24 ناۋرىز 2018, 20:50 1877 0 ءبىلىم Túrkistan Gazeti

ساۋاتتى جاستاردى وقىتۋ – ءاربىر ۇستازدىڭ ارمانى

مەملەكەت باسشىسى «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا: «جاڭا تۇرپاتتى جاڭعىرۋدىڭ ەڭ باستى شارتى – ۇلتتىق كودىڭدى ساقتاي ءبىلۋ. ونسىز جاڭعىرۋ دەگەنىڭىزدىڭ قۇر جاڭعىرىققا اينالۋى وپ-وڭاي»، – دەپ رۋحاني جاڭعىرۋدىڭ جەدەل قارقىن الۋىن الدىمىزعا تارتقان بولاتىن. جالپى، زەر سالىپ قاراعان جانعا بىردەن اڭعارىلاتىنى – الەۋمەتتىك ماسەلەلەر ەلباسىنىڭ ءار جىل سايىنعى جولداۋىنداعى ەڭ باستى تاقىرىپ. بۇل سوزىمىزگە تاعى ءبىر دالەل – قازاقستان پرەزيدەنتى نۇرسۇلتان نازارباەۆ جاقىندا جاريالاعان «بەس الەۋمەتتىك باستاما». بۇل – ەلباسى جولداۋلارىنداعى باعىتتاردى جۇزەگە اسىرۋعا جول اشاتىن ناقتى قادام. الەۋمەتتىك بەس باستاما – ەلباسىنىڭ حالىققا جاساعان ەرەكشە قامقورلىعىنىڭ ايقىن كورىنىسى.

ەلباسى جاريالاعان بۇل باستامالار – قازاقستاندىقتاردىڭ الەۋمەتتىك جاع­دايىن جاقسارتۋعا ارنالعان ماڭىزدى شەشىم. ءبارى دە حالىقتىڭ كوكەيىندە جۇرگەن وزەكتى جايتتار. بارلىعى دا بۇرىننان ءتۇرلى دەڭگەيلەردە سان مارتە كوتەرىلىپ، ايتىلىپ كەلگەنىمەن قارجىلىق مۇمكىندىكتەر قولبايلاۋ بولىپ، مەزگىلى كەلگەن كەزدە كوتەرىلىپ وتىرعان ماسەلەلەر ەكەنى تۇسىنىكتى. «ەشتەن كەش جاقسى»، بالكىم بۇل دا دۇرىس شىعار. حالىقتىڭ جاعدايى تۇزەلە باستاعانىنىڭ دا دالەلى ىسپەتتى ەمەس پە؟!

حالقىمىزدىڭ مۇددەسىمەن ۇندەس كەلگەن بۇل ۇندەۋ – قازاقستان مەملەكەتىن دامىتۋ جولىنداعى ەرەكشە تاريحي كەزەڭ بولعالى تۇر. پرەزيدەنت حالىقتى قولجەتىمدى باسپانامەن قامتۋ، سالىق جۇكتەمەسىن ازايتۋ، جوعارى ءبىلىم الۋدىڭ قولجەتىمدىلىگى مەن ساپاسىن ارتتىرۋ، شاعىن نەسيە بەرۋدى كوبەيتۋ جانە ەلدى گازبەن قامتاماسىز ەتۋدى ۇسىندى.

ءار وتباسىنا باسپانا الۋدىڭ جاڭا مۇمكىندىكتەرىن بەرۋ ماقساتىندا ۇلتتىق بانك ارنايى ۇيىم قۇرۋ ارقىلى جاڭا يپوتەكالىق «7-20-25 باعدارلاماسىن» دايىندادى. ونىڭ نەگىزگى شارتى – نەسيە ءوسىمىنىڭ مولشەرلەمەسى جىلىنا 7 پايىزدان، باستاپقى جارناسى 20 پايىزدان اسپايتىن بولادى. نەسيە مەرزىمى – 25 جىلعا دەيىن سوزىلماق. جالاقىسى تومەن جۇمىسشىلاردىڭ سالىق جۇكتەمەسىن ازايتۋ ءۇشىن ۇلتتىق ەكونوميكا مينيسترلىگىنە 2019 جىلدىڭ 1 قاڭتارىنان باستاپ، اي سايىن ەڭ تومەنگى ەسەپتىك كورسەتكىشتىڭ 25 ەسەلەنگەن كولەمىنەن از جالاقى الاتىن جۇمىسكەرلەرگە سالىناتىن جەكە تابىس سالىعىنىڭ مولشەرىن 1 پايىز ەتۋدى تاپسىردى. سالىقتى ازايتۋدان تۇسەتىن قارجى ولاردىڭ جالاقىسىن كوبەيتۋگە باعىتتالماقشى.

قازاقستاندا الەۋمەتتىك دامۋدىڭ وزىندىك مودەلى قۇرىلۋى – بۇل قوعامداعى الەۋمەتتىك سەنىمنىڭ ارتۋىنا اكەلەتىنى انىق.

جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ ماسەلەسىنە ەرەكشە نازار ءبولىنۋى جوعارى جانە ورتا ءبىلىم بەرۋ جۇيەسىنىڭ باسشىلارى مەن قىزمەتكەرلەرى، ۇجىمى ءۇشىن اسا قۋانىشتى جاي بولدى.

«الەمدىك ءبىلىم بەرۋ جۇيەسىن قۇرۋدا ستۋدەنتتەردىڭ ءومىر ءسۇرۋ جاعدايى باستى نازاردا. بۇگىندە جوو مەن كوللەدج ستۋدەنتتەرىن جاتاقحانامەن قامتۋ سۇراقتارى كوكەيدە تۇر. اتالعان ماسەلەنى شەشۋ ماقساتىندا جاتاقحانا قۇرىلىسىن دەۆەلوپەرلىك كومپانيالار ارقىلى مەملەكەتتىك-جەكەمەنشىك سەرىكتەستىك تەتىگى نەگىزىندە ىسكە اسىرۋ كەرەك. 2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاتاقحانا سالۋدى تاپسىرامىن. ءتيىستى سۇرانىستى ەسكەرگەننىڭ وزىندە جاتاقحانا تاپشىلىعىن ءبىرجولا شەشەتىن بولادى»، – دەدى پرەزيدەنت نۇرسۇلتان نازارباەۆ.

وسى ورايدا، ءبىلىم جانە عىلىم مينيسترلىگىنە جاڭا ەكونوميكادا سۇرانىسقا يە مامانداردىڭ قاجەتتىلىگىن تالداۋ نەگىزىندە 2018-2021 وقۋ جىلدارىنا ارنالعان جوعارى جانە جوعارى بىلىمنەن كەيىنگى كادرلاردى دايارلاۋعا مەملەكەتتىك ءبىلىم بەرۋ تاپسىرىسىن بەكىتۋ تۋرالى قاۋلى جوباسىن دايىنداۋ جۇكتەلۋى ءىستىڭ ناقتى شەشىم تابۋىنىڭ ايقىن كورىنىسى بولماق. سونىمەن قاتار، جوعارى ءبىلىم سالاسىنا قوسىمشا 20 مىڭ گرانت ءبولىنۋى، 2020 جىلدىڭ سوڭىنا دەيىن ستۋدەنتتەرگە ەڭ كەمى 75 مىڭ ورىندىق جاتاقحانا سالۋ كوزدەلگەنى نۇر ۇستىنە نۇر دەپ ايتساق بولادى.

جوعارى وقۋ ورىندارىندا جاتاقحانالار جەتىسپەيتىنى ەشكىمگە قۇپيا ەمەس. ستۋدەنت  جاستاردىڭ ءبىر بولىگى پاتەر جالدايدى. باسپانانىڭ جايسىزدىعى وقۋ ساپاسىن تومەندەتەدى.

سوندىقتان مەملەكەت باسشىسى شۇعىل تۇردە، ءبىر-ەكى جىل كولەمىندە جاتاقحاناعا مۇقتاج ستۋدەنت جاستارعا جاتاقحانا سالىپ بەرۋدى تاپسىرۋى ۋاقىت تالابىنا وتە ساي كەلەدى. دامىعان كومپانيالار مەن بيزنەستە جۇرگەن جاندار بىرلەسە قارجى سالىپ، جاتاقحانا قۇرىلىسىن قولعا الاتىن بولسا، بىتپەيتىن ءىس جوق. حالقىمىز: «جۇمىلا كوتەرگەن، جۇك جەڭىل دەمەۋشى مە ەدى؟!»

ۇندەۋدەگى تۇرعىن ۇيگە قاتىستى «7-20-25» باعدارلاماسى بويىنشا بيۋدجەتتىك سالا قىزمەتكەرلەرى مەن ورتا تابىسى بار قازاق­ستاندىقتاردى ءتيىمدى يپوتەكالىق زايم الۋ مۇمكىندىگى قىزىقتىرىپ وتىر. وعان قوسا، تومەن جالاقى الاتىن جۇمىسشىلارعا سالىناتىن سالىق دەڭگەيىن ءتۇسىرۋ ماسەلەسى جۇمىس بەرۋشىلەردى مىندەتتەمەستەن، ەكى ميلليونعا جۋىق قازاقستاندىقتىڭ جالاقىسىن كوبەيتەدى ەكەن.

ومىردەگى بارلىق تىرلىك ءبىر-بىرىمەن تىعىز بايلانىستا قوزعالىسقا تۇسەرىنە ەشكىم داۋ ايتپايدى. بۇل ءبىلىم سالاسىنا دا قاتىستى. ماسەلەن، مەكتەپ قابىرعاسىندا تولىق دەڭگەيدە ءبىلىم الماعان ءجاسوسپىرىم جوعارى وقۋ ورنىندا قالاي ءبىلىمىن جەتىلدىرەر ەدى؟ وسى جەلى ءارى قاراي جالعاسسا، نە بولماق؟ مىنە، مۇعالىمنىڭ جالاقىسىن كوتەرۋ ماڭىزدىلىعى وسىدان تۋىندايدى.

مەملەكەت باسشىسى نۇرسۇلتان نازارباەۆ قازاقستان حالقىنا ارنالعان «پرەزيدەنتتىڭ بەس الەۋمەتتىك باستاماسى» اتتى ۇندەۋىندە «بەس الەۋمەتتىك باستامانى ىسكە اسىرۋ بارىسىندا مۇعالىمدەردىڭ جالاقىلارى دا وسەتىن بولادى. قازىر ءبىز مەكتەپتەردە ءبىلىم بەرۋدىڭ جاڭا مازمۇنىنا كوشتىك، بۇل مۇعالىمدەردىڭ جالاقىسىن 30 پايىزعا ارتتىرۋعا مۇمكىندىك بەرەدى. سونداي-اق، ورتا ءبىلىم بەرۋ جۇيەسىندە بىلىكتىلىك ساناتتارى كوزدەلگەن. ساناتى كوتەرىلگەن مۇعالىمدەردىڭ جالاقىسى قوسىمشا 50 پايىزعا كوبەيەتىن بولادى»، – دەۋىنىڭ وسىنداي ماڭىزدى سەبەپتەرى بار. ساۋاتتى جاستاردى وقىتۋ، تاربيەلەۋ، التىن ۇيادان ماقتانىشپەن ۇشىرۋ – ءاربىر ۇستازدىڭ ارمانى.

ءبىزدى، رەكتورلاردى، جوعارى ءبىلىم ساپاسى مەن ونىڭ قولجەتىمدىلىگىنە جاسالعان تاعى ءبىر قادام ەرەكشە قۋانتىپ وتىر. بۇل قازاقستاندىق جاستاردى دا قىزىقتىرادى، ءارى ءۇمىت سىيلايدى. بۇل باستاما ءتورتىنشى ونەركاسىپتىك رەۆوليۋتسيا جاعدايىندا قاجەت بولاتىن مىڭداعان جاڭا مامانداردى ازىرلەپ شىعۋعا مۇمكىندىك بەرەدى.

سوندىقتان دا ءبىلىم سالاسىنىڭ بارلىق قىزمەتكەرلەرى مەن ستۋدەنت جاستارى تاۋەلسىز قازاقستاندى وركەندەتۋ مەن نىعايتۋ جولىندا كۇش-جىگەرىن مەيلىنشە جۇمساي وتىرىپ، ءوز ۇلەستەرىن قوسا بەرەدى دەپ سەندىرەمىن.

 

سارسەنعالي ءابدىماناپوۆ،

قازاق ەكونوميكا،

قارجى جانە  حالىقارالىق

ساۋدا ۋنيۆەرسيتەتىنىڭ رەكتورى،

حالىقارالىق جوعارى مەكتەپ

عىلىم اكادەمياسىنىڭ اكادەميگى،

پەداگوگيكا عىلىمدارىنىڭ دوكتورى

           

سوڭعى جاڭالىقتار