19 ماۋسىم 2018, 16:41 1624 0 ءوندىرىس نازىم تويلىباەۆا

قازاقستاندا 2025 جىلى مۇناي ءوندىرۋ كولەمى 100 ملن توننادان اسادى

ەنەرگەتيكا ءمينيسترى قانات بوزىمباەۆ حالىق الدىندا ەسەپ بەرۋ كەزدەسۋىندە ەلىمىزدە مۇناي ءوندىرۋ كولەمى 2025 جىلى 104 ملن تونناعا جەتەتىندەي جوسپارلانعانىن ايتتى، دەپ حابارلايدى Baq.kz ءتىلشىسى.

ول مۇناي-گاز سالاسىنىڭ بارلىق سەكتورىنداعى كورسەتكىش 2017 جىلدىڭ سايكەس كەزەڭىمەن سالىستىرعاندا ءوسىمدى كورسەتكەنىن ايتتى.

«جوسپارلانعان مۇناي وندىرۋدەگى ءوسىم 1% بولدى، ال ءىس جۇزىندە بۇل ءوسىم 6,4% كورسەتتى. مۇناي ءوندىرۋ كولەمى 6,3 ملن توننانى قۇرادى. 2017 جىلدىڭ سايكەس كەزەڭىمەن سالىستىرعاندا 6,2% قۇرادى. جوسپارلانعان مۇناي ەكسپورتى 1,4%، ءوسىم 5,7% قۇرادى. جوسپارلانعان گاز ءوندىرۋ كولەمى 0,8%، ءوسىم 6,4% قۇرادى. جوسپارلانعان سۇيىتىلعان جانە تاۋارلىق گازدى وندىرۋدەگى ءوسىم 3,4% جانە 1%، ءوسىم 4,7% جانە 7,6% قۇرادى»، - دەدى ول.

ءمينيستردىڭ ايتۋىنشا، تەڭىز، قاراشىعاناق جانە قاشاعان ءۇش ءىرى جوبا ەلدەگى مۇناي-گاز ءوندىرۋ درايۆەرى بولىپ وتىر.

«ولار قىسقا مەرزىمدە ەل ەكونوميكاسىنىڭ وسىمىنە مۇمكىندىك بەرەدى. مۇناي ءوندىرۋ جىل سايىن ارتىپ كەلەدى. 2025 جىلعا قاراي 104 ملن تونناعا دەيىن جەتەدى دەپ بولجانىپ وتىر جانە وسى سالانى ءارى قاراي كەڭەيتۋ جانە ۇزارتۋ جوبالارى ىسكە اسىرىلىپ جاتىر. 2024 جىلعا قاراي قاشاعاندا ءوندىرىس كولەمىن جىلىنا 13 ملن توننادان 16 ملن-عا دەيىن جەتكىزۋ كۇتىلۋدە. جوبانى ىسكە اسىرۋ كەزەڭىنەن باستاپ اتىراۋ، ماڭعىستاۋ وبلىستارىنىڭ الەۋمەتتىك جانە ينفراقۇرىلىمدىق دامۋىنا قۇيىلعان ينۆەستيتسيا كولەمى 570 ملن اقش دوللارىن قۇرادى. جالپى جىل سايىن الەۋمەتتىك-ينفراقۇرىلىمدىق دامۋعا 50 ملن اقش دوللارى بولىنەدى»، - دەدى مينيستر.

بوزىمباەۆ قاراشىعاناقتاعى مۇناي ءوندىرۋ كولەمىن ساقتاپ قالۋ ماقساتىندا 2020 جىلعا قاراي ينۆەستيتسيا كولەمى 1,5 ملرد اقش دوللارىن قۇرايتىن گاز قۋاتتارىن جاڭعىرتۋ، 4-ءشى كومپرەسسوردى جانە 5-ءشى ىشكى كاسىپشىلىك قۇبىرىن سالۋ جوبالارى ىسكە اسىرىلاتىنىن اتاپ ءوتتى.

«قاراشىعاناقتى يگەرۋ جىلدارىنا باتىس قازاقستان وبلىسىنىڭ الەۋمەتتىك جانە ينفراقۇرىلىمدىق دامۋىنا شامامەن 342 ملن اقش دوللارى ءبولىندى. جالپى جىل سايىن ءوڭىردىڭ الەۋمەتتىك-ينفراقۇرىلىمدىق دامۋىنا 20 ملن اقش دوللارى بولىنەدى»، - دەدى ەنەرگەتيكا ءمينيسترى حالىق الدىندا ەسەپ بەرۋ كەزدەسۋىندە.

 

 

سوڭعى جاڭالىقتار