن مامانداندىرا الادى. ياعني، قۇقىق تاقىرىبىنا قالام تەربەيتىن ءباسپاسوز وكىلدەرىنىڭ زاڭنان حابارىنىڭ بولۋى. سەبەبى، ءباسپاسوز قىزمەتىندەگىلەر، جۋرناليستەر كوبىنە زاڭ تەرميندەرىن دۇرىس تۇسىنە بەرمەيدى. سونىڭ ناتيجەسىندە ءباسپاسوز بەتتەرىنە ءبىر جاقتى پىكىر قالىپتاسقان ماقالالار جارىق كورۋى دە مۇمكىن. كەيدە سوت شەشىمى شىقپاستان، ءىس جايلى باق وكىلدەرى تاراپىنان جاڭىلىسۋ سالدارىنان تەرىس پىكىر تۋدىراتىن تەلەكورسەتىلىمدەر نەمەسە اقپاراتتار جاريالانىپ جاتادى. وسى ولقىلىقتاردىڭ ورىن الماۋى ءۇشىن بۇگىنگى كۇنى قوعامدىق پىكىر تۋعىزعان ءىستىڭ نۇكتەسىن قويعاننان كەيىن، ءىستى قاراعان سۋديا باق وكىلدەرىنە ارناپ بريفينگ، ءباسپاسوز كونفەرەنتسيالارىن سۇرانىس بويىنشا وتكىزۋگە دايىن ەكەنىن وسى ماقالا ارقىلى ەسكەرتە كەتكىم كەلەدى. جۇمىس جۇكتەمەسىنە قاراماستان سۋديالار تاراپىنان بۇقارا حالىق پەن ءباسپاسوز وكىلدەرىنىڭ سۇراعان اقپاراتتارىنا تولىقتاي جاۋاپ بەرۋگە دايىن. ويتكەنى، قۇقىق تاقىرىبىنا قالام تەربەپ جۇرگەن جۋرناليستەر ءۇشىن سوت پروتسەستەرى ناقتى، بوياماسىز اقپارات الاتىن جەر. سوندىقتان دا جۋرناليستەردىڭ بەلگىلەنگەن زاڭ اياسىندا رۇقسات ەتىلگەن سوت پروتسەستەرىنە كەدەرگىسىز قاتىسۋىنا، قاجەتتى اقپاراتتاردى ەركىن الۋىنا جاعداي تۋعىزۋ بولاشاقتا جازىلاتىن ماقالانىڭ كىرىسپەسىنە جول اشارى داۋسىز.

الداعى ۋاقىتتا دا ءوزارا تۇسىنىستىك احۋالىندا جۇمىس جاساۋدىڭ ناتيجەسىندە قۇقىقتىق تاقىرىپتا جازىلعان ماقالالار مەن تەلە-راديو باعدارلامالارىنىڭ سانىمەن بىرگە ساپاسى دا ارتا تۇسەتىنى انىق. سوت پەن باق بايلانىسى حالىق يگىلىگى ءۇشىن جالعاسىن تابا بەرسىن. كاسىبي مەرەكەلەرىڭىز قۇتتى بولسىن.

الماتى قالاسى

الاتاۋ اۋداندىق سوتىنداعى

باق جۇمىستارىن

ۇيلەستىرۋگە جانە قاداعالاۋعا

جاۋاپتى مامان

مامانوۆ ا.ت.

سوڭعى جاڭالىقتار