16 اقپان 2018, 17:08 1900 0 اۋديو دينارا مىڭجاسارقىزى

«دالا سازى» ونلاين-راديوسى ىسكە قوسىلادى

  «دالا سازى» ونلاين-راديوسى ىسكە قوسىلادى. بۇل تۋرالى بۇگىن اقوردادا وتكەن قر پرەزيدەنتى جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ كەزەكتى وتىرىسىندا قر پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆا ايتتى، دەپ حابارلايدى قازاقپارات.

«وتاندىق ادەبيەتتى جوعارى دەڭگەيدە تانىستىرۋعا قابىلەتتى جاس تالانتتار مەن تۋىندىلاردى انىقتاۋ باعىتىنداعى جۇمىستار دا جۇرگىزىلۋدە. ماسەلەن، 2017 جىلى ءبىرىنشى «رۋح» حالىقارالىق ادەبي كونكۋرس ۇيىمداستىرىلدى. 8 ەلدەن مىڭنان استام ءوتىنىم كەلىپ ءتۇستى. بۇل شارا ادەبيەت سالاسىنداعى مادەنيەتارالىق ءوزارا ءىس-قيمىلدى جانداندىرۋعا مۇمكىندىك بەردى. اعىمداعى جىلى يتاليا، فرانتسيا، ۇلىبريتانيا، يسپانيا سىندى ەلدەرگە گاسترولدىك تۋرلار ۇيىمداستىرىپ، وپەرا-بالەت قويىلىمدارىن، مۋزەي كورمەلەرىن، مۋزىكالىق انسامبلدەردىڭ ونەر كورسەتۋلەرىن وتكىزۋ كوزدەلىپ وتىر»، - دەدى ايدا بالاەۆا. ونىڭ ايتۋىنشا، ۇزدىك قازاقستاندىق مۋزىكالىق تۋىندىلارعا تسيفرلى فورماتتاعى قولجەتىمدىكتى قامتاماسىز ەتەتىن Dalatunes - ينتەرنەت-رەسۋرس جوباسى ىسكە اسىرىلدى. 2017 جىلدىڭ ىشىندە 13 مىڭ مۋزىكالىق تۋىندى، 1,2 مىڭ نوتا جانە 1,7 مىڭ اككورد جۇكتەلدى. «دالا سازى» ونلاين-راديو جوباسى ازىرلەنىپ، ىسكە قوسۋ كەزەڭىندە تۇر. ول وتاندىق جانە شەتەلدىك اۋديتورياعا ءتۇرلى جانرداعى قازاقستاندىق مۋزىكانى تانىستىرىپ، قازىرگى زامانعى تانىمال اۆتورلارمەن، ورىنداۋشىلارمەن سۇحباتتار ۇسىناتىن بولادى. ول ءۇشىن اعىلشىن ءتىلدى كونتەنتتە قاراستىرىلعان»،- دەدى ول.

ايدا بالاەۆانىڭ سوزىنە قاراعاندا، ەلوردانىڭ مادەني ورتالىق مارتەبەسىن قالىپتاستىرۋ ءۇشىن اعىمداعى جىلدىڭ شىلدە ايىندا قازىرگى زامانعى ونەردىڭ استانا بيەننالەسىن وتكىزۋ جۇمىستارى جۇرگىزىلۋدە. «قازىرگى ۋاقىتتا تانىمال ونەرتانۋشىلارمەن جانە حالىقارالىق ساراپشىلارمەن قازاقستاننىڭ بەينەلەۋ ونەرى كاتالوگىنا كىرەتىن تۋىندىلارعا ساراپتاما جۇرگىزىلۋدە»، - دەدى ىشكى ساياسات ءبولىمىنىڭ مەڭگەرۋشىسى. ءوز كەزەگىندە قر پرەزيدەنتى اكىمشىلىگىنىڭ باسشىسى، قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ توراعاسى ادىلبەك جاقسىبەكوۆ وبلىس اكىمدەرىنە «جاھاندىق الەمدەگى قازىرگى زامانعى مادەنيەت» جوباسىن جۇزەگە اسىرۋ اياسىندا جەرگىلىكتى ۇجىمداردىڭ گاسترولدەرىن، كوركەمسۋرەت كورمەلەرىن ۇيىمداستىرۋ جۇمىستارىن كۇشەيتۋدى تاپسىردى.

سوڭعى جاڭالىقتار