24 ناۋرىز 2018, 00:57 1755 0 ونەر دينارا مىڭجاسارقىزى

«ناۋرىز كوكتەم-شىمقالا» ايتىسى ءوتتى

شىمكەنتتەگى «تۇركىستان» سارايىندا ۇلىستىڭ ۇلى كۇنى ناۋرىز مەرەكەسىنە وراي  «ناۋرىز كوكتەم-شىمقالا» ايتىسى ءوتتى. ۇلىستىڭ ۇلى كۇنىن ۇلىقتاۋعا ارنالعان بيىلعى ايتىستىڭ ەرەكشەلىگى – داستۇرلى تۇردەگى دودا باعىتىندا ەمەس، ايتىس-شوۋ تۇرىندە ۇيىمداستىرىلدى.  

جىر دوداسىنا ەلىمىزگە بەلگىلى 14 ايتىسكەر اقىن قاتىسىپ، باقتارىن سىنادى. اقىندار قازىعۇرتتان باستاۋ العان ءاز ناۋرىز مەرەكەسى مەن ەلباسى ن. نازارباەۆتىڭ "بولاشاققا باعدار:رۋحاني جاڭعىرۋ" باعدارلامالىق ماقالاسى اياسىندا ۇلگى بولارلىق وڭدى ىستەردى ايتىسقا ارقاۋ ەتتى. شىمكەنت قالاسىنىڭ شىرايلى كەلبەتى مەن ءوسىپ-وركەندەۋىن تىلگە تيەك ەتتى. ايتىستىڭ شىمىلدىعىن وڭتۇستىكتىڭ وت اۋىز، وراق ءتىلدى اقىنى بەكارىس شويبەكوۆ پەن الماتى وبلىسىنىڭ ءدۇلدۇلى سىرىم اۋەزحان اشسا،  وڭتۇستىكتىڭ ايتىسكەرى انار جاپپارقۇلوۆا مەن تارازدىق اسەت دۇيسەباەۆ رۋحاني كەشتى ءارى جالعادى. ودان كەيىن باتىس قازاقستان وبلىسىنان كەلگەن تالعات مىقي مەن تالدىقورعاندىق سارا توقتامىسوۆا، باتىس قازاقستان وبلىسىنىڭ ايتىسكەرى مۇرادىم ميرلانوۆ پەن وڭتۇستىكتىك جارقىنبەك ناۋشابەكوۆ حالىقتى سۇلۋ سوزدەرمەن سۋسىنداتتى. استانا قالاسىنىڭ ايتىس جۇيرىگى بالعىنبەك يماشەۆ پەن  نۇرلان ەسەنقۇلوۆ جانە استانالىق  اينۇر تۇرسىنباەۆا مەن شىمكەنتتىك قاجىمۇقان ابزالوۆتاردىڭ ايتىسى دا كوپشىلىكتىڭ كوڭىلىنەن شىقتى. ال، استانالىق ادۋىندى اقىن جانداربەك بۇلعاقوۆ پەن اقتوبە وبلىسىنىڭ شايىرى دانيار الدابەرگەندەر  دە ايتىستىڭ تاماشا ۇلگىسىن كورسەتتى.  ايتىس سوڭىندا «قۇلمانبەت ايتىس» ونەرى ۇيىمداستىرىلدى.

سوڭعى جاڭالىقتار