19 ءساۋىر 2018, 13:02 1783 0 كولىك دينارا مىڭجاسارقىزى

جولاۋشىلار اۆتوبۋسى جولعا شىقتى

قازاقستان مەن وزبەكستان اراسىنداعى الىس-بەرىس پەن بارىس-كەلىستىڭ اياسى كۇن وتكەن سايىن كەڭەيىپ كەلەدى. اسىرەسە، وزبەكستان پرەزيدەنتى شاۆكات ميرزياەۆتىڭ ءبىزدىڭ ەلگە جاساعان ساپارىنان كەيىن قارىم-قاتىناس تىپتەن جاندانا باستادى. ونىڭ ءبىر دالەلى رەتىندە جاڭا جىلدان باستاپ شىمكەنتتەن تاشكەنت باعىتىنا اۆتوبۋس كۇن سايىن قاتىناسا، وتكەن اپتادا الماتىدان تاشكەنتكە قاراي العاشقى جولاۋشىلار اۆتوبۋسى جولعا شىقتى.

«سايران» اۆتوۆوكزالىندا جاڭا رەيستىڭ تۇساۋى كەسىلىپ، العاشقى جولاۋشىلار لەگى وزبەكستان استاناسىنا اتتانىپ كەتتى. بۇعان وزبەك پرەزيدەنتى شاۆكات ميرزياەۆتىڭ قازاق­ستانمەن ىقپالداسۋعا جانە ستراتەگيالىق سەرىكتەستىكتىڭ تامىرىن تەرەڭدەتۋگە دەگەن تالپىنىسى مەن نيەتى سەبەپ بولۋدا. الداعى ۋاقىتتا ەكى ەلدىڭ تاۋار اينالىمىن 5 ملرد اقش دوللارىنا جەتكىزۋ جوسپارلانعان. سوندىقتان دا ەكى ەل ءبىر-بىرىنە مەيلىنشە اشىق بولۋدى كوزدەپ وتىر. تاراپتار حالىقارالىق جاڭا باعىتتى ىسكە قوسۋ ءۇشىن ەكى ايعا جۋىق ۋاقىت كەلىسسوزدەر جۇرگىزگەن. جولدىڭ ۇزاقتىعىن، ترانسپورت مۇمكىندىكتەرىن ەسەپكە الىپ، ناتيجەسىندە «ۋزاۆتوترانس» پەن قر ينۆەستيتسيالار جانە دامۋ مينيسترلىگى ەكى جاققا دا ءتيىمدى جاعدايدا جاڭا رەيستى ىسكە قوسىپ وتىر. ەندى قازاقستان تاراپىنان «يۋگترانس لاين» جشس مەن وزبەكستاندىق ERKIN EMINAEXPRESS TOUR جشس تاسىمالداۋشىلارى تىزە قوسىپ، جۇمىس اتقارماق. ولار اۆتوبۋستىڭ تەحنيكالىق بۇتىندىگىنە، جۇرگىزۋشىلەردىڭ دەنساۋلىق جاعدايىنا، اۆتوبۋستاردى كۇزەتۋ مەن تازالاۋعا تىكەلەي جاۋاپ بەرەدى.

حالىقارالىق الماتى-تاشكەنت تۇراقتى اۆتوبۋس رەيسى كۇنىنە ءۇش مارتە جۇرەدى. جولدىڭ ۇزاقتىعى – 818 شاقىرىم. مەجەلى جەرگە جەتۋ ءۇشىن 16,5 ساعات ۋاقىت كەتەدى. قر ينۆەستيتسيالار جانە دامۋ مينيسترلىگىنىڭ مالىمدەۋىنشە، قازاقستان مەن وزبەكستان اراسىندا جولاۋشىلار تاسىمالدايتىن اۆتوبۋستار وسىدان 17 جىل بۇرىن توقتاپ قالعان. ال 5 قاڭتاردان باستاپ اشىلعان شىمكەنت-تاشكەنت حالىقارالىق اۆتوبۋس باعىتى باعدارى كۇندە ساعات سايىن تاڭعى 6:00 مەن كەشكى 20:00 ارالىعىندا قاتىناپ ءجۇر. سول باعىتتىڭ تۇساۋكەسەرىندە ەكى ەلدىڭ باسقا دا ءىرى قالالارى اراسىندا تۇراقتى اۆتوبۋس قاتىناسى ىسكە قوسىلاتىنى تۋرالى تىلگە تيەك ەتىلگەن ەدى. الماتى مەن تاشكەنتتى بايلانىستىراتىن جولاۋشىلار اۆتوبۋسىنىڭ جولعا شىعۋى دا سول ءسوزدىڭ ءىس جۇزىندەگى كورىنىسى بولسا كەرەك.

تاسىمالداۋشى كومپانيانىڭ وكىلى حوميدجان ناسرۋللاەۆتىڭ ايتۋىنشا، وزبەكستان استاناسىنا بەت الاتىن جولاۋشىلار ەندى بۇرىنعىداي ۇزىنسونار تەكسەرىس كەزەگىنە دە تاپ بولمايتىن كورىنەدى. «اۆتوبۋس جولاۋشىلارى ءۇشىن شەكارادا كوپتەگەن جەڭىلدىكتەر قاراستىرىلىپ وتىر. ولار ەندى بۇرىنعىداي جۇكتەرىن ارقالاپ، ۇزاق ۋاقىت كەزەكتە تۇرمايدى. جولاۋشىلار وتەتىن ارنايى بەكەتتەر بار. ال سومكەلەرى اۆتوبۋستان شىعارىلمايدى. وسىلايشا، ۋاقىتتى ۇنەمدەپ وتىرمىز. جولاقى دا قىمبات ەمەس، 4 مىڭ تەڭگە. وزبەكستاننىڭ اقشاسىنا شاققاندا – 100 مىڭ سۋم. جولاۋشىلاردى قىتايلىق Yutong جانە بەلگيالىق Vanhol ماركالى اۆتوبۋستار تاسىمالدايدى دەپ جوسپارلانعان. قازاقستاننىڭ «جىبەك جولى» جانە وزبەكستاننىڭ «عىش كوپرىك» كەدەندىك بەكەتتەرى جولاۋشىلاردى قابىلداۋعا دايىن. بەكەتتەن ءوتۋ ۋاقىتى 30 مينۋتتى الادى. ءار ەكى ساعات سايىن توقتاپ، دەمالامىز. جولاۋشىلار شارشامايدى»، – دەيدى ول.

ايتپاقشى، اۆتوبۋس قاتىناسىنىڭ اشىلۋىنا قازاقستان مەن وزبەكستان ۇكىمەتتەرى اراسىنداعى 2006 جىلعى 20 ناۋرىزدا قول قويىلعان «حالىق­ارالىق اۆتوموبيل بايلانىسى تۋرالى كەلىسىمگە» وزگەرتۋلەر مەن تولىقتىرۋلار نەگىز بولعان. قۇجاتتىڭ جاڭا حاتتاماسى ەكى ەل پارلامەنتىنىڭ دەڭگەيىندە قايتا راتيفيكاتسيالانعان. ەكى ەلدىڭ ۇكىمەتى تەمىرجول قاتىناسىن دا جولعا قويدى. بۇگىندە الماتى-تاشكەنت اراسىندا جۇردەك پويىز جۇيتكىپ ءجۇر. بۇعان دەيىن الماتىدان تاشكەنتكە پويىزبەن ءار اپتانىڭ دۇيسەنبى، سەنبى، ال تاشكەنتتەن سەيسەنبى، جەكسەنبى كۇندەرى جولعا شىعۋعا بولاتىن. 18 ناۋرىزدان باستاپ «الماتى-تاشكەنت» پويىزىنىڭ جيىلىگىنە تاعى ءبىر كۇن قوسىلدى. ءدال وسىنداي پويىز استانادان سەيسەنبى، سامارقاننان جەكسەنبى كۇنى جۇرەدى. بۇل رەتتە ۋاقىت ۇنەمدەگىسى كەلەتىن جولاۋشىلارعا دا جاعداي جاسالعان. ولار ءۇشىن وتكەن جىلدىڭ 24 قاراشاسىنان باستاپ الماتى-تاشكەنت باعىتى بويىنشا ءبىر كۇندە ەكى رەت اۋە رەيسى قاتىنايتىن بولدى. بۇل كەلىسىمگە قر يدم ازاماتتىق اۆياتسيا كوميتەتى مەن وزبەكستاننىڭ اۆياتسيا اكىمشىلىگىنىڭ، سونىمەن قاتار ەكى ەلدىڭ اۋە كومپانيالارىنىڭ اراسىنداعى كەلىسسوز ناتيجەسىندە قول جەتكىزىلدى.

سوڭعى جاڭالىقتار