26 ناۋرىز 2018, 11:07 3224 0 ءبىلىم انار لەپەسوۆا

ەندى باكالاۆر دارەجەسىن كوللەدجدەن الۋعا بولادى

بۇدان بىلاي باكالاۆر دارەجەسىن الۋ ءۇشىن ينستيتۋت پەن ۋنيۆەرسيتەتتەردە وقۋ مىندەتتى ەمەس. العاشقى عىلىمي دارەجەنى كوللەدجدەن دە الۋعا بولادى. مۇنداي جاڭا جۇيە استانا كوللەدجدەرىنىڭ بىرىندە ەنگىزىلۋدە.

جاڭا تەحنيكالىق رەۆوليۋتسيا جانە جوعارى دەڭگەيدەگى مامانداردىڭ قاجەتتىلىگى قازاقستاندىق ءبىلىم بەرۋ جۇيەسىندەگى وزگەرىستەرگە اكەلەدى. سونداي-اق، ونى الەمدىك ستاندارتتارعا جاقىنداتادى. ءبىلىم بەرۋدىڭ حالىقارالىق ستاندارتتارىنا سايكەس، باكالاۆر دارەجەسى كوللەدج تۇلەكتەرىنەن جوعارى. بىراق ۋنيۆەرسيتەت بىتىرگەن جوعارى دارەجەلى ماماندارعا قاراعاندا تومەن دەپ حابارلادى 24 حابار.

ءبىر سوزبەن ايتقاندا، قولدانبالى باكالاۆرلار كىشى ينجەنەرلەر دەپ اتالادى. ولار تەك تەوريالىق بىلىمدەرىمەن عانا ەمەس، ناقتى ءوندىرىس جاعدايىندا دا تاجىريبەگە يە. وسىنداي مامانداردى دايارلاۋ ەۋروپادا كەڭ تارالعان. تمد ەلدەرىندە باكالاۆر دارەجەسى بويىنشا تەك رەسەيدە عانا وقىتىلادى. ەندى ونى قازاقستاندا ەنگىزۋ جوسپارلانۋدا. ەكى جىلدان بەرى «كاسىپقور» حولدينگى حالىقارالىق تاجىريبەنى زەردەلەۋ، سونداي-اق وتاندىق كوللەدجدەر ءۇشىن ستاندارتتى باعدارلامالاردى ازىرلەۋمەن اينالىسىپ كەلەدى.

«ءبىز بۇل باعدارلامانى 2016 جىلى باستادىق. ءادىسنامانى دايىنداۋ بارىسىندا  ۋنيۆەرسيتەتتەر مەن كوللەدجدەردىڭ وكىلدەرى، سونداي-اق الەۋەتتى جۇمىس بەرۋشىلەر قاتىستى. كاسىپورىنداردىڭ نەگىزىندە كوللەدجدى بىتىرگەننەن كەيىن وسى مەكەمەلەرگە جۇمىسقا ورنالاسۋ مۇمكىندىگىن ارتتىراتىن قولدانبالى باكالاۆرلاردى وقىتۋ مەن پراكتيكاسى جۇرگىزىلەدى»،-دەيدى «كاسىپقور» حولدينگى اق باسقارما توراعاسى نۇرعالي ارشابەكوۆ.

بۇل تاجىريبە العاش رەت ەلورداداعى كولىك جانە كوممۋنيكاتسيا كوللەدجىندە ەنگىزىلدى. وسى باعدارلاما اياسىندا «كاسىپقور» حولدينگى وقۋ ورنىمەن كەلىسىم-شارت جاساسقان. قولدانبالى باكالاۆرلاردى «ينفورماتيكا جانە باعدارلامالىق قامتاماسىز ەتۋ» ماماندىعى بويىنشا دايىنداۋدا.

«وقۋ مەرزىمى تۇراقتى كوللەدجگە قاراعاندا ۇزاعىراق. كوللەدجدەن باكالاۆر دارەسەجەسىن الۋ ءۇشىن 11-سىنىپتىڭ بىلىمىمەن تاپسىرۋ كەرەك. ولار جۇمىسشى بىلىكتىلىگى، ورتا دەڭگەيدەگى مامان، سودان كەيىن قولدانبالى باكالاۆر دارەجەسى سەكىلدى ءبىلىمنىڭ بىرنەشە دەڭگەيىن الادى. ستۋدەنتتەر قولدانبالى باكالاۆرياتتى اياقتاعاننان كەيىن وندىرىستىك كاسىپورىنداردا جۇمىس ىستەي الادى جانە كىشى ينجەنەردىڭ دەڭگەيىنە تەز جەتەدى»،-دەيدى كولىك جانە كوممۋنيكاتسيا كوللەدجى ديرەكتورىنىڭ ورىنباسارى لاريسا ماتۆەەۆا.

سوڭعى جاڭالىقتار